Երևան քաղաքի ընդհանուր իրավասության դատարանի Շենգավիթի նստավայրում ՊՊԾ գնդի գրավման գործով դատական նիստին այսօր հրապարակվեցին այդ օրերին սպանված ոստիկանների  մարմինների դատաբժշկական փորձաքննության եզրակացությունները:

Ինչպես պարզվեց, նրանցից երկուսի՝  Արթուր Վանոյանի և Յուրի Տեփանոսյանի մարմնին բացի հրազենային վնասվածքներից եղել են նաև այլ առարկայով հասցված վնասվածքի հետքեր:
Փորձաքննության արդյունքների համաձայն՝ Արթուր Վանոյանի կրծքավանդակի շրջանում ստացած վնասվածքը մահվան հետ անմիջական կապ է ունեցել: Վանոյանի մարմնին մեկ հրազենային վնասվածք է եղել, ինչպես նաև քերծվածքներ՝ նրա դեմքի և նախաբազկի ձախ հատվածում, որոնք, ըստ փորձաքննության եզրակացության, հասցվել են բութ առարկայով և անմիջական կապ չունեն Վանոյանի մահվան հետ:

ՊՊԾ-ում սպանված ոստիկան Յուրի Տեփանոսյանի մահվան հետ անմիջական կապի մեջ է եղել  գանգի դիմային հատվածի հրազենային վնասվածքը: Դատաբժշկական փորձաքննության եզրակացության համաձայն՝ սպանված ոստիկանի կրծքավանդակի հետին մակերեսին ևս վնասվածք  է եղել, որը պատճառվել է կենդանության օրոք՝ մահվանից անմիջապես առաջ՝ սուր եզր ունեցող կույր առարկայով. այս վնասվածքը առողջությանը թեթև վնասի հատկանիշներ չի պարունակել:

ՊՊԾ գնդի գրավման ժամանակ հրազենային վիրավորում ստացած, ապա օրեր անց հիվանդանոցում մահացած ենթասպա Գագիկ Մկրտչյանի մահը վրա է հասել կրծքավանդակի և որովայնի շրջանում ստացած հրազենային վնասվածքից: Ոստիկանի մարմնի վրա առկա կրակոցի ուղղությունը հնարավոր չի եղել որոշել՝ նկատի ունենալով, որ վնասվածք ստանալուց հետո Մկրտչյանը բազմաթիվ վիրաբուժական միջամտությունների է ենթարկվել․ ուղղությունը պարզելու համար անհրաժեշտ է եղել փորձաքննության ենթարկել նաև Մկրտչյանի հագուստները: 

Դատական նիստն այս պահին ընդմիջվել է, և կշարունակվի 14:30-ին: