HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Երանուհի Սողոյան

Փլուզված հանրակացարանի բնակիչները հրաժարվում են սենյակները լքելուց՝ պահանջելով բնակարան Գյումրու կենտրոնում

Գյումրու Գարեգի Նժդեհ փողոցում գտնվող կիսափուլ հանրակացարանի շենքում այսօր գիշերը, ժամը 03-ի սահմաններում գրանցվել է փլուզում: Փլվել են չբնակեցված հատվածի 3-րդ եւ 4-րդ հարկերի երկաթբետոնյա սալերը: Շենքը նախկինում պատկանել է Տեքստիլ կոմբինատին: Այստեղ երկրաշարժից առաջ եւ հետո հիմնականում բնակվել են կոմբինատի աշխատակիցները, թեպետ աղետից տնազուրկ եւ կոմբինատի հետ որեւէ կապ չունեցող այլ ընտանիքների էլ կարելի էր հանդիպել: 4-րդ աստիճանի վթարայնության շենքում անցած 30 տարիների ընթացքում բազմիցս փլուզումներ են եղել:

Ահազանգով տարածք եկած փրկարարները տարհանել են 11 բնակչի, այդ թվում` երկու մանկահասակ երեխայի եւ տեղավորել մոտակայքում գտնվող հյուրանոցներից մեկում: Առավոտյան, անտեսելով վտանգը, բնակիչները կրկին վերադարձել են իրենց սենյակները: Ընտանիքներից 8-ը չունեն անօթեւանի կարգավիճակ, հետեւաբար չեն կարող օգտվել պետական որեւէ ծրագրից: Երկու ընտանիքի ժամանակին առաջարկ է եղել օգտվել ԲԳՎ ծրագրից, սակայն հրաժարվել են՝ պատճառաբանելով, թե չունեն հավելյալ գումար իրենց ուզած բնակարանը գնելու համար:

Նրանք պահանջում են քանդել հանրակացարանի շենքը եւ տեղում նոր բնակելի շենք կառուցել, իրենց էլ հատկացնել բնակարան այդտեղ: Պահանջն անիրատեսական է թեկուզ միայն այն պատճառով, որ հանրակացարանի շենքն ունի սեփականատեր:

Անցած 30 տարիների ընթացքում սեփականատերը որեւէ աշխատանք չի իրականացրել եւ հայտնի էլ չէ, թե ինչ ծրագիր, նպատակներ կան՝ շենքի ու տարածքի վերաբերյալ: Անցած տարեվերջին քաղաքապետարանը սեփականատիրոջից պահանջել է քանդել շենքի փլուզված հատվածը, մաքրել տարածքը՝ աշխատանքների իրականացման համար սահմանելով 14 ամիս ժամանակ:

Մարզպետ Արթուր Խաչատրյանն առավոտյան այցելել էր փլուզված հանրակացարանի տարածք, հանդիպել բնակիչներին՝ հասկանալու, թե առաջիկայում ինչ քայլեր են ձեռնարկվելու: Մարզպետի համոզմամբ, լավագույն տարբերակն, իհարկե, բնակարանների գնման վկայագրերի տրամադրումն է: Սակայն, ինչպես նախկինում, հիմա էլ բնակիչները հայտարարեցին, թե չեն պատրաստվում լքել տարածքը:

«Մարզում ունենք 3-րդ աստիճանի 118 վթարային շենք, որից 88-ը Գյումրիում են: Եվ եթե մինչ այժմ մոտեցումն եղել է շենքերի ամրացումը, ապա հիմա մեր մոտեցումները փոխվել են ու ավելի ռացիոնալ տարբերակը վթարային շենքերի բնակիչներին փոխհատուցում տրամադրելն է: Այս առաջարկը քննարկելու ենք կառավարության հետ եւ, կարծում եմ, հավանության կարժանանա: Մենք մի լավ օրինակ ունենք Արթիկում, երբ վթարային շենքի բնակիչներին բնակարանների գնման նպատակով փոխհատուցում տրամադրեցինք: Հաշվարկել էինք, որ ամրացումը կարժենար մոտ 200 մլն դրամ, բնակարանների գնման վկայագրի տրամադրումը չգերազանցեց 45 մլն դրամը: Հիմա այս շենքը, որ 4-րդ վթարայնության է, միանշանակ ենթակա է քանդման, ուղղակի դեռ չենք կարողանում բնակիչների հետ ինչ-որ ընդհանուր համաձայնության գալ»,-նշեց մարզպետը:

Մեկնաբանություններ (1)

Լուսիկ
Ցավալի է, որ մեր ժողովուրդն էլ կորցրել է առողջ բանականությունը և չի ցանկանում ինչ-որ կերպ հասկանալ, որ պետք է համաձայնվել որևէ առաջարկի: Ախր հնարավոր է գիշերը շենքը փլուզվի և լինեն զոհեր. հետո՞:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter