Պետական պարտքը հոկտեմբերին 11 միլիոն դոլարով նվազել է
Այս տարվա հոկտեմբերի վերջի դրությամբ Հայաստանի պետական պարտքը կազմել է մոտ 6.297 մլրդ ԱՄՆ դոլար։
Սեպտեմբերի համեմատ՝ այն 11.326 մլն դոլարով նվազել է։ Իսկ տարեսկզբի համեմատ՝ պարտքն աճել է ավելի քան 354 մլն դոլարով կամ մոտ 6%-ով։ Այս մասին տեղեկանում ենք Ազգային վիճակագրական ծառայության (ՀՀ ԱՎԾ) հրապարակումից։
Ընդհանուր պարտքի կազմում 5.053 մլրդ դոլարն արտաքին պարտքն է, որը մեկ ամսում նվազել է 14.847 մլն դոլարով։
Իսկ ներքին պարտքը հոկտեմբերի վերջի դրությամբ մոտ 1.243 մլրդ դոլար է։ Սեպտեմբերի համեմատ՝ այն աճել է 3.521 մլն դոլարով։ Ներքին պարտքը հիմնականում ռեզիդենտների կողմից ձեռք բերված պետական պարտատոմսերն են։
Ֆինանսների նախարարության տրամադրած եռամսյակային վիճակագրությունից տեղեկանում ենք, որ երրորդ եռամսյակի վերջի՝ սեպտեմբերի 30-ի դրությամբ, Հայաստանի արտաքին պարտքի ամենամեծ մասնաբաժինը՝ 35%-ը, Համաշխարհային բանկին ունեցած պարտքն է։ Այստեղ 22.3%-ը Զարգացման միջազգային ընկերակցությանն ունեցած պարտքն է, իսկ 13%-ը՝ Վերակառուցման և զարգացման միջազգային բանկինը։
Խոշոր պարտատերերի շարքում են նաև Ասիական զարգացման բանկը, Արժույթի միջազգային հիմնադրամը։
Մեկնաբանել