Կիրակի, 22 ապրիլի

Ովքե՞ր են «օկուպացրել» Աղստևը. վարչապետ Կարեն Կարապետյանը բաժնեմաս ունի ամենամեծ հէկում



Մեծ պաշտոնյաների փոքր հէկերը

Աղստև գետի վրա գործող ամենահզոր հէկը շահագործում է «ԷլԷնԷքս» ՍՊԸ-ն: 2885 կՎտ հզորություն ունի: Ընկերության կանոնադրական կապիտալը 200 մլն դրամ է: Տարեկան արտադրում է 9 մլն կվտ/ժամ էլեկտրաէներգիա:

Ընկերության ամենամեծ բաժնետերը ՀՀ վարչապետ Կարեն Կարապետյանն է: Նրան է պատկանում ընկերության բաժնետոմսերի 25 տոկոսը:

Կարեն Կարապետյանի գործընկերները ևս պատահական մարդիկ չեն: Գևորգ Փայտյանն ընկերության տնօրենն է: Արմեն Մկոյանը գործարար է, ով հայտնի է նաև որպես «Էլիտ գրուպ»-ի սեփականատեր և տնօրեն: Արման Դանիելյանի գործունեությունն առնչվում է հյուրանոցային բիզնեսի հետ: Մասնավորապես՝ «Անի ինվեստմենտ» ՍՊԸ-ի, «Հոթել Աղվերան» ՓԲԸ-ի, «Ջերմուկ ռեզորտ» ՍՊԸ-ի, «Էլիտ Պլազա» ՓԲԸ-ի և այլ ընկերությունների հետ:

Արտաշես Շիրիկյանը «Այբ» ակումբի վարչության նախագահն է, «Արկ մեդիա» ընկերության տնօրենների խորհրդի նախագահը: 78-ամյա Գայանե Շիրիկյանն, ըստ ամենայնի, նրա մայրն է:

Հետաքրքիրն այն է, որ հենց ընկերությունը՝ «ԷլԷնԷքս» ՍՊԸ-ն ևս 21 տոկոս բաժնեմասի սեփականատեր է:  Հետևաբար, վարչապետն այստեղից էլ մասնաբաժին ունի:

Աղստև գետը հոսում է Լոռու և Տավուշի մարզերով՝ անցնելով դեպի Ադրբեջան: Հայաստանում այն 81 կմ է: Սկիզբ է առնում Փամբակի լեռնաշղթայի Թեժլեռ գագաթից: Դիլիջան և Իջևան քաղաքների մոտ բարակահոս գետն ընդարձակվում է: Ջուրն անուշահամ է, ձկնառատ, օգտագործվում է ոռոգման նպատակով:

Համաձայն Հանրային ծառայությունները կարգավորող հանձնաժողովի տվյալների` հոկտեմբերի 1-ի դրությամբ Տավուշի մարզում գործում է 13 փոքր հէկ: Եվս 2-ը կառուցման փուլում են: Գործող հէկերից 4-ը հենց Աղստև գետի վրա են, մեկը՝ Աղստևի Գետիկ վտակի վրա:

«Վարդան Օրդինյան» ՍՊԸ-ն Աղստև գետի վրա «Վարդեր» փոքր հէկ կառուցելու մտադրություն ունի, ինչի նպատակով ջրօգտագործման թույլտվության նախագիծ է մշակվում Բնապահպանության նախարարությունում:

«Վարդան Օրդինյան» ՍՊԸ-ն 2014-ին հիմնադրել է Իջևան համայնքի ավագանու անդամ Վարդան Օրդինյանը: Հստակ` որտեղ է լինելու հէկը և ինչ հզորության, դեռևս հայտնի չէ, քանի որ նախագիծը փորձաքննության, տակավին, չի ներկայացվել: Հայտնի է գետը, որից ջրթույլտվություն ստանալու նախագծի մշակման գործընթացն է:

Վարչապետի մասնակցությամբ կառուցված հէկից բացի, Աղստևի վրա գործող երկրորդ հէկը «Ազատ դեմոկրատներ» կուսակցության առաջնորդ, նախկին պատգամավոր Խաչատուր Քոքոբելյանին պատկանող «Քարեվարդ» ՍՊԸ-ի «Քեյէներջի» հէկն է: Գործում է 2016 թվականից: Հզորությունը 976 կՎտ է: Տարեկան արտադրում է 5,4 մլն կվտ/ժամ էլեկտրաէներգիա: 

Այս տարվա հունիսից Քոքոբելյաններն Աղստևի գետի վրա շահագործել են երկրորդ հէկը՝ 973 Կվտ հզորության «Կոկ» հէկը: Տարեկան արտադրում է 5,7 մլն կվտ/ժամ էլեկտրաէներգիա: Հէկը գործարկող «Կոկ սիստեմ» ընկերության միանձնյա բաժնետերը Խաչատուր Քոքոբելյանի որդին է՝ Սևադա Քոքոբելյանը:

Աղստև գետի վրա գործող ամենահին հէկը շահագործում է «Իջևան հէկ» ՍՊԸ-ն՝ «Իջևան» հէկը: Ավելի քան 1100 կՎտ հզորություն ունի: Այս հէկի սեփականատերը ՀԷՑ-ի «Աղստև» մասնաճյուղի պետ Նիկոլայ Ղալթախչյանի մայրն է՝ Անահիտ Պարոնյանը: Հէկը նախկինում պատկանել է Նիկոլայի հորը՝ «Հայաստանի էլեկտրական ցանցեր» ընկերության Տավուշի մասնաճյուղի նախկին տնօրեն Ալբերտ Ղալթախչյանին: Այն Աղստևի ոռոգման համալիրի վրա է:

Այսպիսով, «Վարդան Օրդինյան» ՍՊԸ-ի հէկը կլինի 5-րդը, որը կկառուցվի Աղստևի վրա: 

Առաջին լուսանկարում` Կարեն Կարապետյանի մասնակցությամբ կառուցված հէկի շենքն է: Լուսանկարը` Էկոլուրի

Առաջին լուսանկարում` Կարեն Կարապետյանը, Խաչատուր Քոքոբելյանը և Արտաշես Շիրիկյանը


Գլխավոր էջ



Այս թեմայով

... կարդացեք ավելին «Մեծ պաշտոնյաների փոքր հեկերը» թեմայով
Մեկնաբանություններ (2)
1. Vardan22:28 - 29 դեկտեմբերի, 2017
Աղստևը ցամաքում է, հերիք է, գետին հանգիստ թողեք, քիչ է մնում դա էլ սեփականաշնորհեք
2. Harut11:13 - 10 հունվարի, 2018
Ненасытные подонки хватит убирайтесь вон уе надоели
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ