HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տրդատ Մուշեղյան

«Կրեմլյան ցանկի» հրապարակումից առաջ արձանագրվել է գումարների մեծ ներհոսք դեպի Ռուսաստան

Sberbank Private Banking ծառայությունը ընթացիկ տարվա հունվարին անսպասելի մեծ քանակությամբ գումարների ներհոսք է արձանագրել արտերկրից դեպի Ռուսաստան, այն բանից առաջ, երբ ԱՄՆ-ի ֆինանսների նախարարությունը հրապարակել է «կրեմլյան ցանկը»:

Sberbank Private Banking ծառայության տնօրեն Եվգենյա Տյուրիկովան Ведомости-ի հետ զրույցում կարծիք է հայտնել, որ «կրեմլյան ցանկում» հայտնված անձինք նախօրորք կանխատեսել են կատարվելիքը և իրենց գումարները տեղափոխել են Ռուսաստան:

Տյուրիկովայի խոսքով՝ այս տարվա հունվարի մի քանի շաբաթների ընթացքում «Сбербанк»-ի տարբեր ստորաբաժանումներում գումարների ներհոսքը, նախորդ տարվա նույն ժամանակահատվածի համեմատ, աճել է երեք անգամ: Գումարի հստակ չափը Տյուրիկովան չի նշել, սակայն ասել է, որ խոսքը միլիոնավոր դոլարների մասին է:

«Հունվարին գումարները հիմնականում փոխանցվել են Շվեյցարիայից: Աննշան քանակությամբ գումարների նորհոսք է արձանագրվել նաև Ավստրիայից և Մեծ Բրիտանիայից»,- հայտնել է Տյուրիկովան:

Հիշեցնենք, որ հունվարի 30-ին ԱՄՆ-ի ֆինանսների նախարարությունը հրապարակել է Ռուսաստանի բարձրաստիճան պաշտոնյաների և ըստ ԱՄՆ-ի կառավարության՝ Կրեմլին մոտ կանգնած մեծահարուստների ցանկը: «Կրեմլյան ցանկ» անունը ստացած զեկույցում ներառված էին Ռուսաստանի նախագահի աշխատակազմի պաշտոնյաները, վարչապետ Դմիտրի Մեդվեդևի գլխավորությամբ՝ ամբողջ նախարարական կաբինետը, իրավապահ մարմինների, Պետդումայի, Դաշնային խորհրդի, պետական ընկերությունների և բանկերի ղեկավարները: Ռուսաստանաբնակ մեծահարուստներից ցանկում ընդգրկվել էին նաև Սամվել Կարապետյանը և Դանիլ Խաչատուրովը:

«Կրեմլյան ցանկում» հայտնված անձինք դեռևս ոչ մի սահմանափակումների չեն ենթարկվի, սակայն ԱՄՆ-ի ֆինանսների նախարար Սթիվեն Մնուչինը հայտարարել էր, որ ցանկում ներառվածների վրա պատժամիջոցներ կկիրառվեն մոտ ապագայում:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter