2017թ. նոյեմբերին խոշորացված Ախուրյան համայնքի 2018թ. բյուջեի հանրային քննարկմանը համայնքապետ Արծրունի Իգիթյանն առավելապես խոսեց այն ծրագրերից, որոնք պետք է իրականացվեն միացված 7 գյուղական բնակավայրերում՝ առանց հստակեցնելու դրանց մեկնարկի ժամկետը: Հայտարարվեց, որ զարգացման 5-ամյա ծրագրի վրա դեռ աշխատում են, եւ դրա հետ կապված քննարկումները կկազմակերպվեն հավանաբար երկու ամսից: Սա, իհարկե, չխանգարեց Արծրունի Իգիթյանին հավաքվածներին ներկայացնել նաեւ ապագայում իրականացվելիք որոշ ծրագրեր ու գաղափարներ՝ ստեղծելով տպավորություն, թե 7-8 ամիսների ընթացքում գրեթե բոլոր բնակավայրերում 10-12 ծրագիր է միաժամանակ մեկնարկելու:

Եվ այսպես, ի՞նչ ակնկալիքներ կարող են ունենալ Ախուրյանի կազմում ընդգրկված Կառնուտ, Բասեն, Ջրառատ, Հովիտ, Կամո, Արեւիկ եւ Այգաբաց համայնքները գարունը բացվելուն պես, երբ հնարավոր կլինի շինարարական աշխատանքներ իրականացնել: Կամո գյուղում համայնքային կենտրոնի կառուցման ծրագրի համար նախկին համայնքապետի տնտեսած 24 մլն դրամին խոշորացված համայնքի ղեկավարը պատրաստվում է ֆոնդային բյուջեից 35 մլն դրամ ավելացնել: Համայնքային կենտրոնի նախագծա-նախահաշվային աշխատանքներն արված են, եւ պահանջվող 70 մլն դրամի պակասող 11 մլն դրամը հույս ունեն ստանալ կառավարությունից:

Բասեն գյուղի մանկապարտեզի երկրորդ հարկը հիմնանորոգելու եւ կահավորելու արդյունքում հնարավոր կլինի եւս երկու խումբ բացել: Ծրագիրը համայնքապետարանն իրականացնելու է «Դեպի Հայք» բարեգործական հասարակական կազմակերպության հետ համատեղ՝ 16 մլն դրամի սահմաններում, որից 6 մլն դրամը լինելու է համայնքի ներդրումը: Արծրունի Իգիթյանը խոսեց նաեւ Բասեն համայնքում խմելու ջրագծի 7 կմ հատվածի հին խողովակները նորով փոխարինելու մասին: Թե երբ կլինի ծրագիրը եւ ինչ կարժենա՝ կոնկրետ հաշվարկներ չկան:

Անդրադառնալով Ջրառատ բնակավայրին, Արծրունի Իգիթյանը խոսեց մանկապարտեզի անհրաժեշտության մասին, թեպետ դպրոցում կա գործող նախակրթարան: Պրն Իգիթյանին Ջրառատի վարչական ղեկավարը ներկայացրել է նաեւ դպրոցի խնդիրները, եւ համայնքապետը հանրային քննարկման ժամանակ հայտարարեց, որ անպայման օժանդակելու է եւ դպրոցի հիմնանորոգման համար ներդրող գտնելու դեպքում գումար է տրամադրելու նաեւ համայնքային բյուջեից:

Քննարկմանը ներկա բնակիչներից մեկը նկատեց, որ դպրոցները համայնքային ենթակայության չեն եւ բյուջեի գումարները նախընտրելի է ուղղել ոչ թե պետական հաստատության, այլ համայնքի առաջնահերթ խնդիների լուծմանը: «Մեր երեխեքն են էնտեղ հաճախողը եւ մենք պարտավոր ենք ամեն ինչ անել,-արդարացավ համայնքապետը,-ես միշտ էլ, երբ պետք է եղել, Ախուրյանի դպրոցներին օգնել եմ»: «Երեխաներին լոզունգ դարձնելով` պետք չէ կատարել ծախսեր, որոնք ձեր իրավասության շրջանակներում չեն եւ պատվիրակված լիազորությունների մեջ չեն մտնում»,-նկատեց մի բնակիչ: Հանրային քննարկմանը ներկա Գյումրու ավագանու անդամ Լեւոն Բարսեղյանն էլ իր հերթին խորհուրդ տվեց համայնքապետին պետական հիմնարկներին համայնքային բյուջեից գումարներ հատկացնելու դեպքում անպայման խորհրդակցել իրավաբանի հետ, որ չստացվի, թե վերազանցել է իր լիազորությունները:

Խոշորացված համայնքի Արեւիկ բնակավայրում մանկապարտեզի նախկին շենքի երկրորդ հարկը հեռացնելուց հետո հնարավոր կլինի այն հիմնանորոգել եւ երեխաներին տնակներից տեղափոխել քարաշեն կառույց: Ըստ նախագծա-նախահաշվային փաստաթղթերի` 156 մլն դրամ է պահանջվում աշխատանքներն իրականացնելու համար: Նոյեմբերյանից շինարարական մի կազմակերպություն մրցույթը շահել է 113 մլն դրամով եւ գարունը բացվելուն պես աշխատանքները կսկսվեն: Այս ծրագիրը կապ չունի խոշորացված համայնքի հետ եւ մեկնարկել է Արեւիկ գյուղի նախկին համայնքապետի օրոք:

Այգաբաց բնակավայրի մանկապարտեզի հիմնանորոգման համար արդեն իսկ խոշորացված համայնքի բյուջեից պատրաստվում են տրամադրել 12 մլն դրամ, եւ ամենաուշը ապրիլ ամսից երեխաները կարող են վերսկսել հաճախումները: Ապագայի ծրագրերում նշմարվում է Կառնուտ, Բասեն, Հովիտ եւ Ջրառատ գյուղերի գազիֆիկացման ծրագիրը, որի համար կպահանջվի 500-ից 600 մլն դրամ: Արծրունի Իգիթյանը գազիֆիկացման թեմային զուգընթաց հիշեց, որ Բասենի մանկապարտեզում տեղադրված պելետի վառարանն այս ձմեռ չի աշխատել եւ ջեռուցման հարցն իրենք են կարգավորել:

«Ստացվեց այնպես, որ պելետի վառարանն իրեն չի արդարացնում, եւ մենք մտածում ենք այլընտրանքի մասին: Մեկ տոննա քարածուխը 90 հազար դրամ է, սեզոնը հանելու համար 70 հազարի պելետ պիտի վառեն, երեւի արժե մտածենք էս ուղղությամբ, թե որն է ձեռնտու, մանավանդ որ էս տարի համ էդքան պելետ չստացան, համ էլ վառարանը չկարողացան աշխատացնել»,-նկատեց համայնքապետը:

Արծրունի Իգիթյանը խոսեց նաեւ ապագայում իրականացվելիք երեք խոշոր ծրագրերի մասին՝ մասնագիտացված տեխնիկայի ձեռք բերում, արեւային կայանների տեղադրում եւ սերմերի զտման կայանի կառուցում: Ծրագրերից յուրաքանչյուրը տատանվում է 250-300 մլն դրամի սահմաններում: Համայնքը պատրաստ է տոկոսային հարաբերությամբ ներդրումներ կատարել այս ծրագրերում, եթե կարողանա գտնել աջակիցներ:

Համայնքների տրանսպորտային ցանցի վերաբերյալ որեւէ ծրագիր չներկայացվեց, միայն նշվեց, որ 7 համայնքն էլ ունեն կարգավորված գրաֆիկով աշխատող տրանսպորտ: Հանրային տրանսպորտ ունենալու հարցն ինչպես նախկինում, երբ առանձին համայնք էր, այնպես էլ խոշորացումից հետո անլուծելի է մնում Ախուրյան բնակավայրի համար: Ինչպես նախկինում, հիմա էլ ներկա ղեկավարությունը որեւէ ելք ստեղծված իրավիճակից չունի:

Ավագանու անդամներից մեկին հետաքրքրում էր, թե ինչու է համայնքապետարանը պայմանագիր կնքել եւ 105 հազարական դրամ վճարում Ախուրյանի թիվ 1 դպրոցում ձեւավորված պարային խմբերի երկու պարուսույցներին. «Ես չեմ հասկանում` ինչու պիտի մանկապարտեզի տնօրենը ստանա 110 հազար դրամ, դայակը ստանա 105 հազար, պարուսույցն էլ, որ իր համար անհատ է, ոչ մի կապ չունի արվեստի դպրոցի հետ, եկել իր համար խումբ է բացել դպրոցում, ստանա 105 հազար դրամ՝ դայակի աշխատավարձի չափ»: Հարցին սպառիչ պատասխան չստանալով՝ վերջինս խոստացավ խնդրին անդրադառնալ առաջիկա ավագանու նիստին՝ հունվարի 29-ին: