Հայաստանի և Տաջիկստանի Հանրապետությունների քաղաքացիներն այսուհետ արտերկիր մեկնելու համար վավեր փաստաթղթերի հիման վրա կարող են մուտք գործել, տարանցմամբ անցնել, դուրս գալ կամ գտնվել մյուս կողմի պետության տարածքում անընդմեջ կամ մի քանի այցելությամբ՝ 6 ամսվա ընթացքում 90 օրը չգերազանցող ժամկետով։

Նման որոշում կայացվեց Կառավարության այսօրվա նիստում։ Նախագծի հիմնավորման մեջ նշվում է, որ համաձայնագիրը վավերացվում է երկու պետությունների միջև բարեկամական հարաբերությունների հետագա զարգացման նպատակով։

Ինչ վերաբերում է փաստաթղթերին, ապա ՀՀ քաղաքացիների համար դրանք են՝

-Կենսաչափական կողմնորոշիչներ պարունակող դիվանագիտական անձնագիր։

-Հայաստանի Հանրապետության քաղաքացու՝ կենսաչափական կողմնորոշիչներ պարունակող անձնագիր։

-Դիվանագիտական անձնագիր։

-Հայաստանի Հանրապետության քաղաքացու անձնագիր (օտարերկրյա պետություններում վավերականության նշումով)։

-Հայաստանի Հանրապետություն վերադարձի վկայական (միայն Հայաստանի Հանրապետություն վերադարձի համար)։

Տաջիկստանի Հանրապետության քաղաքացիների համար՝

-Տեղեկատվության էլեկտրոնային կրիչ պարունակող դիվանագիտական անձնագիր,

-Տեղեկատվության էլեկտրոնային կրիչ պարունակող ծառայողական անձնագիր,

-Տեղեկատվության էլեկտրոնային կրիչ պարունակող ընդհանուր քաղաքացիական արտասահմանյան անձնագիր։

-1998 թվականի նմուշի դիվանագիտական անձնագիր (մինչև վավերականության ժամկետի ավարտը։

-1998 թվականի նմուշի ծառայողական անձնագիր (մինչև վավերականության ժամկետի ավարտը։

-1998 թվականի նմուշի ընդհանուր քաղաքացիական արտասահմանյան անձնագիր (մինչև վավերականության ժամկետի ավարտը։

-16 տարին չլրացած երեխայի ծննդյան վկայական (ծնողներից մեկի կամ օրինական ներկայացուցչի արտասահմանյան անձնագրում նշում լինելու դեպքում)։

-Տաջիկստանի Հանրապետություն վերադարձի վկայական (միայն Տաջիկստանի Հանրապետություն վերադարձի համար):