ՈՒրբաթ, 21 սեպտեմբերի

Հակոբ Հակոբյանի որդին պետական միջոցներով գնված գյուղտեխնիկան պահում է իր ընկերության պահեստում



Վերահսկիչ պալատը հերթական բացահայտումն է արել, որը վերաբերում է գյուղտեխնիկայի կայանի ստեղծման ծրագրին:  Ձեռք են բերվել տրակտորների հզորության գութաններ, որոնք պահվում են  պատգամավորի որդու ղեկավարած մեկ այլ ընկերության պահեստում:

Գյուղտեխնիկայի կայանի ստեղծման պիլոտային ծրագրի նպատակը ներդրված ֆինանսական միջոցների վերադարձման արդյունքում գյուղտեխնիկայի նոր կայանների ստեղծումն է: Կառավարությունը ծրագրի մեկնարկն ազդարարեց 2017թ. մարտի 30-ի «Գյուղատնտեսական տեխնիկայի կայանի կազմակերպման մասին» թիվ 342-Ն որոշումով: Ըստ այդմ, գյուղատնտեսական աշխատանքների մեքենայացման մակարդակի բարձրացման նպատակով նախատեսվել է պետության կողմից տրամադրել մինչև 700 մլն դրամ: Ծրագրի ֆինանսական աղբյուրը պահուստային ֆոնդն է, իսկ կատարման ժամկետ է սահմանվել 2017-2021թթ.:

Ներկայացվել են գյուղատնտեսական տեխնիկայի կայանի կազմակերպման 4 առաջարկներ՝ քաղաքացի Ս. Այվազյանի, «Նաիրիի բերրիություն», «Չինվան» և «ԻԴԱՍ» ՍՊԸ-ների կողմից:

Գնահատող հանձնաժողովն ուսումնասիրության արդյունքում 2017թ. մայիսի 5-ին հավանության է արժանացրել «ԻԴԱՍ» ՍՊԸ-ի ծրագիրը, որին տրվել է դրական եզրակացություն: Ծրագիրը հավանության է արժանացել նաև կառավարության մայիսի 18-ի նիստում:

«Հետք»-ն արդեն գրել է, որ ԱԺ պատգամավոր Հակոբ Հակոբյանի որդուն՝ Պարույր Հակոբյանին է պատկանում «Ինովեյթիվ ընդ դիվելոփդ ագրո սիսթեմս» ՍՊԸ-ի բաժնետոմսերի 40%-ը: Իսկ 60%-ի սեփականատերը երևանաբնակ Սերգեյ Խաչատրյանն է: Ընկերության կրճատ անվանումը, ըստ կանոնադրության, «ԻԴԱՍ» ՍՊԸ է: Ընկերությունն ունի ընդամենը 50 հազար դրամ կանոնադրական կապիտալ և ստեղծվել է ծրագիր ներկայացնելուց օրեր առաջ՝ 2017թ. ապրիլի 28-ին:

Վերահսկիչ պալատն ուսումնասիրել է «ԻԴԱՍ» ՍՊԸ-ի գործունեությունը: Պարզել է, որ ընկերությունը չի ունեցել գյուղատնտեսական աշխատանքների կազմակերպման բավարար փորձառություն:

«ԻԴԱՍ» ընկերությունը պարտավորվել է ծրագիրն իրականացնել 6 հաջորդական փուլերով, որի արդյունքում մինչև 450 հազար հա մշակվող տարածքներում մեքենայացված ծառայությունների կիրառման մակարդակը պետք է հասցնել 90%-ի: Ըստ Վերահսկիչ պալատի ուսումնասիրության` ընկերությունը նախատեսել է ունենալ մինչև 1 մլն շահառու՝ ծրագրի սկզբնական փուլերում ծառայություններ մատուցելով Գեղարքունիքի, Արմավիրի և Շիրակի մարզերում, իսկ հետագայում՝ երկրի ամբողջ տարածքում:

Ծրագրի մեկնարկի համար նախատեսվել է ներգրավել մոտ 433 հազար դրամ միջին աշխատավարձով շուրջ 88 աշխատակից, երկրորդ տարում թիվը հասցնել 142-ի, իսկ 5-րդ տարում՝ 726-ի:

Ծրագրով նախատեսվել է ձեռք բերել 7 տրակտոր, 7 գութան, 4 գյուղատնտեսական մեքենա ցանքսի համար:

Վերահսկիչ պալատը պարզել է, որ 2017թ. դեկտեմբերի 31-ի դրությամբ փաստացի ծախսվել է 659 մլն 400 հազար դրամ, որից 23 մլն 800 հազար դրամը` «Սպեցմաշ» ՍՊԸ-ի հետ կնքված պայմանագրի հիման վրա ձեռք բերված 7 գութանի համար: Իսկ 635 մլն 600 հազար դրամով «Նաս Ջեներալ Թրեյդինգ» ՍՊԸ-ից գնել է 7 տրակտոր: Ցանքսի համար նախատեսված 4 գյուղմեքենաներն այս տարվա հունվարի 12-ի դրությամբ ձեռք բերված չեն եղել:

Ստացվում է, որ մեկ տրակտորը գնել են  90 մլն 800 հազար դրամով: Ինչպես արձանագրել է Վերահսկիչ պալատը, բացակայում են Գյուղատնտեսության նախարարության համապատասխան ստորաբաժանման իրականացրած մոնիտորինգի արդյունքները՝ կապված նմանատիպ հզոր տրակտորների ձեռքբերման անհրաժեշտության հետ: Բացակայում են նաև նախարարության կողմից տեխնիկայի նպատակային շահագործման վերաբերյալ հսկողական մեխանիզմները:

«Հարկ է նշել, որ նմանատիպ տրակտորներն օգտագործվում են նաև շինարարության և ծանր արդյունաբերության մեջ»,- արձանագրել է Վերահսկիչ պալատը:

Ավելին, ստուգման արդյունքում պարզվել է, որ տրակտորների հզորությանը համապատասխան 7 գութանների ձեռքբերման համար չի իրականացվել շուկայի գների ուսումնասիրություն: Գութանները, այս տարվա հունվարի 12-ի դրությամբ, գտնվել են «Արփա-Սևան» ընկերության պահեստում:

Նշենք, որ Պարույր Հակոբյանը «Արփա-Սևան» ԲԲԸ-ի գլխավոր տնօրենն է, իսկ ընկերության սեփականատերերից է պատգամավորի հայրը՝ Հակոբ Հակոբյանը:

Պարույր Հակոբյանը շինարարական և այլ ոլորտներով զբաղվող 5 ընկերություններում բաժնետեր է:

Ըստ գյուղտեխնիկայի կայանի ստեղծման ծրագրի` տեխնիկայի նկատմամբ սեփականության իրավունքը փոխանցվելու է կազմակերպությանը 700 մլն դրամ արժեքի և մինչև 226 մլն դրամ հավելավճարի ամբողջական մարումից հետո: Իսկ մինչ ամբողջական գումարի մարումը, տեխնիկայի նկատմամբ սեփականության իրավունքը պատկանում է Գյուղատնտեսության զարգացման հիմնադրամին:

Վերահսկիչ պալատն արձանագրել է, որ կառավարության 2017թ. մայիսի 18-ի թիվ 516-Ն որոշումով «ԻԴԱՍ» ՍՊԸ-ն տեխնիկայի նկատմամբ սեփականության իրավունքը ձեռք է բերելու` հիմնադրամին վճարելով միայն պայմանագրի գումարը, որը կարող է տնօրինվել կանոնադրական նպատակներին համապատասխան: Ստուգող մարմինը փաստում է, որ սա հակասում է պիլոտային ծրագրի՝ վերադարձվող գումարով Հայաստանում գյուղտեխնիկայի այլ կայանների կազմակերպման նպատակին: Բացի այդ, կառավարության որոշման մեջ նշված չէ ծրագրի շահառուի կողմից ծրագրով նախատեսված ժամկետում մինչև 226 մլն դրամի չափով վճարվելիք հավելավճարի մասին:

Լուսանկարը՝ Պարույր Հակոբյանի ֆեյսբուքյան էջից


Գլխավոր էջ



Մեկնաբանություններ (9)
1. Մարինա11:05 - 19 մարտի, 2018
Դրա համար էլ իրենք "կարտոլ" չեն ուտում, այլ` միս:
2. Մոսես15:06 - 19 մարտի, 2018
Պողոսի հողը վարում էր հարեւան, Արշոն իր մաշված տրակտորով, բերքից հետո մի մեշոկ կարտոլ ստանալու պայմանով: Հիմա էս կարմրաթուշ ջահելը հաստատ մի չորս մեշոկի գին կուզի, փողն էլ գլխանց: Պողոսը չի տա ու էլի Արշոյին կխնդրի: Հակոբն էլ կտեսնի որ գործին խփող կա, օրենսդրական նախաձեռնություն կմտցնի ու Արշոներին ոնց որ պետք է, կհարկեն: Սրանք էլ ձեռ կքաշեն կիսաքանդ տրակտորներից ու - յալլա՜ ռուսաստան, թազա տրակտորներ քշելու իրենց համար! Պողոսն էլ կթքի ու վար ու ցանքը կթարգի! Հակոբենք էլ նվեր ստացած տրակտորները կամ կես գնով վրացիների վրա կծախեն, կամ էլ հանք քանդողներին: (Չգիտեմ, գուցե հենց դրա համար էլ բերել են, «գյուղացուն օգնելու» անունով?) Ասելիքս պարզ է - տրակտորը պիտի Պողոսին ու Արշոյին նվեր տրվեր, ոչ թե օրենսդիր Հակոբին: Այն այսպես միայն չարիք է բերելու գյուղացու ու գյուղատնտեսության գլխին - վստահ եղեք!
3. Վիթխար00:17 - 20 մարտի, 2018
Մոսես ջան, բա սրանք չարիքի օֆիսից են...
4. Մարտիկ10:47 - 20 մարտի, 2018
Սա էն նույն Հակոբ Հակոբյանն է՞, որ ցեղասպանության մասին խայտառակ ֆիլմ էր նկարել
5. Վարդան13:36 - 20 մարտի, 2018
Առանց նախարարության թողտվության էսպիսի բաներ չի լինում
6. 4 - in14:11 - 20 մարտի, 2018
Չէ, նա ճոյիտ Հակոբն էր, որ Դուբայում կուրտկա էր թռցրել, իսկ սա ինչքան գիտեմ թունելի Հակոբն է, սա ավելի լուրջ բաներ է թռցնում, բայց ըստեղից:
7. Վարդան10:05 - 26 մարտի, 2018
Այդ տրակտորների պատմությունը շարունակություն է ունեցել: Գյուղատնտեսության նախարարությունը միտումնավոր չի ընդունել դրանք, քանի որ իրենց նախընտրած ընկերությունը չհաղթեց մրցույթը:
8. Լավրենտ09:11 - 27 մարտի, 2018
ուտենք մենք, փողերն ուտեն իրենք...
9. Սերոժ09:09 - 29 մարտի, 2018
գյուղ նախարարությունը նոր մրցույթ է սկսել տրակտորների ձեռքբերման համար, Իդաս ՍՊԸ-ին հարմարեցրած պարամետրերով
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ