HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սոնա Ավագյան

Ռիչարդ Կիրակոսյան. «Օլիգարխները դարձել են այնքան հզոր, որ այժմ իրենք իրենցով վտանգում են պետությունը»

Հայաստանի ներքաղաքական կյանքում կոնֆլիկտը այլևս ընդդիմության և իշխանության միջև չէ, ինչն ավանդաբար էր: Այժմ այս կոնֆլիկտն ավելի շատ իշխող քաղաքական վերնախավի ներսում է՝ Հանրապետական և «Բարգավաճ Հայաստան» կուսակցություններ միջև: Այսօրվա մամուլի ասուլիսում այսպիսի կարծիք հայտնեց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը: ««Բարգավաճ Հայաստանը» դեռևս հակահարված չի հասցրել Հանրապետական կուսակցությանը»,- հավելեց նա:

Լրագրողներից մեկը նշեց, որ ըստ որոշ փորձագետների վերլուծությունների՝ այս կոնֆլիկտը երկու կուսակցության խաղն է, որի նպատակն է ցույց տալ, թե ԲՀԿ-ն ընդդիմադիր ուժ է և դրանով խաբել ժողովրդին: Եթե նույնիսկ նման կոնֆլիկտ կա, ԲՀԿ-ն ռեսուրս ունի՞՝ «Հանրապետականին հակահարված հասցնելու» համար:

Ռիչարդ Կիրակոսյանը պատասխանեց. «Իմ անձնական կարծիքով՝ սա բնական կոնֆլիկտ է և բնական հակամարտություն: Մենք տեսնում ենք նաև, որ, օրինակ, Իջևանում տեղի ունեցած ընտրություններում հանրապետական քաղաքապետը պարտություն կրեց «Բարգավաճ Հայաստանի» թեկնածուից: Սա իրականում ուղերձ էր Հանրապետական կուսակցությանը, որ վտանգավոր է լինել չափազանց շատ ինքնավստահ, նաև թերագնահատել մրցակցին»:

Բանախոսը տեսնում է ՀՀԿ-ի կողմից լուրջ քայլեր՝ ուղղված ԲՀԿ-ին, որը դեռևս պատասխան քայլեր չի անում: Սակայն դեռևս պարզ չէ, թե ԲՀԿ-ն ինչ կարող է անել: Ռիչարդ Կիրակոսյանին թվում է, թե ԲՀԿ-ն մշակում է ռազմավարություն, որը կբացահայտի իրական կոնֆլիկտը, «որքան մոտենանք ընտրություններին, հատկապես երբ պարզ է դառնում, որ Հայ ազգային կոնգրեսը կմտնի քաղաքական համակարգ և խորհրդարան»:

Ռիչարդ Կիրակոսյանի խոսքերով՝ ՀԱԿ-ի՝ ԲՀԿ-ին արած համագործակցելու առաջարկը շատ անակնկալ էր: Զուտ քաղաքական վերլուծության առումով առաջարկ կարելի է անել պարզապես առաջարկ անելու և ոչ թե իրականում համագործակցելու համար: Դա նաև ցույց է տալիս Հայաստանի քաղաքականության մեջ եղած ավելի խորը պրոբլեմը. երկխոսությունը ավելի շատ ոչ թե քաղաքականությունների վերաբերյալ է, այլ անձերի հակամարտություն է:

«Դա նաև ցույց է տալիս, որ Հայաստանի քաղաքականության բարդ բնույթը փոխվում է ամեն օր՝ լինի դա, օրինակ, Դաշնակցության և «Բարգավաճ Հայաստանի» պոտենցիալ համագործակցությունը, կամ երբ նայում ենք «Բարգավաճ Հայաստանի» և Հանրապետական կուսակցության կոնֆլիկտից շահող մեկ այլ երրորդ կողմին. մի պատահական հաղթող, որն արժանի չէ դրան, «Օրինաց երկիրն» է՝ Արթուր Բաղդասարյանի կուսակցությունը»,- ասաց Ռիչարդ Կիրակոսյանը:

Բանախոսը քիչ հավանական համարեց, որ «Բարգավաճ Հայաստանը» կարողանա մեծամասնություն կազմել ապագա խորհրդարանում: Նրա խոսքերով՝ այս խորհրդարանական ընտրությունները լուրջ փորձություն են Հայաստանի կառավարության համար: Հայաստանի նախագահն ու վարչապետն անձամբ խոստացել են, որ այս ընտրությունները կլինեն շատ ավելի լավը, եթե ոչ Հայաստանի լավագույն ընտրությունները:

«Սա նշանակում է, որ եթե տեղի ունենան ազատ և արդար ընտրություններ, դժվար կլինի այսքան շուտ կանխատեսել դրանց արդյունքը: Սա հավանաբար ամենակարևոր ընտրությունն է, որ Հայաստանը երբևէ ունեցել է: Դա առաջին ընտրությունն է «Մարտի 1» -ից հետո: Խորհրդարանական ընտրությունների արդյունքը կորոշի նաև, թե ինչպիսի Հայաստան մենք կունենանք ապագայում. արդյոք դա կլինի օլիգարխի՞, թե՞ ժողովրդավարի տարի»,- ասաց Ռիչարդ Կիրակոսյանը:

Նրա գնահատմամբ՝ 2011-ին Հայաստանի ներքաղաքական կյանքում ամենակարևոր դրական զարգացումը իշխանություն-ընդդիմություն երկխոսությունն էր: Նախ, Հայաստանը կարիք ունի ավելի շատ երկխոսության՝ ազգային կարևորագույն հարցերի վերաբերյալ: Եվ երկրորդ, յուրաքանչյուր երկրում ակտիվ և ներգրավված ընդդիմությունը դրական է ժողովրդավարության, նաև հենց կառավարության համար:

Բանախոսի կանխատեսմամբ՝ 2012թ.-ին մարտահրավերները կլինեն ավելի մեծ, և առաջնահերթությունները շատ ավելի կապված կլինեն Հայաստանի ներքին կյանքին, քան արտաքին քաղաքականությանը:

Նույնիսկ Հայաստանի պաշտոնական վիճակագրության համաձայն՝ երկրում աղքատությունն աճել է: Ըստ պաշտոնական տվյալների՝ Հայաստանի բնակչության 36 %-ը՝ 1.2 մլն հայ, ապրում է աղքատ: Հայաստանի երեխաների 40 %-ը ապրում է աղքատության մեջ:

«Սա պետք է առաջնահերթ խնդիր լինի ոչ միայն Հայաստանի իշխանությունների, այլև մտահոգության առարկա՝ հայկական սփյուռքի համար: Քանի որ հարստության և ունեցվածքի բևեռացումն աճում է, աղքատության աճը շատ ավելի վիրավորական է դառնում»,- ասաց Ռիչարդ Կիրակոսյանը:

Հայաստանի պետության համար մեկ այլ կարևոր վտանգ է այն, որ օլիգարխները չեն վճարում հարկեր: Բիզնեսի ոլորտում օլիգարխների հետաքրքրությունները կանխում են Հայաստանի տնտեսության մեջ մրցակցությունը և սահմանափակում օտար ներդրումները:

Ռիչարդ Կիրակոսյանի խոսքերով՝ անհանգստության տեղիք է տալիս երկու կոնկրետ օրինակ: Մեկն այն է, որ Գյումրիի քաղաքապետ Վարդան Ղուկասյանը միլիոնավոր դոլարներ արժեցող հյուրանոց է կառուցում Գյումրիում այն դեպքում, երբ քաղաքը դեռևս չի հաղթահարել երկրաշարժի հետևանքները և չի ավարտել շինարարական աշխատանքները:

Երկրորդ օրինակը սփյուռքահայ գործարար, «Նարեկացի» արվեստի միության հիմնադիր Նարեկ Հարթունյանի (Հարությունյանի) կալանավորումն էր: «Մտահոգությունը ոչ թե կոնկրետ նրա գործն է, այլ այն, թե ինչպես է նրա գործն իրականացվել: Սա շատ բացասական հաղորդագրություն է ուղարկում սփյուռքի և աշխարհի ներդրողներին, որ Հայաստանը հարմար տեղ չէ ներդրումներ կատարելու համար»,- ասաց Ռիչարդ Կիրակոսյանը:

Մտահոգությունների տեղիք է տալիս և այն, որ Հայաստանի ՀՆԱ-ի 13%-ը կազմում են արտերկրում աշխատող հայերի դրամական փոխանցումները, և որ կառավարության ընդունած 2012-ի բյուջեն հիմնված է այն կանխատեսման վրա, որ Հայաստանի տնտեսությունը առնվազն 4%-ով կաճի մյուս տարի: Բյուջեն նաև խոստանում է ապահովել 1.1 մլրդ դրամի նոր հարկեր:

«Այսպիսի նոր հարկեր գանձելու միակ ճանապարհն է մարտահրավեր նետել օլիգարխներին: Այս առումով սա քաղաքական կամքի հարց է և Հայաստանի կառավարության համար իրական մարտահրավեր կլինի: Դեռևս պարզ չէ, թե ով կհաղթի՝ օլիգարխնե՞րը, թե՞ կառավարությունը: Օլիգարխները դարձել են այնքան հզոր և այնքան են ներգրավվել համակարգի մեջ, որ այժմ իրենք իրենցով վտանգում են պետությունը»,- ասաց Ռիչարդ Կիրակոսյանը:

Մեկնաբանություններ (2)

narine
veradarzir miasin payqarenq.drsiz komentner mi ara.ari ev orinak cuyc tur.
Վարազ Սյունի (Ամստերդամ)
Իսկ ԻՆՉՈՒ պիտի Հայաստանում աղքատությունը հայկական սփյուռքի համար էլ մտահոգության առարկա լինի?՝ ՄԻՆՉԵՎ ԵՐԲ? Այսօր մեկին օգնես,վաղը մի ուրիշն է հայտնվում,մյուս օրը- մի ուրիշր: ԱՆՀԱՏԱԿ ՏԱԿԱՌ է: Հենց այդ ԴՐՍԻՑ ուղարկած փողերն են հնարավորություն տվել օլիգարխային իշխանություններին ԱՅԴՔԱՆ ԵՐԿԱՐ մնալ իրենց աթոռներին ու ԱՅԴՔԱՆ ՀՂԲԱՆԱԼ-այլապես մարդիկ որ ԻՐՈՔ ՍՈՎԱԾ մնային, գազազած դրանց ՎԱՂՈՒՑ արդեն ԴՈՒՐՍ ՎՌՆԴԱԾ կլինեին:....................... Սոված ես? երեխադ սոված է?- ուպս, բախտդ չբերեց: Հերիք ԱՆԳՅԱԼ ՍՏՐՈՒԿ խաղաս-վեր կաց ու ՊԱՅՔԱՐԻՐ քեզ հասանելիք հացի համար:....................... ԻՆՉՈՒ պիտի ես ԻՄ ՀԱՑԸ ԱՆԸՆԴՀԱՏ տամ քեզ:Ինչի դու ԱՆԳՅԱԼ ես? Դու ինձ ՔՈ հացը տվել/տալիս/տալու ես?

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter