Այս տարվա հուլիսի 1-ից կուկատակային կենսաթոշակային համակարգի պարտադիր բաղադրիչը կտարածվի 1974 թվականին և դրանից հետո ծնված բոլոր  քաղաքացիների վրա, և վերջիններիս աշխատավարձի առնվազն 5%-ը (եկամտի չափով պայմանավորված՝ պահվող գումարը կարող է տարբեր լինել) կուղղվի կենսաթոշակային համակարգին։ Այս մասին «Հետք»-ը զրուցել է կուտակային համակարգի դեմ պայքարող Դ!ԵՄ ԵՄ շարժման համակարգող խմբի անդամ, ԱԺ «Ելք» խմբակցության քարտուղար Գևորգ Գորգիսյանի հետ։

-Քաղաքացիներից շատերը Ձեզ վստահության քվե են տվել նաև այդ շարժման համար, Դուք գրեթե մեկ տարի է՝ օրենսդիր մարմնի անդամ եք, ի՞նչ քայլեր եք նախաձեռնել կենսաթոշակային համակարգում փոփոխություններ կատարելու համար։

-Մենք գտել ենք ու գտնում ենք, որ նման համակարգ կարող է լինել, սակայն բացառապես կամավորության սկզբունքով, պարզապես խնդիրն այն է, որ իշխող ուժը չունի ժողովրդի վստահությունը։ Ինչքան էլ պարոն Շարմազանովը բոլոր պատեհ ու անպատեհ առիթներով պնդի, որ իրենք ստացել են վստահության քվե, նրանք չունեն այդ վստահությունը, և որևէ նախաձեռնություն կամավորության հիմքով չեն կարող իրականացնել, որովհետև նրանց չեն վստահի։ Մենք այն ժամանակ նույնիսկ փոքրիկ հարցում էինք իրականացրել սոցցանցերում, թե ինչ պայմաններում քաղաքացին կամավոր կմիանա կուտակային բաղադրիչին, ցուցակ էինք հավաքել, թե քաղաքացիներն առհասարակ ինչ են սպասում  կուտակային համակարգից։ Իհարկե բոլորն էլ ցանկանում են հետագայում բարձր թոշակ ունենալ և դրա համար պատրաստ են ներդրումներ կատարել, բայց պետք է վստահություն լինի նախ երկրի ապագայի, ապա այն համակարգի նկատմամբ, որոնք երաշխավորելու են այդ գումարների վերադարձելիությունը։

Այնուամենայնիվ, մենք պատրաստվում ենք նմանատիպ փաթեթ ներկայացնել, որտեղ կամավորության  սկզբունքով կլինեն այնպիսի պայմաններ, ըստ  որի կարող ենք ենթադրել, որ մարդիկ կցանկանան մասնակցել այդ համակարգին։ Թե ինչպիսի արձագանք կլինի ՀՀԿ-ականների կողմից, կարծում եմ՝ սպասելի է, բայց այդ ամենը կախված է հասարակությունից,  եթե հասարակական ճնշումներ լինեն, մենք կարող ենք մեր 9-ը մանդատը որպես լուրջ փոխզսպող մեխանիզմ կիրառել։ Որպեսզի քաղաքացիները ռեալ զգան ինչ-որ ազդեցություններ, պետք է  ինչ-որ պահերի դիմենք նրանց ու աջակցություն ստանանք, որովհետև ինը հոգու ճնշումն այն չէ, ինչ մի քանի  տասնյակ հազար քաղաքացիների բողոքի երթը։

-Նախագիծը դեռ պատրաստ չէ՞։

-Դեռևս ոչ, տարբեր փորձեր ենք ուսումնասիրում, կարծում եմ՝ մինչև օրենքի ուժի մեջ մտնելը նախագիծը շրջանառության մեջ կդնենք։

-Չե՞ք կարծում, որ ժամկետների մեջ չեք տեղավորվում, քանի որ հուլիսի 1-ից օրենքը տարածվելու է բոլորի վրա։

-Օրենքը ծավալուն փաստաթուղթ է, դրան  համարժեք փոփոխություններ է պետք առաջարկել։ Հաշվի առեք, որ դրա վրա ժամանակին աշխատել են մի քանի տասնյակ փորձագետներ, միջազգային մասնագետներ, որոնք հրավիրվել են պետության փողերով, հիմա այդ ամենը մենք մի քանի հոգով ենք փորձում իրականացնել, ինչը ժամանակատար է։

-Ի՞նչ ակնկալիքներ ունեք: Ըտ Ձեզ՝ կառավարությունը կարո՞ղ է կրկին զիջումների գնալ։

-Բոլոր հնարավոր ճանապարհներով պետք է փորձենք դրան գնալ, եթե չստացվի  խորհրդարանական շրջանակներում, կրկին պետք է ապավինենք փողոցային պայքարին։

-Ունե՞ք նման համոզմունք, որ քաղաքացիներն այս անգամ էլ կվստահեն Ձեզ, Մանե Թանդիլյանին, այժմ ունե՞ք հանրային վստահություն։

-Եթե չլիներ հանրային վստահություն, այսօր խորհրդարանում չէինք լինի, և՛ ես, և՛ Մանե Թանդիլյանը ռեյտինգային ընտրացուցակով ենք ընտրվել։

-Արդարացնո՞ւմ եք այդ վստահությունը։

-Այո, իհարկե, մենք անընդհատ կապի մեջ ենք մեր ընտրողների հետ, ձեռքը զարկերակի վրա ենք պահում, և վստահաբար կարող եմ ասել, որ առնվազն չենք հիասթափեցրել մեր ընտրողներին։

-Իսկ ինչո՞ւ Դ!ԵՄ ԵՄ-ը պառակտվեց, կամ ինչո՞ւ շարժումն ինքը չհայտնվեց խորհրդարանում։

- Շարժումը խորհրդարանում է, «Լուսավոր Հայաստան»-ից մոտ 10  հոգի շարժման անդամներ են, մենք միասին ստեղծեցինք մեր թիմը, այնպես չէր, որ ինչ-որ քաղաքական թիմ գոյություն ուներ, որին միացան Դ!ԵՄ ԵՄ-ից անդամներ, իսկ շարժումը կոնկրետ հարցի վերաբերյալ էր ձևավորվել՝ կենսաթոշակային օրենքի, և փողոցային պայքարի արդյունքում ինչ-որ հանգուցալուծում եղավ։ Պետական համակարգի աշխատողներն ընկան համակարգի մեջ, և նրանք չէին կարող պայքարել, իսկ մյուս հատվածի համար փափուկ բարձ դրվեց  գլխների տակ՝ ժամանակավոր ազատելով իրենք այդ բեռից և դուրս թողնելով պայքարից։ Արդյունքում մնացին միայն ամենաակտիվ պայքարողները, որոնց թիվը շատ չէր, և այլևս այդ պայքարի հասարակական պահանջը չկար, և այն մարեց։

-Նախկինում  քաղաքացիները Ձեզ վստահում էին որպես շարժման անդամ, այժմ Դուք քաղաքական թիմի ու դաշինքի անդամ եք: Համոզվա՞ծ եք, որ հիմա էլ կվստահեն։

-«Ելք»  դաշինքում շարունակում ենք անել այն, ինչ անում էինք Դ!ԵՄ ԵՄ-ի ժամանակ՝ հասարակության շահերը պաշտպանել, մենք հասարակության շահերը  պաշտանելու համար դուրս եկանք փողոց, մտանք քաղաքական պայքարի մեջ, ստեղծեցինք «Լուսավոր Հայաստան» կուսակցությունը։ Հիմա այդ նույն գործողությունը շարունակում ենք իրականացնել խորհրդարանի շենքում՝ պաշտպանել քաղաքացիների շահերը։

 -Կուտակայինի դեմ պայքարի հարցում կոչով կդիմե՞ք Դ!ԵՄ ԵՄ-ի թիմին։

-Մենք ջերմ հարաբերություններ ունենք մեծամասնության հետ, հաճախ ենք հանդիպում, կարծում եմ՝ թանկացման դեմ ակցիային նրանց մեծ մասը մասնակցելու է։ Երբ կենսաթոշակայինի հետ կապված կոնկրետ քայլեր սկսենք, կարծում եմ՝ նրանց հետ կհամագործակցենք՝ առնվազն նրանց կարծիքները հաշվի առնելու համար։