Երևանի Շենգավիթ վարչական շրջանի ընդհանուր իրավասության դատարանում դատավոր Իշխան Բարսեղյանի վերաբերյալ գործի քննության ժամանակ նույն գործով ամբաստանյալ, փաստաբան Էլզա Զաքարյանը հայտարարեց, որ Իշխան Բարսեղյանը 1000 ԱՄՆ դոլար գումարի դիմաց խոստացել է քաղաքացի Նորիկ Հակոբյանի օգտին լուծել վերջինիս բնակարանային վեճի վերաբերյալ գործը:

Հիշեցնենք, որ Իշխան Բարսեղյանը ձերբակալվել է 2016-ի հոկտեմբերին 27-ին՝ Ազգային անվտանգության ծառայության կողմից իրականացված օպերատիվ-հետախուզական միջոցառումների արդյունքում՝ ենթադրյալ կաշառք ստանալու պահին: Բարսեղյանն աշխատում էր Երևանի Շենգավիթ վարչական շրջանի ընդհանուր իրավասության դատարանում: Ըստ մեղադրանքի՝ քաղաքացիական գործով կողմերից մեկի օգտին որոշում կայացնելու համար դատավորը պահանջել և Երևանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար: Փաստաբան Էլզա Զաքարյանն էլ նույն գործի շրջանակներում մեղադրվում է կաշառքի միջնորդություն կատարելու մեջ:

Դատարանն այս գործով անցել է ամբաստանյալների հարցաքննությանը:

Այսօր ցուցմունք տված Զաքարյանը հայտնեց, որ ԱԱԾ-ում Իշխան Բարսեղյանի դեմ հաղորդում տված Նորիկ Հակոբյանին նախկինում իրավական օգնություն է ցույց տվել: Իշխան Բարսեղյանի վարույթում քննվող գործով ևս Հակոբյանը դիմել է նրան, սակայն Էլզա Զաքարյանն այդ ժամանակահատվածում հղի է եղել և փաստաբանական գործունեությամբ զբաղվելիս չի եղել:

Զաքարյան առաջարկել է, որպեսզի Նորիկ Հակոբյանը դիմի փաստաբան Կիմա Սարյանին, ում հետ ինքը՝ Զաքարյանը, մտերիմ հարաբերություններ ունի:

Էլզա Զաքարյանը պատմեց նաև, որ դատավոր Իշխան Բարսեղյանն իրեն 2000 ԱՄՆ դոլար գումար է պարտք եղել, որը չի վերադարձրել, և ինքը որոշել է գումարի պահանջի վերաբերյալ հայց ներկայացնել նրա դեմ: Այս գործով Էլզա Զաքարյանը ևս դիմել է Կիմա Սարյանին:

Նույն հարցով Զաքարյանը Շենգավիթի դատարանում հանդիպել ու խոսել է Իշխան Բարսեղյանի հետ: Մինչ Բարսեղյանի հետ հանդիպելը Կիմա Սարյանն, ըստ Էլզա Զաքարյանի ցուցմունքի, իրեն ասել է, որ Նորիկ Հակոբյանի գործի հետ կապված ինչ-որ խնդիր կա, որ Նորիկն ուզում է հանդիպել Իշխան Բարսեղյանին:

«Ասացի, որ իմ հարցով ես գնալու եմ Բարսեղյանին տեսնելու, եթե կուզի, թող ինձ հետ գա»,- դատարանին պատմեց Զաքարյանն ու նշեց, որ ինքը Նորիկ Հակոբյանի հետ եկել է  Շենգավիթի դատարան, կարգադրիչներից հարցրել՝ դատավոր Իշխան Բարսեղյանի մոտ նիստ կա՞, թե՞ չէ, ասում են, որ տեղյակ չեն, ապա ինքը  տեսել է, որ Բարսեղյանի դահլիճի դուռը բացվում է, մտել է  դահլիճ, որտեղ շատ մարդիկ են եղել, ապա, երբ Բարսեղյանն ավարտել է այդ անձանց հետ իր գործերը, ինքը դատավորին իր գումարի հարցով մոտեցել է, խոսել են,  Բարսեղյանն ասել է, որ զբաղված է, որ  որոշ խնդիրներ ունի, և դրանով է պայմանավորված նաև այն, որ իր՝ Զաքարյանի հեռախոսազանգերին չի կարողացել պատասխանել:

«Ապա խոսեցինք Նորիկի գործի մասին, ասացի, որ մարդիկ չգիտեն` ինչ փուլում է գործը, չհիշեց, թե ինչ գործի մասին է  խոսքը, հետո պահանջեց գործը, բացեց, ասաց՝ վտարելու ենք»,- պատմեց Էլզա Զաքարյանը:

Նշենք, որ Իշխան Բարսեղյանի վարույթում է եղել այն բնակարանի շուրջ վիճաբանության հարցը, որում բնակվում է Նորիկ Հակոբյանը: Այս գործով առաջին ատյանի դատարանը Հակոբյանի վերաբերյալ վտարման վճիռ է կայացրել, որը Վերաքննիչ դատարանում բեկանվել ու ուղարկվել է նոր քննության: Գործով նոր դատավորը եղել է Իշխան Բարսեղյանը, և Հակոբյանի փաստաբան Կիմա Սարյանը հակընդդեմ հայց է ներկայացրել, որի ընթացքի վերաբերյալ տևական ժամանակ հնարավոր չի եղել դատարանից որևէ տեղեկություն ստանալ:

Երբ Էլզա Զաքարյանն ու Նորիկ Հակոբյանը վերջինիս մեքենայով  դատարանի տարածքում են եղել, զանգել ու այնտեղ են կանչել նաև Կիմա Սարյանին: Վերջինս, Էլզա Զաքարյանի խոսքով, միայն գործի հանգամանքների մասին որոշ մանրամասներ է ասել, ընթացքում պարբերաբար դուրս եկել և վստահորդների հետ հեռախոսով զրուցել:

Զաքարյանի խոսքով՝ Նորիկն իրեն խնդրել է մեկ անգամ ևս գնալ դատավորի մոտ ու հասկանալ՝ ինչ է վերջինիս ուզածը, արդոք պե՞տք է հայցում ինչ-որ բան փոխել:

«Բարսեղյանը հարցրեց` ի՞նչ ձևի մարդ ա, ասացի` խեղճ մարդ ա, հարցրեց՝  ինչի՞ հնարավորություն ունի, ասացի` ոչ մի բանի, ասաց 1000 դոլար թող բերի, կանեմ,  հակընդդեմ հայցը վարույթ կընդունեմ, հետո կբավարարեմ»,- պատմեց Էլզա Զաքարյանը՝ նշելով նաև, որ Բարսեղյանը հենց նույն օրն է պահանջել գումարը:

Այս մասին Զաքարյանն ասել է Նորիկ Հակոբյանին, և վերջինս պատասխանել է, որ չունի նման գումար, ապա նշել, թե ստիպված է դիմել իր մի ընկերոջ, ով այս հարցերում առաջարկել է իր օգնությունը:

«Հետո Նորիկն  ասաց, որ գնամ և ասեմ, որ համաձայն է: Ապա ցանկանում էր, որ ես ինչ-որ բան ևս ասեմ Բարսեղյանին,  բայց չարեցի ու ասացի, որ ինձ տուն տանի»,- պատմեց Զաքարյանն ու նշեց, որ տուն գնալուց հետո զանգահարել է Բարսեղյանին, ապա Նորիկ Հակոբյանն է իրեն զանգել ու ասել, որ գումարն արդեն կա, ինչի մասին Զաքարյանը տեղյալ է պահել Բարսեղյանին:

«Իրենք անպայման ցանկանում էին, որ ես էլ լինեմ մեջը, ես ասացի, որ չեմ կարող:

Բարսեղյանն ասաց՝  դե լավ, որ չես գալիս, թող գա «Հայրենիք» կինոթատրոնի մոտ: Դրանից հետո ես զանգեցի Նորիկին, որ տեսնեմ՝ ինչ եղավ, ասաց, որ գումարը տվել է, հարցրի՝ գործից խոսե՞լ եք, ասաց, որ խոսել են: Դրանից հետո Էլզա Զաքարյանին զանգել ու կանչել են հարցաքննության»:

Նշենք, որ ենթադրյալ կաշառքը ստանալուց անմիջապես հետո Իշխան Բարսեղյանը ձերբակալվել է:

Զաքարյանը նշեց նաև, որ այն ժամանակ, երբ ինքը Նորիկ Հակոբյանին ասել է դատավորի՝ 1000 դոլար գումար պահանջելու մասին, Կիմա Սարյանը Նորիկ Հակոբյանի մեքենայի մեջ չի եղել, այդ մասին չի իմացել:

Զաքարյանը նշեց նաև, որ ինքը Բարսեղյանին հարցրել է՝ եթե Նորիկը գումարը տա, ինքը կստանա՞ այն գումարը, որը Բարսեղյանը պարտք է իրեն, և վերջինս, ըստ Էլզա Զաքարյանի ցուցմունքի, ասել է, որ չի ստանա, որ այդ գումարն այս գումարի հետ կապ չունի:

«Ասաց՝ այս գումարից կարող եմ 100 դոլար տալ, որն իմ մեջ ծիծաղ առաջացրեց»,- ասաց Էլզա Զաքարյանը:

Զաքարյանի պաշտպան Տիգրան Աթանոսյանը հարցրեց, թե արդյոք դատավոր Բարսեղյանի և իր՝ Զաքարյանի միջև որևէ պայմանավորվածություն եղե՞լ է, թե ով պիտի վերցնի գումարը, ով պիտի տա և այլն, ու Զաքարյանն ի պատասխան նշեց, որ նման որևէ պայմանավորվածություն չի եղել, ավելին, ինքը մինչև վերջ համոզված է եղել, որ Նորիկը չի վճարելու:

Երբ Զաքարյանի պաշտպաններն ավարտեցին իրենց պաշտպանյալին ուղղված հարցերը, Իշխան Բարսեղյանի պաշտպանները  հարցեր  ուղղելու համար ժամանակ խնդրեցին՝ նշելով, որ քանի որ իրենց համար անսպասելի էր, որ Զաքարյանը նման ցուցմունք  կտա և կհայտնի այնպիսի տեղեկություններ, որոնց մասին նախաքննության ընթացքում չի հայտնել, իրենք պետք է նախապատրաստվեն հարցերին: Զաքարյանը հայտարարեց, որ Իշխան Բարսեղյանի պաշտպանների հարցերին չի պատասխանելու:

Հաշվի առնելով, որ Բարսեղյանի պաշտպանները Զաքարյանին հարցեր տալու իրավունք ունեն, եթե անգամ դրանց վերաբերյալ պատասխաններ չեն հնչելու, դատավորը ժամանակ տրամադրեց՝ պատրաստվելու համար:

Հաջորդ դատական նիստը նշանակվեց նոյեմբերի 30-ին: