Կառավարությունը մերժեց պատգամավորի առաջարկը՝ կրճատել մանկապարտեզ հաճախող երեխայի ծնողի աշխատաժամանակը
Կառավարությունը մերժեց «Ելք» խմբակցության պատգամավոր Լենա Նազարյանի հեղինակած «Աշխատանքային օրենսգրքում լրացում կատարելու մասին» օրենսդրական նախաձեռնությունը:
«Պատգամավորն առաջարկում է նախադպրոցական ուսումնական հաստատություն հաճախող երեխա ունեցող աշխատողի պահանջով մինչև երեխայի նախադպրոցական տարիքի ավարտը աշխատանքային օրվա ավարտ համարվել 17.00-ն։ Նման պահանջի իրավունք ունի աշխատող ծնողներից միայն մեկը»,- պատգամավորի առաջարկը ներկայացրեց Աշխատանքի և սոցիալական հարցերի նախարար Արտեմ Ասատրյանը։ Նախարարի խոսքով՝ այս առաջարկն ընդունելի չէ Կառավարության համար, քանի որ «խնդրահարույց է»։
Նախարարը հիշեցրեց, որ աշխատաժամանակի սկիզբը ժամը 9.00-ն է, իսկ ավարտը` 18.00-ն: Հետևաբար, նախագծով առաջարկվող կարգավորումը և հիմնավորման մեջ նշված պնդումը, որ աշխատանքային օրվա ավարտը ժամը 17.00-ը սահմանելու պարագայում աշխատանքային ժամերը կկրճատվեն մեկ ժամով, կարող է վերաբերվել պետական կամ տեղական ինքնակառավարման մարմինների և դրանց ենթակա կազմակերպությունների, ինչպես նաև այն կազմակերպությունների աշխատողներին, որտեղ գործատուի ներքին կարգապահական կանոններով աշխատանքային օրվա ավարտը սահմանված է ժամը 18.00-ն:
Նախարարի խոսքով՝ գործատուներն ազատ լինելով սահմանելու աշխատանքային օրվա սկզբի և ավարտի ցանկացած ժամ՝ կարող են աշխատանքային օրվա սկիզբը սահմանել, օրինակ, ժամը 13.00-ն, իսկ ավարտը` ժամը 21.00-ն, ինչի հետևանքով, եթե նախագիծն ընդունվի, աշխատանքային օրվա տևողությունը կկրճատվի ոչ թե մեկ, այլ չորս ժամով:
«Միևնույն ժամանակ, համաձայն նախագծի, նախադպրոցական ուսումնական հաստատություն հաճախող երեխա ունեցող աշխատող ծնողներից միայն մեկն իրավունք ունի օգտվելու առաջարկվող՝ ոչ լրիվ աշխատանքային օր նախատեսելու իրավունքից: Այս կապակցությամբ պարզ չէ, թե ինչպես է ծնողներից մեկի գործատուն տեղեկանալու մյուս ծնողի կողմից արդեն իսկ նշված իրավունքից օգտվելու փաստի մասին»,- ասաց Ասատրյանը։
Լուսանկարում` Լենա Նազարյանը՝ կենտրոնում
Մեկնաբանել