Կառավարության այսօրվա նիստում հաստատվեց որոշում, ըստ որի՝ փոփոխություններ կկատարվեն «Բարձրագույն կրթության մասին» և հարակից այլ օրենքների փաթեթում։ Նախագիծը ներկայացրեց Կրթության և գիտության նախարար Լևոն Մկրտչյանը։

«Օրենքով համալիր և որակական փոփոխություններ են առաջարկվում բարձրագույն կրթական համակարգում, նպատակը որակի բարձրացումն է։ Օրենքի փիլիսոփայությունն ամբողջությամբ փոխվում է և դրվում է ուսանողակենտրոն քաղաքականությունը, որն ամբողջությամբ փոխում է կրթական գործունեության կազմակերպման  այսօրվա գործառույթը։ Ուսանողի կրեդիտներ հավաքելու գործընթացը դառնում է հիմնարար նպատակ»,- ասաց նախարարը։

Մկրտյանի խոսքով՝ փոփոխություններից մեկն էլ բուհերի իրավական կարգավիճակի և ներքին դեմոկրատիայի զարգացումն է։

«Կառավարման ամբողջական նոր համակարգ է, ավելի բալանսավորված է դառնում ռեկտոր-գիտխորհուրդ-բուհական խորհուրդ կապը և այս եռանկյունում իշխանության բաշխումը, իրականացվում է նաև դեկանային, ամբիոնային աշխատանքների հստակեցում»,- ասաց Մկրտչյանը՝ հավելելով, որ նաև հնարավորություն է ստեղծվում եվրոպական ու միջազգային չափանիշներին համարժեք նոր կրթական ծրագրերի իրականացման համար։

«Ամբողջությամբ նորամուծություն է նախաբակալավրիատի ներմուծումը, որը հնարավորություն կտա հատկապես մարզային համալսարաններում իրականացնել տվյալ մարզի սոցիալ-տնտեսական կարիքներից բխող սահուն, կրթական ծրագրեր։ Հրաժարվում ենք լիկվիդների հեռակա ուսուցման այսօրվա պրակտիկայից, ձևավորվում է միջազգայնորեն ընդունված ամբողջական դասընթաց և մասնակի դասընթաց (Full time, part time)։ Ուսանողը հնարավորություն է ստանում բակալավրիական կրթություն իրականացնել ամբողջական դասընթացով 4-6 տարվա ընթացքում, իսկ մասնակի կրթությունը՝ 4-8 տարվա ընթացքում, որը հնարավորություն կտա աշխատելու հետ միաժամանակ իրականացնել կրեդիտների հավաքման գործընթաց»,- մանրամասնեց Կրթության և գիտության նախարարը։

Մկրտչյանը երկու օր ժամանակ խնդրեց մի քանի տեխնիկական փոփոխությունների համար, ինչն առաջացրեց վարչապետի վրդովմունքը, նա հանձնարարեց նիստին ներկայացնել ամբողջական փաթեթը՝ առանց որևէ խմբագրման կարիքի։