Երկուշաբթի, 23 հուլիսի

«Ախթալա ԼՀԿ»-ի արտադրական պոչերի արտանետումները շարունակվում են



Բնապահպանության նախարարության տեղեկատվության և հասարակայնության հետ կապերի վարչության պետ Արմեն Վարդանյանն այսօր հայտնեց, որ «Հետքի» «Տնօրեն Լյովա Վարդանյանը թաքցնում է «Ախթալայի ԼՀԿ»-ի  արտադրական պոչերը Դեբեդ գետ լցնելու պատճառները» հոդվածի փաստերով ԼՀԿ-ում վարչական վարույթ է իրականացվելու Բնապահպանության նախարարության բնապահպանության և ընդերքի տեսչական մարմնի կողմից: Տեսչության Լոռու տարածքային բաժնի ավագ պետական տեսուչ Ա. Ղարագյոզյանն էլ բացատրեց, որ վարչական վարույթն իրականացնելիս պետք է ուսումնասիրվի ԼՀԿ-ի բնապահպանական ամբողջ խնդիրները:

Մինչ այս վարույթը սկսելը երեկ՝ դեկտեմբերի 25-ին, Ախթալայի Երկաթուղայինների փողոցի բնակիչ Աշոտ Ամիրջանյանի կինը՝ Անուշ Ամիրջանյանը, հայտնեց, որ հոդվածից հետո ԼՀԿ-ն իրենց տան առջևով անցնող հեղեղատարով ցերեկը արտադրական պոչեր Դեբեդ գետ չի ուղղում, սակայն երեկոյան, մութն ընկնելուն պես հեղեղատարում պոչերի հոսքերը նորից շարունակվում են:

«Ամեն օր մարդիկ են գալիս պոչամբարից նմուշներ վերցնում, սակայն ոչինչ չի փոխվում, մեր երեխաների առողջությունը շարունակվում է վտանգվել»,- ասում է Անուշը:

Երեկ դեպի Մեծ Այրում գնացող ճանապարհի առաջին շրջադարձի վրա գտնվող վթարային փոքր պոչամբարի վրա տեղադրված խողովակից հեղեղատար մտնող պոչերի` մեր նախորդ այցի ժամանակ լուսանկարած խողովակը հանված էր: Դրա փոխարեն նոր, ավելի հաստափոր խողովակ էր տեղադրված հեղեղատարի մեջ:

Ախթալայում «հին» հանքափորներից մեկը պատմեց, որ Մեծ Այրում գնացող ճանապարհի առաջին շրջադարձի վրա գտնվող հեղեղատարը Ալավերդու նախկին լեռնամետալուրգիական կոմբինատի կողմից կառուցվել է 1960-1970-ական թվականներին՝ ճանապարհի նույն հատվածի բարձրադիր տեղանքում գտնվող, այն ժամանակ լեռնամետալուրգիական կոմբինատին պատկանող «Պայթուցիկ նյութեր» պոչամբարը լեռնային աղբյուրների ջրերից և անձրևաջրերից պաշտպանելու համար: Հիշեցնենք, որ 2007-2008 թվականներին ԼՀԿ-ի նախկին սեփականատեր Սերոբ Տեր-Պողոսյանի ժամանակ «Պայթուցիկ նյութեր» պոչամբարը դատարկվել և շուրջ 95 000 խմ պոչեր է կուտակվել ճանապարհաեզրի նույն հատվածում՝ հեղեղատարի կողքին:

Այդ պոչերը այսօր անարգել տարածվում են անձրևաջրերի միջոցով: «Հետքը» մի քանի անգամ ահազանգել է նաև այդ պոչերի վտանգների մասին: Նկատեցինք, որ դեկտեմբերի 22-ի հրապարակումից հետո ԼՀԿ-ի տնօրինության կողմից հսկողության տակ է վերցրված Նահատակի պոչամբարը: Մինչ հոդվածը մենք բազմաթիվ անգամ եղել ենք Նահատակի պոչամբարում, և որևէ մեկը չի կաշկանդել այնտեղ մեր աշխատանքը: Երեկ պոչամբարի ճանապարհամերձ լանջից պոչամբարը նկարելիս, մեկ այլ աշխատակցի հետ մեզ մոտ հայտնվեց ԼՀԿ-ի անվտանգության ծառայության պետի տեղակալ Անդրանիկ Կիրակոսյանը: Վերջինս նախ ցուցադրաբար դիտողություն արեց պոչամբարի աշխատողներին՝ մեր աշխատանքը չխոչընդոտելու համար: Ապա դառնալով ինձ՝ ասաց. «Մենք շուրջ 2 հազար մարդ ենք կերակրում: Ինչո՞ւ չեք այդ մասին հիշում»:

Ախթալայի ԼՀԿ –ում այս պահին աշխատում է 450 աշխատող: Հիշեցնենք, որ այս տարվա մարտի 19-ին «Արմենիան Քափըր Փրոգրամ» ընկերությանը պատկանող Ալավերդիում 600 աշխատատեղ ապահովող պղնձաձուլական գործարանի արտանետումների վերեբերյալ «Հետքի» հարցին, թե ինչու ալավերդցիները պետք է գոյատևման փող աշխատեն իրենց և ամբողջ բնակչության կյանքի գնով, Աժ  ընտրությունների շրջանակներում Ալավերդի ժամանած վարչապետ Կարեն Կարապետյանը պատասխանել է. «Դուք շատ ճիշտ եք, որ մենք մեր ներքին բարոյականությանը հաշվետվություն տալու խնդիր ունենք: Էսօր աշխատատեղ ենք ստեղծում, որպեսզի ժողովրդի սոցիալական վիճակը բարելավվի, բայց, եթե մի մեծ ռումբ ենք դնում վաղվա սերնդի առջև, մենք դրա հետ ո՞նց ենք համերաշխ ապրելու»:

Ախթալայի լեռնահարստացման կոմբինատի ոչ միայն ցածր պաշտոնյաները, նաև սեփականատեր Մաքսիմ Հակոբյանն է քաջատեղյակ շրջակա միջավայրին և բնակչության առողջությանը հասցված իրենց արտադրության արտանետումների ծանր հետևանքների մասին։

Բերնեբերան լցված «Նահատակի» պոչամբարում այլևս անհնարին է պոչանքներ կուտակելը: Իսկ ԼՀԿ-ն առայժմ իր արտադրական պոչերը, բացի Դեբեդ գետ լցնելը, այլ տեղ չունի: Այս տեսակետից իրականացվելիք վարչական վարույթը պետք է դիտել ձևական միջոցառում ՝ ժամանակ շահելու և ԼՀԿ-ի բնապահպանական ապօրինությունների նկատմամբ նախարարության կողմից հետևողականության պատրանք ստեղծելու համար: Այսուհանդերձ, բնապահպանական էլ ի՞նչ աղետներ են սպասվում ախթալեցիներին: Այդ մասին կառավարությունում լռում են: Ախթալայի  բնապահպանական աղետալի վիճակի մասին շարունակում է լռել Ախթալա խոշորացված համայնքի նորընտիր ղեկավար Արկադի Թամազյանը: Ոչ ոք իր պարտքը չի համարում Մաքսիմ Հակոբյանից պահանջել ԼՀԿ-ն նոր տեխնոլոգիաներով վերազինելու ներդրումներ:


Գլխավոր էջ



Մեկնաբանություններ (1)
1. Լուսինե20:19 - 26 դեկտեմբերի, 2017
Արկադի Թամազյանը շարունակում է այն ինչ անում էր Ճոճկանում գյուղապետ եղած ժամանակ՝աչք փակել պոչամբարների հետ կապված,ակնկալելքվ որ կոմբինատը իրեն լավ կնայի։Ջհանդամը թե համայնքի բնակչին ինչ կլինի
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ