HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գայանե Սարգսյան

Լեռնավանցի ֆերմերը բազմաթիվ ձախողումներից հետո կարողացել է հավաբուծությունը վերածել շահութաբեր բիզնեսի

Լոռու մարզի Լեռնավան համայնքի բնակիչ, 27-ամյա Համլետ Մազմանյանը մեկ տարի է` զբաղվում է հավաբուծությամբ: Տարիներ շարունակ արտագնա աշխատանքի մեկնող երիտասարդը որոշել է՝ պետք է մնա գյուղում՝ ընտանիքի կողքին, ու սկսի սեփական գործը: Չնայած դժվարություններին, Համլետը վստահ է՝ գյուղում աշխատելով էլ հնարավոր է հաջողության հասնել:

Լեռնավանի գյուղամիջում մեծ թվով տղամարդիկ են հավաքված: Մի քանի մետր այն կողմ տղամարդկանց մեկ այլ խումբ է կանգնած: Առաջին միտքը, որ ծագում է, հարցի տեսքով է. գյուղում անելու գործ չկա՞:

Րոպեներ անց, գյուղի ակտիվ ֆերմերներից Համլետ Մազմանյանի տուն ուղեկցող երիտասարդը մեր հարցին ի պատասխան, ասում է. «Ի՞նչ գործ, էստեղ անելու բան չկա: Գյուղի բոլոր տղամարդիկ պատրաստվում են խոպան գնան»:

Բակում արդեն լսվում է հավերի կչկչոցը: Րոպեներ անց հավանոցից դուրս են գալիս Համլետն ու մայրը՝ աշխատանքից հոգնած, կարմրած, քրտինքը երեսներին:

Հավաբուծարանում շուրջ 1000 թռչուն կա: Հավի ձվի ինկուբացիայից մինչև վաճառքի հանելու ողջ գործընթացն անում են ընտանիքի անդամներով՝ Համլետը, կինը և ծնողները:

 Հավաբուծարան հիմնելու որոշումը 27-ամյա երիտասարդը կայացրել է մեկ տարի առաջ:

«Չորս տարի ես էլ բոլորի նման Ռուսաստան էի գնում-գալիս: Արդեն զզվել էի գնալուց: Չորս տարին բավարար էր, որ հասկանայի՝ ապագա չկա էնտեղ, հեռանկար չկա»,- ասում է Համլետը:

Գյուղում մնալու որոշումը կայացնելուն նպաստել է նաև հոր փորձառությունը, որը 30 տարի շարունակ մեկնել է արտագնա աշխատանքի, ու երեխաները հորը տեսնելու բերկրանքը վայելել են տարվա մեջ մի քանի ամիս միայն:

«Ես ինչ հիշում եմ, ինքը գնացել է: Մինչև ամուսնանալը գնացել ա, ամուսնանալուց հետո գնացել ա: Մենակ ինքը չէ, մեր գյուղում ոնց որ ավանդույթ է դարձել, որ երեխեն դպրոցն ավարտեց, պիտի գնա Ռուսաստան»,- պատմում է Համլետը:

Արտագնա աշխատանքի մեկնողներից շատերը չեն վերադարձել, մի մասն էլ ժամանակի ընթացքում տարել է ընտանիքներին:

«Հիմի որ դուրս գանք, դատարկ տները հերթով ցույց տամ, կսարսափեք: Մեր տնից էն կողմ` բոլոր տները դատարկ են»,- ասում է զրուցակիցս ու թվում գյուղից հեռացածների անունները:
Թռչնաբուծությամբ զբաղվելու որոշումը կայացրել է տարիներ շարունակ ոլորտը ուսումնասիրելուց հետո: Չնայած տեսական գիտելիքներին` պրակտիկայում բազմաթիվ ձախողումներ է ունեցել:

«Սկզբից մենակ ձախողում էինք: Առաջին ձախողման պրոբլեմներն էի փորձում հասկանալ, վերլուծել, երկրորդ փորձն էի անում, հիմա էլ մի ուրիշ սխալ էի թույլ տալիս: Սկզբնական շրջանում հավերս համատարած սատկում էին»,- կատակում է Համլետը:

Ասում է՝ հավաբուծության նրբություններին ծանոթանալու համար դիմել է  հավաբույծների օգնությանը: Կարևորագույն  նրբությունների մասին, սակայն, իմացել է միայն սեփական ձախողումների ու փորձառության արդյունքում:

«Հայաստանում մարդը, որ մի բան կարողանում է անի, չի ուզում կիսվի: Մենք գիտենք, ուրիշին չենք ուզում ասենք: Դիմում էի հավ պահողներին, ասում էին էնպիսի բաներ, որ բոլորը գիտեն, բայց էն ամենակարևոր նրբությունները, որ պետք է իմանայիր, լրիվ գաղտնի էին պահում»,- ասում է նա ու վստահեցնում՝ հիմա ինքը պատրաստ է օգնել հավաբուծությամբ զբաղվող ցանկացած մարդու:

Գյուղատնտեսության տարբեր ճյուղերում առաջընթացի բացակայության կամ դանդաղ տեմպերի կարևորագույն պատճառն, ըստ Համլետի, գյուղացու գիտելիքների պակասն է:

«Գյուղերում շատ քիչ գիտելիք ունեն գյուղատնտեսությամբ՝ հողագործությամբ, անասնապահությամբ, թռչնաբուծությամբ, ճիշտ զբաղվելու հետ կապված: Ով ոնց գիտի, ոնց կարում ա, էդպես էլ անում ա: Գյուղացին կրթվելու կարիք ունի: Շատ երիտասարդներ կան, որ իրանց պատեպատ են տալիս, չգիտեն ի՞նչ անեն, ո՞ր կողմից սկսեն: Մի պետական ծրագիր կամ աջակցություն չկա, որ դրա շրջանակներում գյուղի երիտասարդներին ուղղորդեն, թե որ ուղղությամբ առաջ շարժվեն»,- նշում է երիտասարդը:

Հարցնում եմ՝ իսկ պետության կողմից սուբսիդավորված պարարտանյութը, սերմացուն աջակցություն չէ՞:

«Ես չեմ կարծում, որ էդ գները սուբսիդավորված են: Թանկացնում են, հետո իջացնում նորմալ գնի, անունը դնում սուբսիդավորում: 7000 դրամ մեկ պարկ ազոտական պարարտանյութը սուբսիդավորված է՞: Եթե դա է սուբսիդավորելը, ուրեմն ես չգիտեմ սուբսիդավորելն ինչ է,- ասում է Համլետն ու անդրադառնում գյուղատնտեսական վարկերին,- գյուղատնտեսական վարկերի տոկոսադրույքները շատ բարձր են, ու շատ կարճ ժամանակում գյուղացին պարտավոր է հետ վերադարձնել: Շատ փոքր է սուբսիդավորված վարկերի ծավալը: Մինչև իմանում ես դրա մասին, պրծնում է»:

Սպառողին որակյալ հավ մատակարելու համար Համլետն անընդհատ զբաղվում է ինքնակրթությամբ, փորձում պահպանել անհրաժեշտ բոլոր պայմաններն ու կերացանկը՝ լավագույն արդյունք ստանալու համար:

«Եգիպտացորեն, ցորեն, գարի, գարոխ (կանաչ ոլոռ), սոյա, ձեթի մնացուկներ, արևածաղկի կճեպ, ձկնալյուր, մսալյուր, մածուն, կեֆիր. իմ հավերի հիմնական կերացանկը սա է: Միակ թերությունը, որ գնորդները նշում են, հավի փոքր քաշն է՝ 1,0-1,3 կգ: Դրա պատճառն էլ այն է, որ ուղղակի չեն հասցնում պատվերները կատարել, իսկ արհեստականորեն խոշորացնել չեմ ուզում»,- նշում է Համլետը:

Վստահ է՝ կգա ժամանակն ու սպառողը կսկսի գնահատել տեղական, առանց հավելումների որակյալ արտադրանքը:

«Հասարակությունն ինչքան շուտ սկսի գիտակցել, որ պետք է առողջ սննդով սնվի, այնքան գյուղատնտեսության վիճակը երկրում կլավանա: Ինչքան շուտ գիտակցենք, որ խթանելով տեղական արտադրողին` նպաստում ենք նոր աշխատատեղեր բացվելուն, այնքան լավ»,- ասում է Համլետը:

Մեկնաբանություններ (9)

Կարեն
շատ լավ գործ է անում ես նույնպես ուզում եմ զբաղվել հավաբուծությամբ և կցանկանաի իմանամ Համլետի հեռախոսահամարը խորհուրդի համար,ուստի կխնդրեի համարը ինձ տրամադրեիք,իմ համարը 077989030
Գրիգոր
Շատ տպավորված,ուրախ ու բարի նախանձով լցվեցի հոդվածը կարդալով, ցանկանում եմ վերելքներ ոք սկսած ազնիվ ու սուբ գործին Համլետ ջան։ Այդ գործով ես նույնպես որոշել եմ զբաղվել,եթե ինձ օգնող լինի երախտապարտ կլինեմ։
Հայկ
Արթուրի հետ համամիտ եմ: Ըստ նկարների հավերը շարժվելու տեղ չունեն: Նաև լուսավորության պակաս կա: Դրաք անհարժեշտ են օրգանիզմի զարգացման համար:
Նարեկ
Եթե հավին պահում են մսատվության համար,հեչ պարտադիր չէ ազատ տարածք ունենա::Թռչնաբուծարանները նայեք:
Հայկ
Հարգելի Նարեկ Իսկ ո՞վ ասաց որ մեծ թռչնաբուծարանները ճիշտ են վարվում: Համլետի իր առջև խնդիր է դրել պահել որակյալ, ոչ արհեստականորեն խոշորացված հավեր: Սա հարգանքի արանի բան է: Փաստ է որ շարժվող, քուջուջ անող, ուրախ ապրող հավերի ձուն և միսը ավելի համեղ են: Նույնը վերաբերում է նաև այլ կենդանիներին:
Anna
Hamlet, hachoghutyun kordzerit! If something goes wrong, do an internet search in order to find out what other chickenkeepers are doing in their activity. There is a lot of information online on this subject and your questions could find an answer. Make sure to feed chickens twice a day, give them fresh and proper water. In cages must be clean straw bedding and no more than 15 chickens per square meter.
Scandinavian
Great job, Hamlet! Try to keep your chicken happy!
Արթուր
Լավ է, որ ուզում է աշխատել, բայց ինչքան տեսնում եմ նկարներից այդ պայմաններում որևէ կենդանի պահելը առնվազը անխղճություն է:
Սուսաննա
Ապրես, Համլետ ջան, հաջողություն գործերիդ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter