Երեքշաբթի, 25 սեպտեմբերի

«Թեղուտ» ՓԲԸ-ում աշխատանքները դադարեցված են, պատճառների մասին կարծիքները՝ իրարամերժ



Այսօր «Թեղուտ» ՓԲԸ-ի  անցակետում աշխատողների ելումուտ գրեթե չկար: Տարածքում կանգնած էին աշխատողների մի քանի ավտոմեքենաներ: Անցակետի մոտ կանգնած աշխատողներից մեկից տեղեկացանք, որ Վալերի Մեջլումյանի կողմից հունվարի 11-ից Թեղուտի հանքում և ֆաբրիկայում աշխատանքերը դադարեցված են: Թեղուտ բնակավայրի  վարչական պատասխանատու Ֆրունզե Նորեկյանի խոսքով՝ այս պահին «Թեղուտ» ՓԲԸ-ի  ֆաբրիկան չի աշխատում նորոգման պատճառով:

«Ես ինչքան  տեղյակ եմ, իրենց հետ էլ խոսել եմ, ընկերության աշխատողների մեծ մասին հերթական արձակուրդ են տալիս»,- հայտնեց Ֆ. Նորեկյանը: Թեղուտի գյուղամիջի  մթերային խանութի աշխատողը պատմեց, որ «Թեղուտ» ՓԲԸ-ում աշխատող իր ամուսնուն արձակուդ են ուղարկել, որի  պատճառներին ինքը տեղյակ չէ: Շնողի ճանապարհին մեզ հանդիպած Ծովինարն էլ պատմեց, որ օրերս աշխատանքից տուն են ուղարկել «Թեղուտ» ՓԲԸ-ում պահակ աշխատող որդուն՝ ընդգծելով, որ աշխատողներից որևէ մեկը  տեղյակ չէ, թե ինչու են իրենց տուն ուղարկում

Շնողցի Լյովա Ալիխանյանը «Թեղուտ ՓԲԸ»- ի աշխատանքերի դադարեցման պատճառների մասին մեզ հետ զրուցեց ավելի հանգամանալից.

«Ես գիտեի, որ «Թեղուտ» ՓԲԸ-ն վաղ թե ուշ պետք է փակվի»,- ասաց նա: Լյովան ասում է՝ «Թեղուտ» ՓԲԸ-ի մասին իր տեղեկությունները աշխատակիցներից է իմացել:

«Պոչամբարի պատվարը ոչ բետոն է , ոչ երկաթ: Ընդամենը հողի շերտ է, որը կարող է անձրևներից փափկի: Պոչամբարը արագ է լցվում, չի հասցվում այնտեղ պոչանքների չորացում գնալ: Այն ձորի մեջ է: Պոչամբարի տակից դուրս եկող գրունտային ջուր կա, այն էլ մեծաքանակ: Պոչերը, որ լցնում են պոչամբար, նաև ընդերքից  է ջուր դուրս գալիս, ո՞նց կլինի դա»,- ասում է  նա:

Լ. Ալիխանյանը նշեց, որ տարվա 365 օրերից «Թեղուտ» ՓԲԸ-ն 100 օր արտանետում է ունենում, դա պատահականություն չի կարող լինել: Ընկերությունը անընդհատ  պոչանքները  ուղղում  է Շնող գետ, այնտեղից էլ Դեբեդ, որպեսզի Թեղուտ ՓԲԸ-ի պոչամբարը չլցվի: Լյովայի խոսքով՝ Թեղուտի հանքի ծավալը ավելի մեծ է, քան Հայաստանի ամենամեծ կոչված Թեղուտի պոչամբարի ծավալը: Դրա համար ընկերության ղեկավարությունը ոչ թե պոչամբարի նախգծով սահմանված տարածքում է լցնում պոչերը, այլ անվտանգության տարածքում: Այդ տարածքը պետք է մնար անվտանգության գոտի, որ վթարի դեպքում պոչերը նախատեսված անվտանգության գոտու տարածքում կուտակվեր և ներքևի տարածքի բնակչությանը չվնասեր:


Լյովա Ալիխանյանը

«Խառատաձոր հանդամասում տեղակայված պոչամբարի հատակը Շնողի հրապարակից 45 մետր բարձր է: Եթե սողանք առաջանա, պոչանքը Թեղուտի ներքևի տները կծածկի, ընկերության գարաժներում աշխատողներին ու Շնող գետի եզերքից երեք շարք տուն հետը կսրբի կտանի: Եթե մի 10 տարի հետո պոչամբարը դեպի ավելի վերև ընդլայնվի, վթարի դեպքում պոչանքը կգա Շնողի հրապարակը կլցվի, դեռ կողքի թաղերի վրա էլ կգնա»,-բացատրում է Լյովա Ալիխանյանը:

Հետաքրքրվեցինք, թե արդյոք պոչամբարի հոսելու վտանգ կա, ինչին ի պատասխան զրուցակիցա ասաց հետևյալը. «Պոչամբարի հոսելու վտանգը էսօր «Թեղուտ» ՓԲԸ-ի ղեկավարներն են տեսնումոր կագնեցրել են ընկերության աշխատանքները: Իրենք ուրիշ պատճառ չունեն ընկերության աշխատանքերը դադարեցնելուՍկի ֆաբրիկայի մեխանիզմների վրայի ներկը չի չորացել: Ֆաբրիկայի համար ամբողջը նոր սարքավորումներ էին բերել: Ուղիղ երեք տարի է, որ ֆաբրիկան  աշխատացնում են: Դեկտեմբերի վերջին Թեղուտի ղեկավարությունն իմացավ, որ բնակչությունը պետք է կանգնեցնի պոչամբարի հանցագործությունըԲայց ընկերությունում հայտնում են , թե «Թեղուտ» ՓԲԸ-ի ֆաբրիկան է վերանորոգվելու: Ֆաբրիկան այս պահին արդեն չի աշխատում, բայց իրենք երկուշաբթի օրը կիսլատեն Դեբեդն էին լցրել: Ժողովուրդը նայում է՝ գետը մաքուր է, բայց մարդիկ խեղդվում էին»:

Վերջինս  հիշեց, որ «Թեղուտ» ՓԲԸ-ի արտադրության ծավալների մեծացման նախորդ տարվա օգոստոսի 24-ի հանրային լսումներին ընկերության ղեկավարներն ազդակիր Շնող և Թեղուտ համայնքների բնակիչներին համոզում էին իրենց իրավունք տալ ֆաբրիկայում կրկնակի ծավալներով հանքաքար մշակել: Լ.Ալիխանյանը պնդում է, որ Թեղուտի Ֆաբրիկան պրոբլեմ չունի, ընկերության ղեկավարները օգոստոսի 24-ի քննարկումներին վստահ էին, որ ֆաբրիկան պատրաստ  է կրկնակի  ծավալներով  հանքաքարի մշակման:

«Պրոբլեմը իրենց մեղքով  է, որ պոչամբարը նախագծային շեղումներով են կառուցել: Շատ կներեք, ոնց որ տաքսիով եկել եք, սալոնում նստելու փոխարեն, գնաք տաքսիի բեռնախցիկում նստեք: Ամեն հարցում «Թեղուտ» ՓԲԸ-ի կողմից նախագծային շեղումներ են թույլ տրվել: Ու դրա պատճառը այն է, որ այդ աշխատանքերը մի քանի կոպեկ էժան կատարեն»,- բացատրեց Լ. Ալիխանյանը:

«Թեղուտ» ՓԲԸ-ն արդեն 3 տարի է՝ աշխատում է: Շահագործվել է 2014թ.-ի դեկտեմբերին: «Եթե մենք համաձայնել էինք արտադրության ծավալների կրկնակի ավելացմանը, ապա մի 6 ամիս հետո «Թեղուտ» ՓԲԸ-ի պոչամբարը կպայթեր՝ մեծ սպառնալիքներ դառնալով  բնակչության համար»,- ասաց զրուցակիցս: Նրա խոսքով շնողցիները պատրաստվում են Թեղուտի պոչամբարի վտանգների մասին ահազանգ դիմում ուղարկել Ազգային ժողովին: «Պահանջելու ենք, որ ԱԺ հատուկ հանձնաժողովը, դատախազությունը, քննչական կոմիտեն մտնեն «Թեղուտ» ՓԲԸ-ի տարածք»,-ասաց Լ. Ալիխանյանը:

«Հետքը»հունվարի 14-ին «Վալլեքս» խմբի ընկերությունների տեղեկատվության և հասարակայնության հետ կապերի բաժնի պետ Թագուհի Կարապետյանից  պարզաբանումներ է խնդրել «Թեղուտ» ՓԲԸ-ում աշխատանքների դադարեցման, աշխատողների կրճատումների, ընկերության վարկերի մարման ընթացքի և ֆինանսական վիճակի մասին.

«Թեղուտ» ՓԲԸ-ում հերթական պլանայանին կանգառ է, որի ընթացքում կատարվում են հարստացուցիչ ֆաբրիկայի սարքավորումների վերանորոգման աշխատանքներ: «Թեղուտ» ՓԲԸ-ում գործարկման պահից առ այսօր պարբերաբար իրականացվել են նման պլանային կանգառներ, դրանք պարբերաբար շարունակվելու են նաև ապագայում՝ պայմանավորված հանքարդյունաբերության առանձնահատկություններով և արտադրական անհրաժեշտությամբ: Այս պահին աշխատողների թվաքանակի կրճատման գործընթաց սկսված չէ: «Ֆինանսական ծանր վիճակի» մեջ լինելու վերաբերյալ լուրերը թողնում ենք առանց մեկնաբանության: Ամեն դեպքում, անհրաժեշտ ենք համարում հիշեցնել, որ հիմնադրման պահից սկսած «Թեղուտ» ՓԲԸ-ն հանդիսացել է Հայաստանի  խոշորագույն հարկատուներից: 2017թ. առաջին երեք եռամսյակի ընթացքում ընկրությունը վճարել է 9,13 մլրդ դրամի հարկեր և տուրքեր՝ դասվելով երկրի առաջին տաս խոշոր հարկատուների շարքը: Ընկերությունը իր վարկային պարտավորությունները կատարում է համապատասխան պայմանագրերով սահմանված կարգով»,- հայտնել է Թագուհի Կարապետյանը:  

Վերջինս նաև տեղեկացրել է, որ «Հետք»-ի հարցմանը առավել մանրամասն կպատասխանեն հաջորդ շաբաթվա ընթացքում:

 


Գլխավոր էջ



Մեկնաբանություններ (3)
1. Լևոն Գալստյան13:52 - 21 հունվարի, 2018
Նոր զանգել եմ ԱԻՆ-ի 911 համարին ու ասում եմ, որ Թեղուտի պոչամբարում խնդիր կա, մարդիկ գրում են, որ ճաքեր է տվել, թափոնները լցնում են գետերը, պատասխանում են, որ իրենք ոչ մի բանից տեղյակ չեն ու խորհուրդ են տալիս զանգել ՀՀ Բնապահպանության նախարարություն։ Երբ որ ասի, թե ձեր պարտականությունն է դա՝ ասում են, թե կզանգենք Վալլեքս ընկերություն ու կճշտենք խնդիր կա, թե չէ։ Պատասխանեցի, որ ոչ թե պետք է զանգեք, այլ պիտի գնաք և ուսումնասիրություն անեք։ Ասում է․ կաշխատենք օգտակար լինել։ Ես էլ ասացի, որ օգտակար պետք չէ լինել՝ պետք է ձեր ծառայությունն ու պարտականությունները կատարել։ Տեսնենք ինչ կասեն ԱԻՆ-ից...
2. բնապահպան16:57 - 21 հունվարի, 2018
Հարգելի Լեւոն, նույնիսկ իրենց խոսքերից պարզ երեւում է, որ բննախին մինչեւ հիմա արգելված է եղել հանքերը մտնել ու ինչ որ բան նայել: Եթե այդ մինիստրությանը արգելված է կատարել իր գլխավոր ու ամենաառաջնահերթ խնդիրը՝ այսինքն պահպանել բնությունը, ապա ԱԻՆ - Մաինը ինչ ռիսկ կանեն սրանց հանքերին մոտենան? Ոչ մեկը այնտեղ չի գնա ու ոչ մի բան չի անի ըստ երեւույթին, իրենք միայն մոլորեցնող խոսքեր են ասում: Մնում գյուղացիք իրենք տեսնեն իրենց գլխի ճարը, կամ էլ տներում նստեն ու աստծուն աղոթեն որ փորձանքն անցնի
3. ՀԲՃ10:30 - 23 հունվարի, 2018
Սա գրել են Թեղուտի պոչամբարի վտանգների մասին միջազգային փորձագետները 2016-ի ապրլին։ «Ընդհանուր ամփոփում․ • Պոչամբարի նախագիծը համարժեք չէ թե´ բնապահպանական, թե´ ֆիզիկական կայունության առումով: • Ապարների թթվային դրենաժ արտադրող նյութերի առկայության պատճառով պոչամբարը միջինից երկարաժամկետ հատվածում կարող է ազդեցություն ունենալ բնական միջավայրի վրա: Այս խնդրին համարժեք ուշադրություն չի դարձվել, հատկապես՝ հետփակման (երկարաժամկետ) պայմանների համար: • Միջազգային չափանիշների համեմատությամբ՝ պոչամբարի ներկայիս նախագիծը կհամարվեր անընդունելի ֆիզիկական անկայունության առումով (վերընթաց բարձրացման նախագիծ սեյսմիկ վայրում): Համարվում է, որ ապագայում որոշ ֆիզիկական անկայունության խնդրի հավանականություն կա: • Հասկանալի է, որ «Վալլեքսն» ընդունել է նախագծի վերանայման անհրաժեշտությունը և ներգրավել է միջազգային մասնագետների այդ վերանայումը կատարելու նպատակով»: Հաշվետվության ամբողջական տարբերակն այստեղ է՝ http://documents.worldbank.org/curated/en/810031468197953609/pdf/106237-ARMENIAN-WP-P155900-PUBLIC.pdf
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ