HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Պատմամշակութային ժառանգության գիտահետազոտական կենտրոնի սարքավորումները կբարելավվեն

Կառավարության նիստին Մշակույթի նախարար Արմեն Ամիրյանը ներկայացրեց որոշման նախագիծ, որով հաստատվեց Հայաստանի Հանրապետության և Ճապոնիայի կառավարությունների միջև «Պատմամշակութային ժառանգության գիտահետազոտական կենտրոնի՝ հնագիտական գտածոների վերականգնման և պահպանման համար սարքավորումների բարելավման» դրամաշնորհային ծրագիրը:

«Գիտահետազոտական կենտրոնի կարևոր գործառույթներից է վտանգված և վերականգնվող հուշարձանների պեղումները, որոնց արդյունքում հայտնաբերվել են հրատապ վերականգնման կարիք ունեցող հարյուր հազարավոր հնագիտական արժեքներ։ Մշակույթի նախարարությունը նախաձեռնել է ճապոնական դրամաշնորհի միջոցով նորագույն սարքավորումներով համալրել կենտրոնի հնագիտական լաբորատորիան»,- ասաց նախարարը։

Ամիրյանի խոսքով՝ ճապոնացի փորձագետները եղել են Հայաստանում և ուսումնասիրել խնդիրը․ «Նախապես հաստատված 250 հազար դոլարի փոխարեն առաջարկել են 650 հազար դոլարի դրամաշնորհ սահմանել։ Ճապոնական կողմը պետք է այդ գումարով գնի ճապոնական և եվրոպական արտադրության նորագույն սարքավորումներ և անհատույց տրամադրի կենտրոնին։ Վերազինումից հետո կենտրոնի լաբորատորիան կդառնա տարածաշրջանում լավագույնը, որի ծառայություններից կարող են օգտվել և՛ հարևան երկրների արշավախմբերը, և՛ թանգարանները»,- նկատեց Արմեն Ամիրյանը։

Վարչապետը հանձնարարեց հետագայում ներկայացնել կատարված աշխատանքները և հայտնաբերված հնագիտական արժեքները: «Որ տեսնենք ինչքանով ենք կարողանում մեր քաղաքացուն, զբոսաշրջիկին ծանոթացնել, թե չէ մեկ-մեկ ինձ մոտ տպավորություն է, որ ինքնանպատակ է»,- ասաց Կարեն Կարապետյանը։

Արմեն Ամիրյանն արձագանքեց, որ հայտնաբերված գտածոները վերջնական տեսքի բերելու և աշխարհին ներկայացնելու համար անհրաժեշտ է այդ լաբորատորիան, ինչն էլ կլինի խթանող քայլ։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter