Կառավարությունն այսօրվա նիստում հաստատեց 2017 թվականի ձմեռային զորակոչը կազմակերպելու մասին որոշման նախագիծը։ Ձմեռային զորակոչն անցկացվելու է նոյեմբերից հունվար ամիսներին։

Կառավարություն ներկայացված որոշման նախագծում նախարարություններին և պետական կառույցներին տրվել են հանձնարարականներ։

Մասնավորապես՝ գլխավոր դատախազին առաջարկվել է շարունակել զորակոչից խուսափող քաղաքացիների նկատմամբ քրեական հետապնդում հարուցելու, ինչպես նաև այդ բնույթի գործերով հետաքննության և նախաքննության օրինականության նկատմամբ հսկողություն իրականացնելու ուղղությամբ աշխատանքների կազմակերպումը։

Նախարարություններին, պետական կառավարման այլ մարմիններին և կազմակերպություններին հանձնարարվել է հայտարարված զորակոչին զինվորական կոմիսարիատ չներկայացած կամ քրեական պատասխանատվության կանչված, հետախուզման մեջ գտնվող զորակոչիկների ցուցակները ստանալուց հետո նրանց նկատմամբ կիրառել աշխատանքային, տնտեսական ու այլ ոլորտներում օրենսդրությամբ նախատեսված սահմանափակումներ և գտնվելու վայրի մասին անհապաղ իրազեկել իրավասու պետական մարմիններին։

Ոստիկանապետին հանձնարարվել է ապահովել զորակոչիկների անվտանգ փոխադրումը և հասարակական կարգի պահպանումը հանրապետության զորակոչային տեղամասեր, զորակոչից խուսափող զորակոչիկներին որոնել Հայաստանի և դրանից դուրս տարածքներում, ինչպես նաև զորակոչի ընթացքում զորակոչիկներին Երևանի սահմաններից դուրս փոխադրող ավտոբուսներն ուղեկցելու համար հանրապետական հավաքակայանին կցել ճանապարհային ոստիկանության անձնակազմ: