Շաբաթ, 26 մայիսի

«Արևիկ» ազգային պարկի հարակից տարածքում ոսկի են որոնելու



Սյունիքի մարզի Խդեբանցի հանքերևակման տարածքում 2018-2020թթ. երկրաբանահետախուզական աշխատանքներ են կատարվելու՝ գնահատելու հանքավայրի ոսկու պաշարները:

2017 թվականի ամռանը հիմնադրված «Նիգ մայնինգ» ՍՊԸ-ն Բնապահպանության նախարարություն է ներկայացրել նախագիծը, որով նախատեսվող երկրաբանահետախուզական աշխատանքների տարածքն ընդգրկում է Մեղրու տարածաշրջանի հարավ-արևելյան մասը. հյուսիս-արևելքում սահմանափակվում է Մեղրու լեռնաշղթայով, հարավում` Արաքս գետով, արևմուտքում` Կամաքարի լեռնաշղթայով: Տեղանքը լեռնային է, խիստ կտրտված ռելիեֆով: Ուսումնասիրվելիք հանքերևակումը գտնվում է լեռնաշղթայի բարձրադիր մասերում և կապված է բնակավայրերի հետ` գրունտային և ասֆալտապատ ավտոճանապարհներով:

Ավելի կոնկրետ՝ Խդեբանցի հանքերևակումը տեղակայված է Շվանիձոր գյուղից 7 կմ դեպի հյուսիս և Լիճք գյուղից 20 կմ դեպի արևելք: Այն զբաղեցնում է 5.3 կմ2 տարածք։

Խդեբանցի հանքաերևակման համար ուսումնասիրվող տարածքը գտնվում է Հայաստանի Մեղրու ֆլորիստիկ շրջանի հարավային հատվածում և գրավում է Մեղրու լեռնաշղթայի գագաթնամերձ տարածքները՝ ծովի մակերևույթից 1600-ից 2500մ բացարձակ բարձրությունների վրա, որով էլ պայմանավորվում է հանքաերևակման դաշտի կենսաբազմազանությունը:

Չնայած նախագծում նշվում է բուսական աշխարհի բազմազանության, ինչպես նաև էնդեմիկ և Կարմիր գրքում գրանցված  տեսակների մասին, որոնց ընդհանուր թվաքանակը 1680  է, որից 26-ը բնաշխարհիկ, իսկ 112-ը գրանցված է ՀՀ Կարմիր գրքում, այդուհանդերձ, ընկերությանը համոզված է, որ որևէ վնաս բնությանն իրենց գործունեությամբ չեն տալու: Ավելին, արձանագրվել է, որ լայնատերև խիտ անտառները, առանձին ժայռային ցցվածքները, արագընթաց գետակներով նեղ, խորը կիրճերը, խոնավ բացատները, քարքարոտ, զառիվայր լանջերը լավ ապաստարան են տարածաշրջանում բնակվող կենդանական աշխարհի համար: Հատկապես բազմազան է անողնաշարավորների ֆաունան:    

«Խդեբանցի հանքերևակման  դաշտի տարածքում իրականացված դաշտային այցելություններով, ինչպես նաև առկա գրականական տվյալների համադրմամբ և նույնականացմամբ եզրակացված է, որ անմիջապես նախատեսվող գործունեության տարածքում առանձնահատուկ պահպանության կարիք ունեցող, վտանգված, խոցելի, անհետացման եզրին գտնվող և ՀՀ Կարմիր գրքում կամ ԲՊՄՄ կարմիր ցուցակում գրանցված բուսատեսակները բացակայում են,- նշվում է նախագծում,-Խդեբանցի հանքերևակման դաշտի երկրաբանական ուսումնասիրությունների համար հատկացված տարածքում ուսումնասիրությունների ժամանակ կենդանիների ցամաքային միգրացիոն ուղիներ և գոտիներ, ինչպես նաև ՀՀ Կարմիր գրքում գրանցված կենդանիների տեսակներ չեն հայտնաբերվել»: 

Խդեբանցի հանքերևակման դաշտի երկրաբանական ուսումնասիրությունների համար հայցվող տարածքը հարավում սահմանակից է «Արևիկ» ազգային պարկի տարածքին, հարավ-արևելքում և հյուսիս-արևմուտքում հայցվող տարածքի և ազգային պարկի սահմանները հեռու են իրարից:

«Նիգ մայնինգ» ՍՊԸ-ի բաժնետերը 24-ամյա Վարդգես Հարությունի Ասլանյանն է՝ գրանցված Արմավիրի մարզի Ոսկեհատ գյուղում: «Նիգ մայնինգ» ՍՊԸ-ի գրանցման օրը՝ 2017 թվականի հուլիսի 6-ին նույն հասցեում՝ Խորենացի 27, 64-րդ բնակարանում, գրանցվել է «Վիվա մայնինգ» ՍՊԸ-ն, որը, անվանումից կարելի է ենթադրել, որ նույնպես հանքարդյունաբերությամբ է զբաղվելու: 

«Վիվա մայնինգ» ՍՊԸ-ի բաժնետերն էլ Անուշ Կառլենի Հովհաննիսյանն է՝ նունպես գրանցված ընկերության հասցեում: Անուշ Հովհաննիսյանի հետ նույն հասցեում է  ապրում 38-ամյա Մուշեղ Վարդգեսի Ասլանյանը, ըստ ամենայնի՝ Անուշ Հովհաննիսյանի որդին է:  


Գլխավոր էջ



Մեկնաբանություններ (2)
1. Գեւորգ Կիրակոսյան10:39 - 14 փետրվարի, 2018
Իսկ էտ անուշիկներին մեկը չի հարցնում թե մինչեւ հիմա իրենք ինչով են զբաղվել, քանի տեղ են ոսկի գտել? Էս ազգն օրն օրի վրա խելառվում է աչքիս, պարապությունից ու պակասությունից է երեւի, կամ ագահության վիրուս է ընկել մեջներս: Ջեկ Լոնդոնի «Ոսկու տենդը» - ն եմ հիշում ակամա,՝ որտեղ գրագիր, ձախորդ հաշվապահ, գրագետ ու անգրագետ, համբալ ու ինտիլիգենտ թողնում են իրենց գործն ու քլունգ, լոպատկա առած, նետվում դեպի Ալյասկա ու «Էլդորադո»: Կեսը ճամփեքին են սառում, մյուսները սովից են կոտորվում, բայց գնում ու գնում են - սառուցյալ երկիրը քանդելու ու հարստանալու ...իսկ մեր երկիրը սառուցյալ չէ, քանդողներն էլ էքսկավատորներով են ոչ թե քլունգով: Երբ խելքի կգան հայերը?
2. Մինաս13:24 - 16 փետրվարի, 2018
Իսկապես, ինչու մեկը չի ֆայմում հարցնի, թե այ տատի ջան, ոսկու հանքի հետ դու ինչ գործ ունես, կամ ոնց ես իմացել որ էտ ինչ քամբախում ոսկի կարող է լինել? Սա պարզապես նշանակում է, որ գործ ունենք պետական մակարդակի կոմիզմի հետ: Իսկ ինչու են այդ հեր օրհնած փողատերերն ու «ձեռներեցները» թաքնվում իրենց անմեղ ու անտեղյակ տատիկների քամակին, եթե մաքուր մարդիկ են? Իսկ գուցե այսպիսի վերսիա արժե քննարկել- հանքը բացում էս, տուշն ու աղմուկը գցում առասպելական պաշարների մասին, վարկեր ու պարտքեր վերցնում ու ... մեջտեղից ցրվում: Թող խեղճ նանեին միջազգային դատարան քարշ տան! Սրանից էլ լավ բիզնես ծրագիր!
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ