Կիրակի, 23 սեպտեմբերի

«Ես անհավասար պայմաններում եմ գտնվում». կաշառք ստանալու մեջ մեղադրվող դատավորը հրաժարվեց ցուցմունք տալ



Երևանի Շենգավիթ վարչական շրջանի ընդհանուր իրավասության դատարանում այսօր կաշառք ստանալու մեջ մեղադրվող դատավոր Իշխան Բարսեղյանը հրաժարվեց ցուցմունք տալ:

«Կարծում եմ և համոզված, որ ես գտնվում եմ անհավասար պայմաններում՝ Դատախազության, Արդարադատության խորհրդի, որքան էլ զավեշտալի է՝ դատարանի, ամբաստանյալ Էլզա Զաքարյանի և նրա պաշտպանների հետ»,- հայտարարեց Բարսեղյանը՝ կարծիք հայտնելով, որ այն, ինչ ինքն ասում է, ակնհայտ իրողություն է:

Դատավորն ընդգծեց, որ այս գործով իր նկատմամբ իրականացված արտաքին և ներքին դիմում օպերատիվ հետախուզական միջոցառումների արդյունքներն առ այսօր իրեն չեն տրամադրվել և նշեց, որ այդ ապացույցներն իրեն տրամադրելուց և դրանք հետազոտելուց հետո միայն ինքը պատրաստ է ցուցմունք տալ:

Նշենք, որ նախորդ դատական նիստին Իշխան Բարսեղյանն ու վերջիններիս պաշտպանները ժամանակ էին խնդրել, որպեսզի Բարսեղյանը պատրաստվի իր ցուցմունքին, սակայն այսօր, փաստորեն, դատավորը հրաժարվեց ցուցմունք տալ:

Բարսեղյանն իր լռելու իրավունքից օգտվեց և հրաժարվեց նաև կողմերի, այդ թվում՝ դատավորի հարցերին պատասխանել: Այնուամենայնիվ, մեղադրող կողմը որոշ հարցեր տվեց ամբաստանյալ դատավորին:

Մեղադրող Կարեն Բիշարյանը, մասնավորապես, ցանկանում էր ճշտել, թե ինչո՞ւ դատավորն այս գործով ԱԱԾ-ի հետ համագործակցած Նորիկ Հակոբյանի հակընդդեմ հայցի վերաբերյալ օրենքով սահմանված կարգով որոշում չի կայացրել, թե արդյոք նման վարքագիծ է դրսևորել, քանի որ գումարային ակնկալի՞ք է ունեցել, մեջբերումներ էր անում ամբաստանյալ Էլզա Զաքարյանի ցուցմունքից և փորձում դրանց շուրջ ձևակերպել իր հարցերը:

Նշենք, որ Նորիկ Հակոբյանն այն անձն է, ում օգտին վճիռ կայացնելու համար, ըստ գործի նյութերի, դատավոր Իշխան Բարսեղյանը 1000 դոլար կաշառք է պահանջել: Այս պահանջից հետո, ըստ գործի նյութերի, Հակոբյանը համագործակցել է ԱԱԾ-ի հետ, որի արդյունքում Իշխան Բարսեղյանը ձերբակալվել, ապա կալանավորվել է:

Նշենք, որ մեղադրողի հարցերի ընթացքում Իշխան Բարսեղյանի պաշտպանները պահանջեցին հարցերի ձևակերպումներով չխախտել Բարսեղյանի անմեղության կանխավարկածը, սակայն դատավորը, ինչպես նաև մեղադրող Կարեն Բիշարյանը պատասխանեցին, թե հարցերը մեղադրանքի շրջանակներում են:

Այսօրվա դատական նիստին գործով մյուս ամբաստանյալ, փաստաբան Էլզա Զաքարյանի պաշտպան Տիգրան Աթանեսյանը միջնորդեց Զաքարյանի նկատմամբ քրեական հետապնդումը դադարեցնել իրադրության փոփոխման հիմքով` նշելով, որ Զաքարյանը չի հանդիսանում հանրային վտանգավոր անձ, ինչպես նաև նշելով այն հանգամանքը, որ իր պաշտպանյալը երեք ամսական երեխա ունի, ում խնամքով մշտապես ինքը՝ Զաքարյանն է զբաղվում:

Դատարանը, սակայն, նշեց, որ միջնորդությանը կանդրադառնա վերջնական դատական ակտ կայացնելիս` խորհրդակցական սենյակում:

Նշենք, որ Էլզա Զաքարյանը մեղադրվում է կաշառքի միջնորդություն կատարելու մեջ: Վերջինս դատարանում ընդունել է իրեն առաջադրված մեղադրանքը, Իշխան Բարսեղյանի դեմ ցուցմունք տվել: Զաքարյանը հրաժարվել է պատասխանել դատավոր Բարսեղյանի և վերջինիս պաշտպանների հարցերին:

Այսօրվա դատական նիստն ավարտվեց: Հաջորդ նիստը նշանակվեց դեկտեմբերի 14-ին:

Հիշեցնենք, որ Իշխան Բարսեղյանը ձերբակալվել է 2016-ի հոկտեմբերի 27-ին՝ Ազգային անվտանգության ծառայության կողմից իրականացված օպերատիվ-հետախուզական միջոցառումների արդյունքում՝ ենթադրյալ կաշառք ստանալու պահին: Բարսեղյանն աշխատում էր Երևանի Շենգավիթ վարչական շրջանի ընդհանուր իրավասության դատարանում:

 


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ