HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ուսուցիչները դիմանում եւ սպասում են, որ իրենց դպրոցում էլ փոփոխություններ կլինեն

Շամլուղի միջնակարգ դպրոցը իր 125 աշակերտով այժմ գործում է 39 տարի առաջ կառուցված եռհարկ շենքի 2-րդ մասնաշենքում, որը տնօրեն Ս. Սոսինյանի ասելով` վերջին անգամ մասնակի վերանորոգման է ենթարկվել 1990թ.-ին: Դպրոցը միակ կրթական հաստատությունն է: Շամլուղը նույնիսկ մանկապարտեզ չունի, թեև հաշվառված 60-ից ավելի մանկապարտեզահասակ երեխա ունի:

Ախթալա խոշորացված համայնքի մեջ մտնող Շամլուղ բնակավայրը նախկինում ունեցել է բազմազգ բնակչություն: Այստեղ ապրել են հայեր, վրացիներ, ադրբեջանցիներ, հույներ, ռուսներ, օսեր, իտալացիներ, ուկրաինացիներ և բելառուսներ: Հանքարդյունաբերական Շամլուղը նախկինում ունեցել է զարգացած կրթամշակութային համակարգ: Դեռ 1908թ.-ից այստեղ բացվել է միջնակարգ դպրոց, մանկապարտեզներ՝ հայերեն-ռուսերեն հոսքերով, կինոթատրոն, մշակույթի պալատ, դիսկոտեկ, գրադարան և այլ հաստատություններ: Միջնակարգ դպրոցում 1970-ական թվականներին 800-ից ավելի աշակերտ է սովորել: Դպրոցի 1-ին մասնաշենքը Շամլուղում կառուցվել է 1959թ.-ին, 1979թ.-ին կառուցվել է 2-րդ մասնաշենքը: Արդեն 59 տարվա վաղեմություն ունեցող 1-ին մասնաշենքը կիսաքանդ վիճակում է: Շենքի նկուղային հարկում գտնվող մարզադահլիճից միայն ավերակներ են մնացել:

Ձախից՝ գործող մասնաշենքը, աջից՝ 1-ին մասնաշենքը

Երբ դասամիջոցներին աշակերտները տեղաշարժվում են եռհարկ դպրոցի դասասենյակներում ու միջանցքներում, թանձր փոշին կախվում է օդում: Տնօրենը բացատրում է, որ դա փայտե վառարանների փոշին է: Իրականում քամիների օգնությամբ ինչպես ողջ Շամլուղի, այնպես էլ դպրոցի վրա ամեն օր նստում է Շամլուղի հանքերից Ախթալայի ԼՀԿ-ի բաց բեռնատարներով լեռնահարստացման ֆաբրիկա տեղափոխվող հանքաքարի փոշին:

ԼՀԿ-ի տնօրինությունը հանքաքարի տեղափոխման անվտանգության որևէ միջոց չի ձեռնարկում: Շամլուղ մտնող ճանապարհին հանքաքարի նստած փոշու հսկա շերտն անձրևներին ցեխ է դառնում և ավտոմեքենաների ու ոտքի հետ տեղափոխվում է բնակելի տների, այդ թվում նաև դպրոցի տարածք: Դպրոցում դասարանները մաքրում են 2-3 օրը մեկ: Տնօրեն Սերինե Սոսինյանի խոսքով՝ դպրոցի բյուջեի 36 մլն դրամի 33 մլն դրամը վճարվում է որպես աշխատավարձ: Մնացած 3 մլն դրամը ծախսվում է վառելիքի և հոսանքի համար: Մաքրման նյութեր գնելու համար փող չի մնում։ Նկատեցինք, որ աշակերտները և ուսուցիչները վերարկուներով են նստած դասարաններում:


Տնօրեն Սերինե Սոսինյանը

«Մոտավորապես 750 հազար դրամի վառելափայտ ենք գնել, ամենաքիչը 35 խմ փայտ է մեզ անհրաժեշտ լինում: Առանց խնայելու դասարաններին փայտ է տրամադրվում, վառարանները նորմալ վառվում են։ Լուսամուտները մենք մեր միջոցներով փորձել ենք ջերմամեկուսացնել, բայց դասարանների դռները անցքեր ունեն: Դրա համար ջերմության կորուստներ են լինում, և դասասենյակները չեն տաքանում»,- բացատրեց տնօրենը:

Դպրոցում ինձ հանդիպած աշակերտներից մեկը 8-րդ դասարանում սովորող Ջոն Մալաքյանն էր:  

«Դե, ոնց ասեմ, դպրոցը քանդված է: Զուգարանները, չնայած անցած, թե նախանցած տարի վերանորոգել էին, երեխաները քանդում են ու այդպես էլի դպրոցի վիճակը վատ է մնում: Փոշին շատ է դպրոցում: Սպորտային դահլիճ էլ չունենք: Բոլոր դասարաններն իրար նման չեն: Օրինակ՝ մեր 8-րդ դասարանի ամբողջ մանրահատակը դասարանը տաքացնելու համար վառել են»,- պատմեց Ջոնը:

«Արևոտ դասասենյակ եմ երազումհատակը գեղեցիկ լինի, վառարանը կարգին վառվի: Մինչև 4-րդ դասարանն արևոտ դասարանում եմ սովորել: Բոլորն էլ կուզեն առանց վերարկուի նստել դասերին, բայց ցուրտ է, մրում ենք»,- բացատրեց 8-րդ դասարանից մյուս աշակերտը՝ Սիլվիկ Ներսիսյանը:

«Ես կասեի ընդհանուր դպրոցի վիճակը նորմալ չի, վերանորոգված չի: Ցանկալի կլինի, որ մեր դպրոցը գազաֆիկացվի և նորմալ ջեռուցում լինի»,- ասում է 11-րդ դասարանցի Օվսաննա Առաքելյանը:

«Սա մեր հնարավորությունների սահմանում կահավորված դասարաններից է: Ես՝ որպես ուսուցիչ, իհարկե, վատ եմ գնահատում դասարանների վիճակը: Երեխաները, փառք Աստծո, վատ չեն սովորում, գերազանցիկ սովորող աշակերտներ չունենք, բայց լավ սովորող աշակերտներ ունենք: Սկսած տանիքից, վերանորոգման կարիք կա»,- հայտնեց ֆիզիկայի ուսուցիչ Արթուր Հովակիմյանը:

Ծայրահեղ վատ վիճակում են մաթեմատիկայի և համակարգչային կաբինետները: Մաթեմատիկայի կաբինետի մանրահատակը գոյություն չուներ: Համակարգչային կաբինետում երեք համակարգիչ կար.

«Էսպես, թե էնպես մեր ոչ բոլոր համակարգիչներն են աշխատում, որն էլ աշխատում է, լավ չի աշխատում: Չորս համակարգիչ ունենք: Ժամկետանց են, ամենահին մոդելի, երևի 2000 թ.-ի համակարգիչներ են»,- բացատրեց տնօրեն Սոսինյանը:

Հակասանիտարական վիճակում էին աշակերտների զուգարանները, ուսուցիչների զուգարանը կիսաքանդ էր: Դպրոցի մանկավարժական կոլեկտիվը համալրված է երիտասարդ մանկավարժներով: «Ուսուցիչների սերնդափոխությունը կատարվել է վերջին երեք տարիներին»,- ասաց տնօրենը:

Երիտասարդ ուսուցիչները նույնպես դժգոհեցին  քանդված դասասենյակներից, փոշուց և դպրոցի անհրապույր վիճակից:

«Մեր աշակերտներն էլ են արժանի մայրաքաղաքի երեխաների նման բարեկարգ և մաքուր դպրոցում սովորելու: Վերանորոգման հարցում մենք կառավարությունից ձեռքներս լվացել ենք: Երևի մեր դպրոցի նման ծանր վիճակում գտնվող դպրոցներ Հայաստանում շատ կան: Ես՝ որպես զինվորական, գտնում եմ, որ ավելի լավ է դպրոցը այս վիճակում լինի, բայց առաջնագծում զինվորի մոտ զենքը չպակասի: Բայց մեր երկրի ապագան սկսվում է նաև դպրոցից, եթե մեր երկրի մեծահարուստներին ժողովրդի վիճակն ու երկրի ապագան հետաքրքրում է, թող ամենքը մի երկու կոպեկ դնեն, դպրոցը վերանորոգեն»,- ասաց զինղեկ Արամ Սահակյանը:


Զինղեկ Արամ Սահակյանը

Հայոց լեզվի ուսուցչուհի Աղավնի Բոշյանի խոսքով՝ դպրոցի պայմաններն անբարենպաստ են երեխաներին նորմալ ուսուցանելու համար: «Դպրոցի թափթփված վիճակը բնականաբար կազդի դասապրոցեսի վրա, բայց ուսուցիչներն ամեն ինչ անում են, որ չազդի: Ես հույս ունեմ, որ մեր դպրոցում փոփոխությունները հնարավոր են, դիմանում և սպասում ենք փոփոխություններին»,- ասաց ուսուցչուհին:

Տնօրեն Սոսինյանը նշեց, որ դպրոցում աշխատում է 17 մանկավարժ, դպրոցն ունի 13 դասասենյակ, որոնցից օգտագործվում է 11-ը:

«Մարզպետարանում բոլորն էլ գիտեն մեր դպրոցի վիճակի մասին: Սպորտդահլիճի վիճակի մասին նույնպես տեղեկացրել եմ: Խոստումներ չեն տվել, որովհետև բոլորս էլ գիտենք մեր երկրի վիճակը»,-ասաց տնօրենը:

Վերջինս հայտնեց նաևոր վերջին 2 տարիներին Լոռու մարզպետարանի աշխատակազմի կրթության և սպորտի վարչության պետ Մ. Սայադյանը  Շամլուղի միջնակարգ դպրոց չի այցելել:

Գլխավոր լուսանկարում՝ դպրոցի մարզադահլիճը

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter