Կառավարությունը այսօրվա նիստին հավանության արժանացրեց տարածքային կառավարման եւ զարգացման նախարար Դավիթ Լոքյանի ներկայացրած Լոռու մարզում լեռնադահուկային կենտրոն ստեղծելու ներդրումային ծրագիրը։

Լոքյանի փոխանցմամբ՝ ներդրումային ծրագիրը իրականացնող «Մայմեխ սկի ռեզորթ» ՓԲԸ-ն պետք է նախնական՝ գույքային և հողային, գնահատում իրականացնի։ Մասնավորապես՝ ընկերությունը կկատարի չափագրումներ, նկարահանումներ և կկազմի օտարման ենթակա սեփականության օբյեկտների նկարագրության արձանագրություններ:

Լոքյանի փոխանցմամբ՝ ծրագիրը նախատեսված է իրականացնել Լերմոնտովո և Անտառաշեն համայնքների վարչական տարածքներում՝ Մայմեխ լեռան փեշին։

Իրավաբանական անձանց պետական ռեգիստրի տվյալներով՝ «ՄԱՅՄԵԽ ՍԿԻ ՌԵԶՈՐԹ» ընկերությունը ստեղծվել է 2017 թվականի դեկտեմբերի 21-ին, քանի որ որ այն գրանցված է որպես ՓԲԸ, դրա սեփականատիրոջ վերաբերյալ տեղեկատվություն պարզել չկարողացանք։

Ինչպես նշվում է գործադիր բերված որոշման նախագծում՝ ականջալուր լինելով կառավարության հորդորին՝ ուշադրություն դարձնել Վանաձորի մերձակայքին և տուրիզմի ակնկալվող զարգացմանը, «Մայմեխ սկի ռեզորթ» ընկերությունը պատրաստակամություն է հայտնել Լոռու մարզում կատարել 14.5 մլրդ դրամի ներդրում՝ լեռնադահուկային ենթակառուցվածքների ստեղծման գործում և ապահովել շուրջ 15 մլրդ. դրամի ներդրում՝ ուղղված հյուրանոցային ենթակառուցվածքների ստեղծմանը: Այսինքն՝ ընդհանուր առմամբ մոտ 30 միլիարդ դրամի ներդրում կկատարվի։

Նախագծով Հայաստանում կստեղծվի հանգստյան գոտի ամբողջ տարվա համար։ Լեռնադահուկային հանգստավայրում այցելուները հնարավորություն կունենան սովորել և սահել տարբեր բարդության դահուկային սահուղիներով: Այն նախատեսված կլինի նաև միջազգային մակարդակի սպորտային մրցումներ անցկացնելու համար: Հանգստյան գոտում կլինեն ժամանակակից լեռնադահուկային սարքավորումներ` ներառյալ բարձր արագությամբ ճոպանուղիները։

Ծրագրի շրջանակներում կկառուցվեն մինչև 300 հա դահուկային սահուղիներ և արահետներ: Կկառուցվեն 3 ճոպանուղի և լեռնադահուկային ուղիներ: Ճոպանուղիները ժամում շուրջ 6000 մարդ կտեղափոխեն:

Ընկերությունը ակնկալում է, որ ծրագրի հավանության արժանանալու պարագայում գործադիրը ծրագիրը կճանաչի գերակա հանրային շահ և նշված հատվածում իրացման իրավունքը կտրամադրի իրենց (շուրջ 584 հա)։

Նախարարությունը հավաստիացնում է, որ ծրագիրը կունենա մեծ սոցիալական մուլտիպլիկատիվ էֆեկտ, կստեղծվեն 1570 աշխատատեղեր, կբերի տարածաշրջանում սպասարկման, մշակութային և ժամանցային ոլորտի զարգացում, տրանսպորտային ոլորտի ակտիվացում։