Երևան-Արտաշատ ճանապարհի 8 կամուրջների և ուղեանցերի շինարարությունն ավարտվել է
«Հյուսիս-հարավ» մայրուղու Երևան-Արտաշատ հատվածում 2016 թ. սեպտեմբերին մեկնարկած 8 կամուրջների և ուղեանցերի կառուցման ու հիմնանորոգման աշխատանքներն ավարտվել են պայմանագրով նախատեսված ժամկետում։ Այս մասին տեղեկացնում է տրոնսպորտի, կապի և տեղեկատվական տեխնոլոգիաների նախարարությունը:
Այնթապի կամուրջն ամբողջությամբ վերակառուցվել է, ափային հենարանների հիմքերի վրա կառուցվել է նորը։
Նախարար Վահան Մարտիրոսյանը աշխատանքային շրջայց է կատարել, ծանոթացել կատարված աշխատանքներին։ Մասիս-Այնթապ համայնքները կապող կամրջային հանգույցում նա մեկուսացման որոշակի թերություններ է նկատել և հանձնարարել շտկել դրանք։
Մասիս քաղաքը Մարմարաշեն համայնքին կապող կամուրջը նորակառույց է։ Նորակառույց է նաև Բուրաստանի ուղեանցը, որը համայնքի բնակիչների գյուղտեխնիկայի և անասունների համար անվտանգ երթևեկ ու անցում է ապահովում դեպի վարելահողեր ու արոտավայրեր։
Արաքսավան-Դիմիտրով և Արտաշատի կամուրջների մի շարք հատվածներում մնացել են միայն արգելապատնեշների տեղադրման և գծանշման որոշակի աշխատանքներ։ Նախարարին ներկայացնելով իրավիճակը՝ շինարարները նշել են, որ մեկ-երկու օրից աշխատանքներն ամբողջությամբ կավարտեն։
Վերակառուցվել է նաև Մասիս-2 կամուրջը, որը Մասիս գյուղական համայնքից կապ է ապահովում դեպի վարելահողեր։ Գյուղապետը մտահոգություն է ներկայացրել՝ կապված ոռոգման համակարգի հետ։ Շինարարը պարտավորվել է ուսումնասիրել և լուծում տալ խնդրին։
Վահան Մարտիրոսյանը հանձնարարել է մի քանի կամուրջների և ուղեանցերի ճանապարհամերձ հատվածներում ավելացնել արգելափակոցները, ճանապարհամերձ հատվածներին մոտ գտնվող բարձր լարման էլեկտրասյուները տեղափոխելու հնարավորություններն էլ քննարկել էլեկտրացանցի ներկայացուցիչների հետ և լուծումներ գտնել։
«Հյուսիս-հարավ» մայրուղու Երևան-Արտաշատ հատվածում կամուրջների և ուղեանցերի շինարարության ընթացքում որոշ ժամանակահատվածում երթեկությունը տեղ-տեղ միակողմանի փակվել էր և կազմակերպվել էր շրջանցիկ: Մայիսի 25-ից կամուրջներին հարող հատվածներում այն երկկողմանի վերականգնվել է: Մյուս շինարարական աշխատանքները, կամուրջների ասֆալտապատումն ու բարեկարգումը շարունակվել են և ավարտին հասցվել արդեն բաց երթևեկության պայմաններում:
Մեկնաբանել