Փաստաբանները բողոքում են «Հայաստանի Հանրապետության դատական օրենսգիրք» ՀՀ սահմանադրական օրենքի նախագծով սահմանված՝ դատարանի կողմից փաստաբանի նկատմամբ տուգանքի կիրառում նախատեսող իրավակարգավորման դեմ:

Հունվարի 16-ին փաստաբանների պալատում կազմակերպված քննարկման ժամանակ փաստաբանները հայտարարությամբ են հանդես եկել՝ պահանջելով Հայաստանի Հանրապետության Ազգային ժողովից և կառավարությունից նախագծում ներառված՝ փաստաբանի նկատմամբ դատարանի կողմից տուգանքի տեսքով դատական սանկցիա կիրառելու հնարավորությունը բացառել:

Փաստաբանների պալատի տեղեկատվության բաժինը հայտնում է, որ այսօր՝ ժամը 14:00-ի դրությամբ հայտարարության միացել է 907 փաստաբան: Նրանց անունները հրապարակված են փաստաբանների պալատի կայքում: Ներկայացնում ենք հայտարարության տեքստը:

«Սույն հայտարարությանը միացող փաստաբաններս անթույլատրելի ենք համարում «Հայաստանի Հանրապետության դատական օրենսգիրք» Հայաստանի Հանրապետության սահմանադրական օրենքի նախագծով (այսուհետ՝ Նախագիծ) սահմանված՝ դատարանի կողմից փաստաբանի նկատմամբ տուգանքի կիրառում նախատեսող իրավակարգավորումը:

Գործող իրավակարգավորումը երաշխավորում է փաստաբանների պաշտպանությունը դատարանի հնարավոր անհիմն ներգործության միջոցներից, մինչդեռ Նախագծով նախատեսված նոր մոտեցումը վտանգում է փաստաբանության անկախությունը (այդ թվում՝ փաստաբանի, որպես իրավապաշտպան գործունեություն իրականացնող անձի, մասնագիտական ինքնուրույնությունը) և ազատությունը, որոնք երաշխավորված են Հայաստանի Հանրապետության Սահմանադրությամբ, օրենքներով և միջազգային իրավական ակտերով:

Նախագծի հիմնավորման մեջ որևէ փաստարկ ներկայացված չէ, թե ինչու է որոշվել փաստաբանի նկատմամբ տուգանք կիրառելու հնարավորություն տալ դատավորին:

Փաստաբանի անկախությունը և ազատությունը երաշխավորելու հրամայականն ինքնանպատակ չէ, քանի որ վերջիններիս սահմանափակումը կհանգեցնի արդար դատաքննության իրավունքի խաթարմանը:

Նկատի ունենալով վերոգրյալը և ընդգծելով ՄԵՐ ՎՃՌԱԿԱՆՈՒԹՅՈՒՆԸ՝ փաստաբանության անկախությունը և ազատությունը խաթարող Նախագծի համապատասխան դրույթները շրջանառությունից հանելու համար անհրաժեշտ քայլեր ձեռնարկելու կապակցությամբ,

Հայաստանի Հանրապետության Ազգային ժողովից և կառավարությունից պահանջում ենք Նախագծում ներառված՝ փաստաբանի նկատմամբ դատարանի կողմից տուգանքի տեսքով դատական սանկցիա կիրառելու հնարավորությունը բացառել»: