Շաբաթ, 22 սեպտեմբերի

Ծառայողական ավտոմեքենաները կրճատվում են, բայց գնվում են նորերը



2018թ. պետական բյուջեի նախագծի քննարկման ժամանակ կառավարությունն Ազգային ժողով էր ներկայացրել պետական իշխանության մարմինների ծառայողական ավտոմեքենաների սահմանաքանակի վերաբերյալ տեղեկանք: Ըստ այդ տեղեկանքի՝ 2018թ.-ին, նախորդ տարվա համեմատ, նախատեսվում է 41 միավորով կրճատել ավտոմեքենաների թիվը:

Պետական իշխանության մարմինների ծառայողական ավտոմեքենաների քանակը 2017թ. եղել է 915 միավոր, 2018-ին, ըստ ներկայացրած տեղեկանքի, լինելու է 874:

2017թ. վերջին մի քանի գերատեսչություններ թարմացրել են իրենց ավտոմեքենաների պարկը: Դեկտեմբերի 22-ին «Տոյոտա Երևան» ՍՊԸ-ի հետ մարդատար ավտոմեքենաների ձեռքբերման պայմանագիր է կնքել Կրթության և գիտության նախարարությունը:

Ձեռք է բերվել թվով 2 ավտոմեքենա՝ 19 մլն 500 հազար դրամ ընդհանուր արժեքով: Ըստ տեխնիկական բնութագրերի, ավտոմեքենաները պետք է ունենան 112 ձիաուժ շարժիչի հզորություն, պետք է նախատեսված լինեն բենզինով աշխատելու համար, ունենան սև կամ սպիտակ գույն:

Նույն օրն ավտոմեքենաների ձեռքբերման պայմանագիր է կնքել նաև Վերահսկիչ պալատի աշխատակազմը: Մատակարարը դարձյալ նույն ընկերությունն է՝ «Տոյոտա Երևան» ՍՊԸ-ն: Վերահսկիչ պալատը ձեռք է բերել մեկ հատ Toyota Camry ավտոմեքենա՝ 14 մլն 110 հազար դրամ արժեքով և 3 հատ Toyota Corolla՝ յուրաքանչյուրը 9 մլն 730 հազար դրամ: 4 ավտոմեքենաների ձեռքբերման համար հատկացվել է 43 մլն 300 հազար դրամ:

Դեկտեմբերի 22-ին թվով 2 ավտոմեքենա գնել է նաև Պետական եկամուտների կոմիտեն: Վերջինիս գնած ավտոմեքենաները նախատեսված չեն մարդկանց տեղափոխման համար: Ավտոմեքենաները հատուկ մասնագիտացված են և նախատեսված են մաքրելու համար:

Դիզելով աշխատող ավտոմեքենաները պետք է մաքրեն մեծ տարածքներ, փողոցներ, հրապարակներ, ճանապարհներ, մայթերի ձյունը, աղբը, հողը: Պետք է ունենան կոմպակտ չափեր, որը հնարավորություն կտա մեքենային անարգել շարժվել նշված տարածքներում: Մաքրման առավելագույն մակերեսը պետք է նվազագույնը լինի ժամում 10,500 և առավելագույնը 18,000 քմ:

Մասնագիտացված ավտոմեքենաների ձեռքբերման պայմանագիրը կնքվել է «Ալֆա Թրեյդ» ՍՊԸ-ի հետ՝ 16 մլն 400 հազար դրամ ընդհանուր արժեքով:

2017թ. արտադրության, սպիտակ գույնի, մինչև 500կմ վազքով, 1,7լ շարժիչի ծավալով, 80 ձ/ու հզորության ամենագնաց ավտոմեքենա գնելու պայմանագիր է կնքել նաև ոստիկանության աշխատակազմը: Պայմանագիրը կնքվել է 2017թ. նոյեմբերի 17-ին՝ «Վեկար» ՍՊԸ-ի հետ: Պայմանագրի գինը կազմել է 10 մլն 600 հազար դրամ:

Ավտոմեքենա ձեռք բերելու «մրցավազքից» անմասն չի մնացել նաև «Վանաձորի պետական բժշկական քոլեջ» ՊՈԱԿ-ը: Վերջինս «Տոյոտա Երևան» ՍՊԸ-ից գնել է 10 մլն 450 հազար դրամ արժողությամբ մարդատար ավտոմեքենա:


Գլխավոր էջ



Մեկնաբանություններ (1)
1. Aram20:56 - 23 հունվարի, 2018
It is an absurd and wasteful practice to allow the so many cars and drives, let alone parking spaces to government (civilian, military and police) employees. Even the U.S senators drive their own car or pay their own drivers. This waste of Armenia's small budget should STOP
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ