Ապօրինի հատումների համար մեղադրանք է առաջադրվել անտառապահին և ինժեներին
Քննչական կոմիտեի Լոռու մարզային քննչական վարչության Թումանյանի քննչական բաժնում քննվող քրեական գործով բացահայտվել է «Հայանտառ» ՊՈԱԿ «Լալվարի անտառտնտեսություն» մասնաճյուղի պահաբաժնում 68 հատ տարբեր տեսակի ծառերի ապօրինի հատման դեպք։ ՔԿ հասարակայնության հետ կապերի վարչության տեղեկացմամբ` մեղադրանք է առաջադրվել անտառապահին և ինժեներին:
Լոռու մարզային քննչական վարչության վարույթում քննված քրեական գործով տվյալներ են ձեռք բերվել, որ 2016-2017 թվականների ընթացքում «Հայանտառ» ՊՈԱԿ «Լալվարի անտառտնտեսություն» մասնաճյուղի Շամլուղի անտառպետության 1-ին պահաբաժնում իրականացվել են ապօրինի ծառահատումներ՝ համապատասխան պաշտոնատար անձանց կողմից իրենց ծառայության նկատմամբ անբարեխիղճ կամ անփույթ վերաբերմունքի հետևանքով։ Ձեռք բերված տվյալների հիման վրա հարուցվել է նոր քրեական գործ՝ ՀՀ քրեական օրենսգրքի 315-րդ հոդվածի 2-րդ մասով եւ առանձնացվել առանձին վարույթում։
Քննության արդյունքում ապացույցներ են ձեռք բերվել, որ Շամլուղի անտառպետության 1-ին պահաբաժնի անտառապահի և «Լալվարի անտառտնտեսություն» մասնաճյուղի անտառպահպանության ինժեների կողմից իրենց ծառայության նկատմամբ անբարեխիղճ և անփույթ վերաբերմունք դրսևորելու, պարտականությունները պատշաճ չկատարելու հետևանքով, 2016-2017 թվականների ընթացքում ապօրինի հատվել են 68 հատ տարբեր տեսակի ծառեր՝ պետությանը պատճառելով 3.243.000 դրամի վնաս։
Անտառապահին և ինժեներին մեղադրանք է առաջադրվել՝ ՀՀ քրեական օրենսգրքի 315-րդ հոդվածի 2-րդ մասի հատկանիշներով:
Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին:
Մեկնաբանություններ (1)
Մեկնաբանել