HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սառա Պետրոսյան

Մարզպետների գործունեությունը կգնահատի վարչապետը՝ չափելի արդյունքների հիման վրա

Վարչապետ Կարեն Կարապետյանն անցյալ տարեվերջին մարզպետների հաշվետվություններն էր ընդունում: Նրանցից յուրաքանչյուրը ջանք չէր խնայել տպավորիչ թվերով ներկայացնել իր մարզի «առաջընթացը»: Հարյուրավոր միլիոնների ներդրումներ, ստեղծված եւ ստեղծվելիք հազարավոր աշխատատեղեր, արտադրական եւ արտահանման ծավալների աճ, համայնքների բյուջեների սեփական եկամուտների աճ եւ այլն:

Մարզպետների ներկայացրած հաշվետվությունները զարմացրին հատկապես այդ մարզերի բնակիչներին: Թե վարչապետը որքանով հավաստի համարեց հաշվետվությունները, ստուգվեցին թվերն ու փաստերը, գնահատվեցին դրանք, թե` ոչ, հայտնի չէ:  

Հաշվետվությունների մեջ խոսվե՞ց, արդյոք, համայնքներում առկա աշխատավարձերի եւ սոցվճարների պարտքերի, հարկերի հավաքագրման ցածր ցուցանիշների, համայնքների ռազմավարական ծրագրերով պլանավորված գործողությունները չկատարելու եւ այլ թերացումների մասին: Մանրամասնեցի՞ն, արդյոք, թե որ ընկերություններն են ներդրում կատարել մարզերում, որ ընկերություններում են ստեղծվել հազարավոր աշխատատեղերը, հիմնակա՞ն աշխատատեղեր են դրանք, թե՞ սեզոնային եւ այլն:

Այդ բոլորը, եթե իրականություն է, ուրեմն, ինչո՞ւ աղքատության պատկերը հանրապետությունում չի փոխվում: Ըստ Ազգային վիճակագրական ծառայության՝ 2016 թ.-ին աղքատության մակարդակը նվազել է 0,4%-ով, իսկ ՀՆԱ-ն, 2015 թ.-ի համեմատ, աճել է ընդամենը 0,2%-ով:

Կառավարության 2009 թ.-ի մայիսի 21-ի N 562-Ն որոշմամբ սահմանվել են մարզպետների գործունեության գնահատման չափորոշիչները եւ աշխատանքների գնահատման մեթոդաբանությունը: Հատկանշական է, որ մարզպետներից ոչ մեկի գործունեությունը, այդ թվականից ի վեր, ըստ սահմանված չափորոշիչների, դեռեւս անբավարար չի գնահատվել:

Մարզպետարաններն ընդունել են մարզի 2017-2025 թթ.-ի զարգացման ռազմավարություն, որով պարտավորվել են ապահովել ՀՆԱ-ի ցուցանիշի աճ հանրապետական միջինի նկատմամբ, գործազրկության թվի նվազեցում, ներդրումներ՝ գյուղատնտեսության ոլորտում, զբաղվածության ավելացում եւ այլն: Տարածքային կառավարման եւ զարգացման նախարարությունը մշակել է գնահատման նոր չափորոշիչներ՝ մարզպետների աշխատանքը զարգացման ռազմավարության իրականացման տարեկան հաշվետվությունների հիման վրա գնահատելու նպատակով:

Նախարարությունը Կառավարության հիշյալ որոշման մեջ փոփոխություններ կատարելու անհրաժեշտությունը հիմնավորել է նրանով, որ գործող որոշմամբ նախատեսված գնահատման չափորոշիչներում բացակայում են չափելի արդյունքները, որոնք «մասամբ լրացվել են մեթոդաբանություններով»: Նաեւ՝ գործող չափորոշիչները չեն բնութագրում 2016-2025 թվականների տարածքային զարգացման ռազմավարության կատարման ուղղությամբ արված աշխատանքների որակը:

2016-2025 թթ.-ի տարածքային զարգացման ռազմավարությամբ նախատեսվել են հետեւյալ չափորոշիչները՝

  • 2025 թ.-ի դրությամբ առանձին վերցված յուրաքանչյուր մարզում մեկ շնչի հաշվով ՀՆԱ-ն կգերազանցի հանրապետական ցուցանիշի 60%-ը եւ մեկ շնչի հաշվով ՀՆԱ-ի 70%-ից ցածր կգտնվի մարզերի բնակչության ոչ ավել քան 30%-ը։

  • 2025 թ.-ի դրությամբ բոլոր մարզերում միջին մասնագիտական եւ բարձրագույն կրթություն ունեցողների, ոչ գյուղատնտեսական ֆորմալ զբաղվածների եւ ակտիվ ձեռնարկությունների թվաքանակը կաճի առնվազն 10%-ով` համեմատած 2014 թ.-ի հետ:

Ներկայացված որոշման նախագծով առաջարկվում է Կառավարության որոշմամբ սահմանել այնպիսի չափորոշիչներ, որոնց չափելի ցուցանիշների կիրառմամբ կգնահատվի հաշվետու ժամանակաշրջանում 2016-2025 թվականների տարածքային զարգացման ռազմավարության կատարման գործընթացում մարզպետների կատարած աշխատանքի արդյունավետությունը:

Մարզպետների գործունեությունը գնահատելու է հանրապետության վարչապետը եւ գնահատականը հրապարակվելու է կառավարության պաշտոնական կայքում` մինչեւ հաշվետու տարվան հաջորդող տարվա մարտի 20-ը:

Գնահատման արդյունքներով` մինչեւ 25 միավորը գնահատվում է անբավարար, 25-ից մինչեւ 37,5 միավորը` բավարար, 37,5 միավորից բարձրը` լավ:

Գնահատմանը մասնակցելու են հետեւյալ նախարարությունները` տարածքային կառավարման եւ զարգացման, տնտեսական զարգացման եւ ներդրումների, գյուղատնտեսության, առողջապահության, աշխատանքի եւ սոցիալական հարցերի, կրթության եւ գիտության:

Հիշյալ նախարարությունները գնահատելու են մարզի վարչական տարածքում կատարված ներդրումների ծավալը, մարզում աշխատատեղերի թիվը, համայնքային բյուջեների սեփական եկամուտների հավաքագրման ցուցանիշը, աղբահանությունը եւ սանիտարական մաքրումը, համայնք-մասնավոր հատված համագործակցությունը, գյուղատնտեսությունում արդիական տեխնոլոգիաների ներդրումը եւ այլ ցուցանիշներ:

Ներկայացված կարգի համաձայն՝ մարզպետների կատարած աշխատանքները գնահատվելու են նախորդող տարվա փաստացի արդյունքների համեմատությամբ: Մեթոդական ուղեցույցով սահմանվելու են մարզպետների կատարած աշխատանքների վերաբերյալ հաշվետվությունների ուսումնասիրության ընթացակարգը, ինչպես նաեւ հատկացված առավելագույն միավորի շրջանակներում յուրաքանչյուր չափորոշիչին տրամադրվող միավորը եւ գնահատման առանձնահատկությունները:

Հաշվետու տարվա ավարտից հետո, մինչեւ տվյալ տարվա փետրվարի 15-ը, մարզպետները հաշվետվություններ են ներկայացնում տարածքային կառավարման եւ զարգացման նախարարություն, իսկ վերջինս դրանք տրամադրում է վերը թվարկված նախարարություններին: Աշխատանքային 7 օրվա ընթացքում նախարարությունները կազմում են եզրակացություն՝ նշելով գնահատման արդյունքում կազմված կողմնորոշիչ միավորները: Եզրակացությունը ներկայացվելու է մարզպետներին՝ ծանոթանալու եւ անհրաժեշտության դեպքում առարկություն ներկայացնելու համար:

Ներկայացված եզրակացությունները եւ հաշվետվությունները, իսկ առարկությունների դեպքում՝ նաեւ դրանց վերաբերյալ ամփոփաթերթը, տարածքային կառավարման եւ զարգացման նախարարությունում քննարկվելուց հետո ներկայացվելու է հանրապետության վարչապետի գնահատմանը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter