Ախուրյան խոշորացված համայնքի հունվարի 29-ի ավագանու նիստը, որ սկսվել էր կեսօրին, ձգվեց մինչեւ աշխատանքային օրվա ավարտը: Օրակարգում ընդգրկված 14 առաջարկից ավագանին հասցրեց քննարկել 7-ը, այն էլ ոչ թե հերթականությամբ, այլ՝ որոշակի առաջնահերթությունից ելնելով: Բայց սա ավագանու նիստի միակ բացառիկությունը չէր: Նիստը սկսելուց 10 րոպե անց, երբ պարզվեց, որ առնվազն երեք լրատվամիջոց պատրաստվում է լուսաբանել, Ախուրյան համայնքը նախկինում 21 տարի ղեկավարած Արծրունի Իգիթյանը նշեց, որ «հյուրեր» ունեն ու որոշեց քվեարկության դնել հարցը՝ նիստն անցկացնել դռնբաց, թե դռնփակ: Ավագանու 15 անդամից նիստին այդ պահին ներկա էին 11-ը (եւս 2 անդամ միացան ուշացումով), նրանցից 6-ը քվեարկեց նիստը դռնբաց անցկացնելու օգտին: Համայնքի ղեկավարը հայտարարեց, որ «հյուրերը» կարող են ներկա գտնվել նիստին:

Թերեւս ամենածավալուն քննարկումները եղան 2018թ-ի բյուջեի շուրջ: Բազմաթիվ հարցերից զգացվեց, որ ավագանու անդամների 90 տոկոսը նախօրոք չի ուսումնասիրել բյուջեի նախագիծը, նրանցից շատերը ներկա չէին նաեւ հունվարի 26-ի հանրային քննարկմանը: Խոշորացումից հետո համայնքում միավորվել է 8 բնակավայր: Ներկայում 17 հազար բնակիչ ունեցող համայնքի բյուջեի եկամտային մասը 483 մլն դրամ է, ծախսայինը՝ 556 մլն դրամ: Պետության կողմից հատկացվող դոտացիան պակասել է 500 հազար դրամով՝ կապված բնակչության թվի նվազման հետ: Ըստ բնակավայրերի բնակչության թվի նվազման հստակ պատկերը համայնքի ղեկավարը չուներ՝ հրապարակեցին միայն Ախուրյանի տվյալները՝ մեկ տարվա ընթացքում 9 հազար 317 բնակչից նվազել է 9 հազար 256-ի:

Համայնքի խոշորացման արդյունքում վարչական ապարատը 7 բնակավայրում կրճատվել է: Նախկին համայնքապետարանների աշխատակազմը կրճատվել է 8-ով՝ 35-ից նվազելով 27-ի, արդյունքում տնտեսել են 26 մլն դրամ: Բյուջեի քննարկման ժամանակ խոսվեց մի քանի ծրագրերի մասին, որոնց մի մասի հիմքը դրվել էր դեռեւս նախկին համայնքապետերի օրոք՝ Արեւիկի մանկապարտեզի վերակառուցումը, Բասենի մանկապարտեզի երկրորդ հարկի հիմնանորոգումը եւ այլն: Երեքժամյա քննարկումից հետո, ավագանին հաստատեց բյուջեն` 12 կողմ եւ մեկ դեմ ձայների հարաբերակցությամբ: Դեմ քվեարկած ավագանու անդամն ընտրված էր Կառնուտ գյուղից: Նիստի ժամանակ նա որեւէ կերպ չարտահայտեց իր դժգոհությունը, սակայն դեմ քվեարկելը հետո մեկնաբանեց Կառնուտում որեւէ աշխատանք չիրականացնելու հանգամանքով:

Կառնուտ գյուղում 2018թ-ին համայնքապետարանի կողմից իրականացվելիք որեւէ ծրագրի մասին չէր խոսվել նաեւ բյուջեի հանրային քննարկման ժամանակ, դրա փոխարեն ավագանու նիստի ավարտին արագացված կարգով՝ շրջանցելով մյուս հարցերը, քննարկվեց օրակարգի 14-րդ կետը, որ վերաբերում էր նշված գյուղի վարչական տարածքում գտնվող անդեզիտի հանքի ընդլայնմանը: Հանքը շահագործում է ճանապարհաշինությամբ զբաղվող «Մերձմոսկովյան» ԲԲԸ-ն: Թեպետ նախագծում նշված էր, որ եղել է հանրային բաց լսում հայտի հետ կապված, սակայն հստակեցված չէր, թե երբ եւ որտեղ, համայնքների խոշորացումից առաջ, թե հետո: Օրակարգի 14-րդ կետը ներկայացրեց նույն կազմակերպության աշխատակից, ավագանու անդամ Լադիկ Ղազարյանը: Ավագանին առանց լրացուցիչ հարցադրումների կողմ քվեարկեց առաջարկին, քանի որ աշխատանքային օրն ավարտվում էր:

Ավագանու նիստին ներկա էր նաեւ տեր Կորյուն քահանան եւ նրա խնդրանքով օրակարգի 9-րդ կետի քննարկումը եւս առաջ մղվեց՝ շրջանցելով մյուսներին: Նախքան խոշորացումը, Արեւիկ համայնքում մշտապես ծրագրեր իրականացնող «Կարիտաս» բարեսիրական ՀԿ-ն դիմել էր նախկին համայնքապետին՝ համաֆինանսավորմամբ, գյուղում գործող կաթողիկե եկեղեցում ջերմամեկուսիչ աշխատանքներ իրականացնելու նպատակով: Կազմակերպությունը պատրաստվում է ներդնել 6 մլն դրամ եւ 1 մլն դրամ աջակցություն է ակնկալում համայնքից:

Խոշորացումից հետո հարցն օրակարգից չէր հանվել՝ ընդհակառակը, օգտվելով առիթից, ջեռուցման ծախսի բացերը լրացնելու նպատակով դիմել էր նաեւ Ախուրյանի եկեղեցու քահայանապետը: Ավագանին որոշեց բավարարել Արեւիկ գյուղի եկեղեցուն հատկացվելիք 1 մլն դրամի եւ Ախուրյանի եկեղեցու ջեռուցման պարտքը փակելու նպատակով 200 հազար դրամի խնդրանքը:

Օրակարգում ընդգրկված 5-րդ առաջարկի քննարկումը տեղափոխվեց հաջորդ նիստի օրակարգ: Մարզպետին կից գործող երիտասարդական խորհրդի կազմում համայնքից երիտասարդ ներկայացուցիչ ունենալու համար մարզպետարանի հայտարությանն արձագանքած մեկ հայտատուի հարցը քննարկելիս եղան տարաձայնություններ: Արեւիկ գյուղից ընտրված ավագանու անդամ Հովհաննես Մաթոսյանը նկատեց, որ նորմալ իրազեկում չի իրականացվել, եւ վստահ է, որ մյուս բնակավայրերի երիտասարդները տեղեկացված չեն, այլապես չէին ունենա մեկ հայտատու Ախուրյանից:

Նա առաջարկեց հարցի քննարկումը հետաձգել, կազմակերպել նորմալ իրազեկում եւ ժամանակ տալ գյուղերի երիտասարդներին հանդես գալ նախաձեռնությամբ: 5 կողմ, 2 դեմ, 6 ձեռնպահ ձայների հարաբերակցությամբ հարցի քննարկումը հետաձգվեց: 11 կողմ, 2 ձեռնպահ ձայների հարաբերակցությամբ ավագանին քվեարկեց լրացուցիչ իրազեկման եւ հարցն ավագանու հաջորդ նիստի օրակարգում ընդգրկելու օգտին:

Այս ավագանու նիստում քննարկվեց նաեւ «Ախուրյանի կոմունալ սպասարկում եւ բարեկարգում» համայնքային ոչ առեւտրային կազմակերպության հաստիքացուցակը եւ տնօրենի թեկնածությունը հաստատելու հարցը: Ավագանին միաձայն կողմ քվեարկեց տնօրենի պաշտոնում համայնքապետի առաջադրած թեկնածուի՝ Հենրիկ Մազմանյանի օգտին: Արագ կարգով քննարկվեց եւ միաձայն հաստատվեց նաեւ օրակարգի 10-րդ հարցը՝ սոցիալական ներդրումների եւ տարածքային զարգացման ծրագրին մասնակցության հայտը՝ 8 միավոր տեխնիկա գնելու համար: Ծրագրի արժեքը 250 մլն դրամ է, համայնքի ներդրումը կազմելու է 30 մլն դրամ:

Ավագանու նիստի ժամանակ քննարկվեց նաեւ ապառքների հարցը: 8 բնակավայրից պարտքի կուտակման առումով ցուցակը գլխավորում է Ախուրյանը, 2-րդ պատվավոր տեղում Կամո գյուղն է (39 մլն դրամ): Հենց այս բնակավայրից էլ նոր ձեւավորված համայնքապետարանը որոշել է սկսել դատական վարույթների հարուցման գործընթացը: Կամո գյուղի 56 ընտանիքի գործերը շուտով կհայտնվեն դատարանում, եթե չմարեն կուտակած պարտքը` տույժ-տուգանքներով: Բոլոր պարտքատերերին ուղարկվել են նախազգուշական գրություններ:

Չքննարկված օրակարգային 6 որոշումները կընդգրկվեն փետրվարի 12-ին կայանալիք նիստի օրակարգում: