Չորեքշաբթի, 26 սեպտեմբերի

Նորամարգի դպրոցի ուսուցիչն ընտրվեց համայնքապետ



Նորամարգը 22 տարի անց նոր գյուղապետ ունի։ Երեկ կայացած ընտրություններով գյուղապետ է ընտրվել Հայաստանի Հանրապետական կուսակցության անդամ, Նորամարգի միջնակարգ դպրոցի ուսուցիչ Արման Թադևոսյանը։ Թադևոսյանի օգտին քվեարկել է 989 ընտրողից 391-ը։ 

Հիշեցնենք, որ 1996 թվականից համայնքը ղեկավարում էր ՀՀԿ-ական Սարգիս Գալստյանը, որն այս ընտրություններին իր թեկնածությունը չէր առաջադրել առողջական խնդիրների պատճառով։ 

Կուսակից մյուս թեկնածուն՝ համայնքապետարանի առաջատար մասնագետ, ՀՀԿ-ական Արմեն Գևորգյանը, Թադևոսյանից 9 ձայն պակաս է հավաքել: 

Երրորդ թեկնածուն՝ անկուսակցական Արսեն Ղահրամանյանը, հավաքել էր 182 ձայն։ 

Երեկ քվեարկությանը մասնակցող նորամարգցիները հույս էին հայտնում, որ նոր համայնքապետի պաշտոնավարման ժամանակ, ի վերջո, գյուղի ճանապարհները կասֆալտապատվեն, գյուղը կգազաֆիկացվի, խմելու ջուր կունենան և պարտադրված չեն լինի օգտվել արտեզյան հորերի ջրերից։ 

Նշենք, որ Նորամարգում քվեարկության իրավունք ուներ 1606 անձ։ Նրանցից քվեարկությանը մասնակցել է 989-ը կամ ընտրողների 61.58%-ը։ Երեկ, ժամը 20։00-ին Կենտրոնական ընտրական հանձնաժողովի հրապարակած տվյալներով՝ մասնակցության այս ցուցանիշը մարտի 11-ի ընտրությունների երկրորդ ամենաբարձր ցուցանիշն է՝ Դեբետ համայնքից հետո։


Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ