Գյումրեցի ստոմատոլոգներ. «Շիրակի մարզում համակարգն էդ տարբերակով չի ներդրվելու, մենք բացառում ենք»
Առողջապահության նախարար Լեւոն Ալթունյանի եւ գյումրեցի ստոմատոլոգների հանդիպումը՝ նշանակված ժամը 13:30-ին, չկայացավ, թեպետ նախորդ օրը նման պայմանավորվածություն էր ձեռք բերվել: Այսօր նախարարն աշխատանքային այցով Շիրակի մարզում էր, սակայն ատամնաբույժների հետ հանդիպման եկան ՀՀ գլխավոր ստոմատոլոգ Լազար Եսայանը, «Էլեկտրոնային առողջապահության ազգային օպերատոր» ՓԲԸ-ի ներկայացուցիչ Գեորգի Ասատրյանը եւ առողջապահության նախարարության ներկայացուցիչ Արթուր Թադեւոսյանը:
էլեկտրոնային առողջապահական համակարգի ներդրմանն ընդդիմացող Շիրակի մարզի ստոմատոլոգները մարտի 5-ին բողոքի ակցիա էին կազմակերպել մարզպետարանի դիմաց, իսկ իրենց մտահոգող հարցերը նամակի տեսքով ուղարկել կառավարություն: ՀՀ գլխավոր ատամնաբույժ Լազար Եսայանը նշեց, որ բարձրացված հարցերը տեղին են, սակայն արտահայտած մտահոգությունն անտեղյակությունից է: Պարզվեց ծրագիրը Լազար Եսայանի «սրտով» է, սակայն թե ինչ կլինի համակարգը ներդնելուց 3 ամիս անց, ինքն էլ է դժվարանում պատասխանել այդ հարցին:
Հավաքվածներին բանախոսը տեղեկացրեց, որ համակարգի ներդրման ծրագիրը երկարաձգվել է, եւ աշխատանքները կսկսվեն հունիսի 1-ից: Իսկ մինչ այդ կկազմակերպվեն դասընթացներ ծրագրի հետ ավելի մանրակրկիտ ծանոթանալու նպատակով: Ինչ վերաբերում է սպառնալիք-հեռախոսազանգերին, թե պայմանագիր չստորագրողները կզրկվեն լիցենզիայից, ապա առողջապության նախարարությունից հայտնել են, որ «Արմեդ»-ը նման լիազորություն չունի: Սակայն համակարգում գրանցվելը կառավարության որոշումն է, եւ Լազար Եսայանը հորդորեց ներկաներին անպայման գրանցվել: Առաջարկը հավաքված ստոմատոլոգները չընդունեցին՝ հանդես գալով հակընդդեմ առաջարկով՝ թող նախ կազմակերպեն դասընթացները, իրականում հասկանան ինչ է պահանջվում, լուծում տան իրենց բարձրացրած հարցերին, հետո նոր կորոշեն միանալ համակարգին, թե` ոչ:
«Եթե էս պայմաններով է մնալու, մենք համակարգին չենք միանա»,- նկատեց ստոմատոլոգներից Սերգեյ Սերոբյանը: «Ամեն դեպքում ներդրվող համակարգն առավել պիտանի է, քանի որ ապահովագրում է, թե պացիենտին, թե հիվանդին,- առարկեց Լազար Եսայանը,- գրանցելով այն ամենը, ինչ դուք եք անում, առաջին հերթին ապահովագրում է ձեզ: Ես ունեցել եմ նախարարությունից եկած բողոքներ, բժշկին հրավիրել էի, որ հասկանայի` ինչ է արվել, քանի որ պացիենտն այլ բան էր ասում բժիշկն՝ այլ: Ուզել եմ անկետա՝ չի եղել, ուզել եմ կտրոն՝ չի եղել, հետեւաբար չէի կարող ապացուցել, որ պացիենտը միգուցե սխալ է, գուցե եւ ճիշտ է: Իմ տեսակետով, ամեն դեպքում գրանցվելը ճիշտ է, եկեք գրանցվենք, հետեւենք էտապներին, տեսնենք` ինչ է լինելու: Ֆինանսական մասով խոսք են տվել, որ ստոմատոլոգների մասով կլինի այլ մոտեցում»:
Առողջապահության ներկայացուցչի` Արթուր Թադեւոսյանի ելույթից առաջ արված հայտարարությունները, որ ինքը կիսով չափ գյումրեցի է, առաջին մասնագիտությամբ էլ ստոմատոլոգ, այդպես էլ չմեղմացրեց ներկաների դժգոհությունը եւ հիմնական վիճաբանությունը ծավալվեց հենց այս պաշտոնյայի ելույթի ժամանակ: «Ես ձեզ խնդրում եմ ինձ չդիտարկել, որպես առողջապահության աշխատակից, որ եկել է բաներ պարզաբանելու, ինչ-որ բաներ պարտադրելու: Չէ՛, մենք եկել ենք, հաշվեք ինձ ձեզ մոտ բարեկամ, միասին քննարկենք, միասին լսենք ձեր մտահոգությունները»,- շեշտեց Արթուր Թադեւոսյանը: Վերջինս խոսեց առողջապահության ոլորտում առկա ինֆորմացիայի ցանցային կառավարման արդյունավետությունից:
«Համակարգը նոր չի մտածվել, ամիսների հարց չի, մոտավորապես 10 տարի առաջ այս հայեցակարգը դրվել է շրջանառության մեջ, ինչպես նաեւ նույն դեղերի մասով էս վերջին փոփոխությունները դեղատոմսերի հետ կապված: Նմանատիպ ծրագրերը բավական երկար ճանապարհ են անցնում, ուղղակի հիմա եկել է էն պահը, որ կոնկրետ ներդրման հետ կապված քայլեր պետք է արվեն: Ուղղակի էսօր, մեր առողջապահության նախարարը կամք է դրսեւորել գնալ համակարգի ներդրմանը»,-հայտարարեց Արթուր Թադեւոսյանը:
Երկու ժամ տեւած քննարկումը չտվեց այն արդյունքը, որ ակնկալում էին գյումրեցի ստոմատոլոգները: Նրանցից Էմիլ Ասլանյանը բորբոքված նկատեց, որ, ճիշտն ասած, իրենք սպասում էին առողջապահության նախարարին. «Եթե մեր բոլոր հարցերին պիտի պատասխանեիք, թե կոմպետենտ չենք, ուրեմն կոմպետենտ մարդու ուղարկեիք»: Պատասխանները, որոնք հնչեցին քննարկման ժամանակ, ըստ դահլիճում ներկա ստոմատոլոգների, բավարար չէին, շատ դեպքերում էլ շրջանցող: Նրանցից մեկն էլ նկատեց, որ համակարգի ներդրմամբ «գոլ»՝ էն էլ խոշոր հաշվով, խփում է միայն «Արմեդ»-ը, որին նախարարությունը հանձնել է համակարգի կոնսերցիոն կառավարումը:
Բժիշկներից մեկն էլ հետաքրքրվեց, թե ինչու է Հայաստանն անցնում նման համակարգի այն դեպքում, երբ դա կիրառվում է աշխարհում երկու երկրում՝ Իռլանդիայում եւ Էստոնիայում: «Եթե ասում եք, որ զարգացած երկրներում կիրառվում է, ապա ինչու՞ Ֆրանսիան ու Ամերիկան նման համակարգի չեն անցնում: Փաստորեն հանճարները երեք տեղից են՝ երրորդը մենք ենք լինելու»,- նկատեց ստոմատոլոգ Էմիլ Ասլանյան: Ստոմատոլոգները պահանջեցին, որ կառավարության կողմից ներդրվող ծրագիրը թող կառավարության կողմից էլ ֆինանսավորվի:
Քննարկումը, ինչպես որ ակնկալում էին երկու կողմերն էլ, իր նպատակին չծառայեց: Մայրաքաղաքից եկածներին այդպես էլ չհաջողվեց համոզել գյումրեցիներին, որ ներդրվող համակարգը միմիայն դրական կերպով է ազդելու իրենց գործունեության վրա: Ա. Թադեւոսյանի հայտարարությանը, թե համակարգն այսպես, թե այնպես ներդրվելու է, հանդիպեց ներկաների բուռն ընդվզմանը. «Շիրակի մարզում չի ներդրվելու, ավելի ճիշտ՝ էդ տարբերակով չի ներդրվելու, մենք բացառում ենք: Եթե էդ համոզմամբ եք եկել, վերադարձեք Երեւան»,- հայտարարեցին գյումրեցիները:
Մեկնաբանել