HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տրդատ Մուշեղյան

Իրանի իշխանությունները հայտարարել են բողոքի ցույցերը գլխավորող եվրոպական երկրի քաղաքացու ձերբակալման մասին

Իրանի Բորուջերդ շրջանի արդարադատության դեպարտամենտի ղեկավար Համիդռեզա Աբուլհասանը հայտարարել է, որ հակաիշխանական ցույցերի ընթացքում ոստիկաններին հաջողվել է ձերբակալել եվրոպական երկրի քաղաքացու, ով մասնակցել է անկարգություններին, հաղորդում է Reuters-ը՝ հղում անելով իրանական Tasnim գործակալությանը:

«Այդ մարդը պատրաստված էր եվրոպական հատուկ ծառայությունների կողմից և գլխավորում էր բողոքի ցույցերը»,- ասել է Աբուլհասանը: Վերջինս, սակայն, չի նշել, թե եվրոպական կոնկրետ որ պետության քաղաքացի է ձերբակալվածը:

Ավելի վաղ Իսլամական հեղափոխության պահակախմբի կորպուսի հրամանատար Մոհամմադ Ալի Ջաֆարին հայտարարել էր, որ «երկրում խռովությունները ավարտվել են, ապստամբները պարտություն են կրել»: 

Մոհամմադ Ալի Ջաֆարիի խոսքերով՝ Իրանի յուրաքանչյուր քաղաքում ցուցարարների թիվը չի գերազանցել 1500-ը, իսկ ամբողջ երկրում նրանց ընդհանուր թիվը կազմել է մոտ 15 000:

Հունվարի 3-ին Իրանի տարբեր քաղաքներում բազամահազարանոց ցույցեր են անցկացվել՝ ի աջակցություն երկրի իշխանությունների: Այս ակցիայի մասնակիցները դատապարտել են բողոքի ցույցերի մասնակիցներին՝ մեղադրելով նրանց բռնության և վանդալիզմի մեջ:

Հիշեցնենք, որ Իրանում բողոքի ցույցերը մեկնարկել էին դեկտեմբերի 28-ին Մաշհադ քաղաքում, այնուհետև բողոքի ալիքը տարածվել էր նաև երկրի այլ քաղաքներում: Ցուցարարները դժգոհում են երկրի ծանր տնտեսական վիճակից, դատապարտող կոչեր են հնչում Իրանի նախագահ Հասան Ռոուհանիի և հոգևոր առաջնորդ այաթոլլահ Ալի Խամենեի հասցեին:

Իրանի իշխանությունները բողոքի ցույցերի հրահրման մեջ մեղադրում են ԱՄՆ-ին, Մեծ Բրիտանիային և Սաուդյան Արաբիային: Երկրում արգելափակվել են «Ինստագրամ» սոցիալական ցանցը և «Տելեգրամ» մեսինջերը: Ինֆորմացիայի փոխանակման և տարածման հիմնական միջոցը ցուցարարների համար «Թվիթեր»-ն է:

Արդեն մեկ շաբաթ շարունակվող բողոքի ցույցերի ընթացքում, վերջին տվյալներով, զոհվել է մոտ 20 մարդ: Կան հարյուրավոր ձերբակալվածներ:

լուսանկարը՝ AP Pohto / Mehr News Agency

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter