Կառավարությունը հաստատեց ՏԻՄ մասին օրենքի փոփոխությունը՝ օրենքը ՍԴ որոշմանը համապատասխանեցնելու համար
Կառավարության այսօրվա նիստում փոփոխություն կատարվեց «Տեղական ինքնակառավարման մասին» և «Երևան քաղաքում տեղական ինքնակառավարման մասին» օրենքների նախագծերում։
Նախագիծը ներկայացրեց տարածքային կառավարման և զարգացման նախարար Դավիթ Լոքյանը։
«Հարցը կապված է ՍԴ-ի նոյեմբերի 10-ի որոշման հետ, որի արդյունքում մենք պետք է երկու փոփոխություն կատարենք «ՏԻՄ օրենքում» և «Տեղական ինքնակառավարումը Երևանում օրենքներում»»,- ասաց նախարարը։
Հիշեցնենք, որ նոյեմբերի 10-ին սահմանադրական դատարանը հրապարակել էր ԱԺ 26 պատգամավորների դիմումի հիման վրա կայացրած որոշումը՝ Վանաձորի ավագանու նիստերի սահմանադրականության վերաբերյալ։ Բարձրագույն դատարանը սահմանադրությանը հակասող էր համարել ՏԻՄ մասին օրենքի 64-րդ հոդվածի 3-րդ մասը և մինչև 2018 թվականի մարտի 31-ը ժամանակ էր տվել՝ համապատասխան դրույթը Սահմանադրությանը համապատասխանեցնելու համար։
«Առաջարկում ենք ՏԻՄ օրենքի 64-րդ հոդվածի մասին 3-րդ մասում «ներկա են որոշում ընդունելու համար անհրաժեշտ թվով ավագանու անդամներ» բառերը փոխարինել «ներկա է ավագանու անդամների օրենքով սահմանված թվի կեսից ավելին» բառերով, 4-րդ մասից հանել «բայց ոչ պակաս քան ավագանու անդամների ընդհանուր թվի մեկ քառորդ» բառերը»,- ասաց նախարարը։
Լոքյանի խոսքով՝ փոփոխություն է առաջարկվում նաև Երևանի մասին տեղական ինքնակառավարման մասին օրենքի 1-ին, 2-րդ և 3-րդ հոդվածներում, որպեսզի դրանք համապատասխանեն ՍԴ որոշմանը։
«Առաջարկվում է օրենքը անհետաձգելի համարել, ուղարկել ԱԺ և նոր սահմանադրությանը համապատասխան այն ընդունել, քանի որ ՍԴ նշանակած ժամկետը մարտին ավարտվում է»,- ասաց նախարարը։
Մեկնաբանել