Շաբաթ, 25 նոյեմբերի

Պաշտպան Ա. Պապիկյան. «Փաստորեն, 2 ինքնաձիգ էր պակասում զանգվածային անկարգություն ծրագրելու համար»



A4 չափի թուղթ՝ վրան գրված նախագիծ, վանդակավոր տետրի թուղթ՝ հեռախոսահամարներով, ցուցակ, 58 անձանց անուններով դիմումներ՝ «Շուշիի առանձնակի գումարտակ» ՀԿ-ին անդամագրվելու համար, քաղաքացիական անհնազանդության կոչեր, տեսանյութեր, որտեղ «Հիմնադիր խորհրդարանի» անդամներից Գարեգին Չուգասզյանը խոսում է Վոլոդյա Ավետիսյանի, Շանթ Հարությունյանի և մյուսների, Վարդան Պետրոսյանի դատավարությունների մասին, «Սիրելի հայրենակիցներ» արտահայտությամբ սկսվող թռուցիկներ. արդեն 3-րդ նիստն է «Ժիրայր Սեֆիլյանի և մյուսների» գործով դատախազները հերթով ընթերցում են մեղադրանքի կողմի ապացույցները: Եվ այսպես՝ 32 հատոր:

Հիշեցնենք, որ Շուշիի առանձնակի գումարտակի հրամանատար Ժիրայր Սեֆիլյանն ու ևս 6 անձինք մեղադրվում են մի խումբ անձանցով, նախնական համաձայնությամբ, զանգվածային անկարգություններ կազմակերպելու նախապատրաստման մեջ: Ըստ մեղադրանքի` դա պետք է ուղեկցվեր շենք-շինությունների զավթմամբ, իշխանության ներկայացուցիչներին դիմադրություն ցույց տալով: Եվ այս ամենը, ըստ մեղադրանքի, պետք է կատարվեր 2 ինքնաձիգով ու 120 փամփուշտներով: Պաշտպան Արայիկ Պապիկյանի դիտարկմամբ, «փաստորեն, 2 ինքնաձիգ էր պակասում զանգվածային անկարգություն ծրագրելու համար»։

Սակայն, պաշտպանական կողմը նկատում է՝ մեղադրանքը շինծու է, նպատակը՝ քաղաքական ընդդիմադիր ուժի մեկուսացումը քաղաքական գործունեության դաշտից:

Դատավոր Տաթեւիկ Գրիգորյանը

Ապացույցների հետազոտման ընթացքում այսօր հաճախ հնչում էր ամբաստանյալներից Հովհաննես Պետրոսյանի անունը: Օրինակ՝ գաղտնալսվել էին հենց Հովհաննես Պետրոսյանի և Սմբատ Գալոյանի զրույցները։ Ըստ այդ զրույցների, պետք է գրավեին հեռուստաաշտարակը, «արտիլերիա պիտի աշխատեր», «միլիցեքի կեսը պիտի անցներ ժողովրդի կողմը», «ստուդիայից պիտի խփեին»։ «Եվ այս ամենը, ըստ մեղադրանքի, պիտի կատարվեր հայտնաբերված 2 ինքնաձիգո՞վ»,-հռետորական հարց է տալիս պաշտպաններից Արայիկ Պապիկյանը։

Սմբատ Գալոյանն այն անձն է, որի նկատմամբ նախաքննական մարմինը բարեհաճ է գտնվել։ Մնացած ամբաստանյալները կալանավորված են ավելի քան մեկուկես տարի, իսկ նրա նկատմամբ կիրառվել է ստորագրություն չհեռանալու մասին խափանման միջոցը։

Հիշեցնենք՝ 2016 թ. մայիսի 20-ին Ծիծեռնակաբերդի խճուղում Հովհաննես Պետրոսյանի ու Հրայր Թոփչյանի մասնակցությամբ տեղի ունեցած վթարից հետո ոստիկանները ավտոմեքենայից հայտնաբերել էին ԱԿ-74 տեսակի երկու ինքնաձիգ՝ 120 փամփուշտներով:

«Հետքի» հետ զրույցում Ներսես Պողոսյանի պաշտպան Արայիկ Պապիկյանը կասկած հայտնեց, որ Սմբատ Գալոյանը գործակալ է, «իսկ ԱԱԾ-ն իր գործակալներին չի դավաճանում»։ Ըստ պաշտպանի` դա է, թերևս, պատճառը, որ Սմբատ Գալոյանն ազատության մեջ է։

Պաշտպան Պապիկյանը նաև ուշադրություն հրավիրեց այն հանգամանքին, որ քննիչը 13 հեռախոսահամարի վերծանումներ է ստացել, բայց ցանկում ներկայացվել է 16 հեռախոսահամար։

Այսօրվա նիստում 3 րոպեով դատական նիստին մասնակցեց նաև «Հիմնադիր խորհրդարանի» անդամներից Գևորգ Սաֆարյանը։ Նախորդ նիստին նա հեռացվել էր 4 ժամով, այս նիստին ևս հեռացվեց 4 ժամով։ Պատճառը նույնն է՝ Գևորգ Սաֆարյանը նստած է դիմում դատավոր Տաթևիկ Գրիգորյանին։ Այս անգամ նա պահանջում էր ապահովել իր պաշտպանի ներկայությունը. «Ինձ կանչում եք նիստին, իսկ ինչո՞ւ չեք ապահովում պաշտպանիս ներկայությունը»։


Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ