Կիրակի, 23 սեպտեմբերի

Վերահսկիչ պալատը պարարտանյութերի ձեռքբերման պետական աջակցման ծրագրում չարաշահումներ է հայտնաբերել



Վերահսկիչ պալատը հերթական բացահայտումն է արել Գյուղատնտեսության նախարարության կողմից իրականացված ծրագրերում: Այս անգամ օրենքի խախտման դրսևորումներ են հայտնաբերվել պետական սուբսիդավորմամբ պարարտանյութերի ոլորտում:

Գյուղատնտեսության նախարարությունն իրականացնում է «Հողօգտագործողներին գյուղատնտեսական աշխատանքների համար մատչելի գներով ազոտական, ֆոսֆորական և կալիումական պարարտանյութերի ձեռքբերման նպատակով պետական աջակցության ծրագիր»-ը: Վերջինիս նպատակը մարզերի հողօգտագործողներին անհրաժեշտ պարարտանյութերը ձեռքբերելու հարցում աջակցելն ու հողերի արդյունավետ օգտագործման, գյուղատնտեսական մթերքների արտադրության, ծավալների, ստացվող եկամուտների բարձրացմանը նպաստելն է:

Վերահսկիչ պալատի ուսումնասիրությունների համաձայն՝ այս ծրագրի շրջանակներում ձեռքբերված պարարտանյութերի քանակը 2016թ. կազմել է, ազոտական՝ 32 հազար տոննա, ֆոսֆորական՝ 320 տոննա և կալյումական՝ 840 տոննա: 2017թ. ձեռք է բերվել 25 հազար 545 տոննա ազոտական, 344 տոննա՝ կալյումական պարարտանյութ:

Պարզվել է, որ մարզերում 2016-2017թթ. անհրաժեշտ պարարտանյութերի պահանջարկի վերաբերյալ «Ագրոքիմիական ծառայություն» ՊՈԱԿ-ի կողմից կատարված վերլուծության համաձայն՝ 2016թ. ազոտական պարարտանյութի պահանջարկը կազմել է 98,5 հազար տոննա, ֆոսֆորականինը՝ 88,8 հազար, կալյումականինը՝ 37,1 հազար տոննա: Նույն ուսումնասիրության համաձայն՝ 2017թ. ազոտական պարարտանյութի պահանջարկը եղել է 99,7 հազար տոննա, ֆոսֆորականինը 89,4 հազար, իսկ կալյումականինը՝ 37,6 հազար տոննա:

Պետական աջակցությամբ մատչելի գներով պարարտանյութ ձեռքբերելու ծրագրի շրջանակներում, ըստ Վերահսկիչ պալատի, պատվիրատուի կողմից 2016-2017թթ. չի իրականացվել ապրանքի ձեռքբերման և տեղափոխման ծախսերի շուկայական գների ուսումնասիրություն և չի կազմվել համապատասխան նախահաշիվ:

2016թ. մարզի հողօգտագործողների կողմից ներկայացվել է 32 հազ. տոննա ազոտական, 2000 տոննա  ֆոսֆորական և 1531 տոննա կալյումական պարարտանյութի պահանջարկ: Վերահսկիչ պալատը պարզել է, որ տարվա ընթացքում գյուղացիական տնտեսություններին բաշխվել է 31 հազ. 650 տոննա ազոտական (հաշվի առնելով նախորդ տարվա մնացորդը), 574 հազ. տոննա ֆոսֆորական և 1015 տոննա կալյումական պարարտանյութ:

«Նախարարության կողմից չի իրականացվել համապատասխան մոնիտորինգ, ինչպես նաև չեն կիրառվել հսկողական մեխանիզմներ ծրագիրը լիարժեք իրականացնելու և նպատակային արդյունքին հասնելու համար»,-եզրակացրել է Վերահսկիչ պալատը:

Ուսումնասիրության համաձայն՝ 2016թ. պարարտանյութերի մատակարարումն ու վաճառքն իրականացվել է ամբողջ տարվա ընթացքում, սակայն, սուբսիդավորման և տեղափոխման պայմանագրերը կազմվել են այնպես, որ ամբողջ գումարը մատակարարներին տրամադրվել են միանվագ՝ առաջին եռամսյակի ընթացքում, այլ ոչ թե փաստացի մատակարարումն իրականացնելուց հետո:

Կառավարության 2016թ. հունվարի 29-ի թիվ 73-Ն որոշմամբ, ինչպես նաև մատակարարման պայմանագրով նախատեսված է, որ չվաճառված ազոտական պարարտանյութի սուբսիդավորման և տեղափոխման դրամաշնորհի գումարները հետ են վերադարձվում պետական բյուջե: Չներկրված և չվաճառված մնացորդը կազմել է 2944 տոննա, որի արժեքը, ներառյալ տեղափոխման ծախսերը կազմել է 179 մլն 128 հազար դրամ: Նշված գումարը, Վերահսկիչ պալատի տվյալներով, չի փոխանցվել պետական բյուջե և միայն տվյալ բյուջետային տարվա ավարտից 45 օր հետո Գյուղատնտեսության նախարարի հրամանով հանձնարարվել է մատակարարին շարունակել ծրագիրը հաջորդ տարում և բախշել մնացորդը: Հետագայում այն հաստատվել է նաև կառավարության որոշումով:

Ինչ վերաբերում է չվաճառված 504,25 տոննա ֆոսֆորական և 559,45 տոննա կալյումական պարարտանյութերին, ապա դրանց ընդհանուր արժեքը, ներառյալ տեղափոխման ծախսերը, կազմել են մոտ 148 մլն 266 հազար դրամ: Այս գումարը կրկին չի վերադարձվել պետական բյուջե և կրկին նախարարի, ապա կառավարության որոշումով թույլատրվել է շարունակել բաշխումը հաջորդ տարվա ընթացքում:

 «Նշված անհատական ակտը հակասում է ՀՀ կառավարության 2016թ. թիվ 73-Ն նորմատիվ իրավական ակտին: Հարկ է նշել, որ մատակարարի կողմից Գյուղատնտեսության նախարարություն ուղարկած գրությունների համաձայն, մնացորդ ապրանքը՝ 2944 տոննայի չափով, 2016թ-ի ընթացքում չի ներկրվել ՀՀ-ի տարածք»,-եզրակացրել է Վերահսկիչ պալատը: 

Ուսումնասիրության արդյունքում նաև պարզվել են, որ 2016թ. մատակարարների կողմից չեն պահպանվել կառավարության որոշմամբ սահմանված մատակարարման պայմանները՝ պարարտանյութերը տրամադրվել են մինչև փաստացի վճարումը, ինչի արդյունքում ձևավորվել են պարտավորություններ: Չնայած այդ հանգամանքին կառավարության 2017թ. դեկտեմբերի 7-ի թիվ 1585-Ն որոշմամբ դադարեցվել են 2015 և 2016 թվականների համայնքներին պարարտանյութերի հատկացման արդյունքում «Բերիություն ԱՄ-ի Մասիսի շրջանային միավորում» ՍՊԸ-ի և «Հրաշք այգի» ՍՊԸ-ի հանդեպ ձևավորված համայնքների պարտավորությունները մոտ 165 մլն 255 հազար դրամի չափով:

Բացի այդ, 2016-2017թթ. պարարտանյութերի սուբսիդավորման պայմանագրերի գները համեմատելիս ստացվում է, որ 2017թ. ազոտական և կալյումական պարարտանյութերը ձեռք են բերվել ավելի ցածր գներով: 2017թ. սուբսիդավորման գումարները մատակարարներին տրամադրվել են կատարողականների հիման վրա, այլ ոչ թե միանվագ:

«Հետք»-ն օրեր առաջ անդրադարձել էր նաև նախարարության կողմից իրականացված գյուղատնտեսական տեխնիկայի ֆինանսական վարձակալության լիզինգի պետական աջակցության ծրագրի վերաբերյալ Վերահսկիչ պալատի հայտնաբերած չարաշահումներին: Այս դեպքում ևս «Հրաշք այգի» ընկերությունը, օգտվելով տոկոսադրույքի սուբսիդավորումից, ստանձնել էր 151 մլն 871 հազար դրամ գումարի վարկային պարտավորություն 2% տոկոսադրույքով։ «Հրաշք այգի» ՍՊԸ-ի տնօրեն Արթուր Իվանյանը գյուղտեխնիկա մատակարարել է  իր կնոջը՝ Լենա Բաղդասարյանի հիմնադրած  «Ֆիառ Գրուպ» ՍՊԸ-ին:

Օրեր առաջ էլ Գլխավոր դատախազությունը հաղորդագրություն տարածեց, որ Լոռու մարզի երկու համայնքապետ է  ձերբակալվել, Միխայլովկա համայնքում չարաշահումներ են կատարվել պարարտանյութերի, իսկ Ձյունաշող համայնքում՝ աշնանացան ցորենի սերմացուի բաշխման գործընթացում: Շիրակի մարզի դատախազությունում էլ քրեական գործ է հարուցվել բնակիչներին հատկացված սերմացուների դիմաց վճարումների յուրացումների վերաբերյալ:

Առաջիկայում կներկայացնենք նաև գյուղատնտեսության նախարարության դիրքորոշումը:

Լուսանկարը՝ armtimes.com


Գլխավոր էջ



Մեկնաբանություններ (17)
1. Մարինե13:06 - 2 ապրիլի, 2018
Այս նախարարությունում անպատժելիության մթնոլորտ է տիրում: Այնքան են հղփացել, որ այժմ ուզում են Հրաշ այգուն գումար տալ հենցայնպես: https://www.e-draft.am/projects/821/digest
2. Վարդան13:39 - 2 ապրիլի, 2018
Ետ ինչի բա ես (http://hetq.am/arm/news/86677/hrashq-aygi-i-tnorenn-u-kiny-dzevakan-paymanagrov-ogtvel-en-artonyal-lizingayin-tsragric.html ) հոդվածի համար դիրքորոշում չներկայացրին բա նախարարությունից ? Որովհետև իրենք իսկզբանե գիտեին, որ Ֆիառը Հրաշք այգու հետ փոխկապակցված է: Ֆիառի դիմումը նախարաին եղել է Հրաշք այգու էլեկտրոնային հասցեից, կա համապատասխան գրագրությունը: Ես անձամբ եմ դա տեսել: Նախարարությունում գիտեին նաև, որ այդ տեխնիկան Ծովակից հետ է բերվելու և հանվելու է վաճառքի:
3. Դոնարա14:04 - 2 ապրիլի, 2018
Անամոթ հիմնարկ դարձրեցին գյուղ նախարարությունը: Ետ նախարարին իրա կողքի մարդիկ ուժեղ քաշելու են:
4. Կարինե14:38 - 2 ապրիլի, 2018
Ղեկավար կազմն է մեղավոր, որովհետև մարդիկ խոպան են եկել, որքն հնարավոր է պետք է գումարներ աշխատեն, քանի որ գիտեն որ ժամանակավոր են:
5. Տիգրան15:44 - 2 ապրիլի, 2018
Երբ պիտի վերջ դրվի այս խայտառակություններին
6. Սուսաննա17:06 - 2 ապրիլի, 2018
Կամ նախարարը իր տեղում չէ, կամ այս երևույթները կրում են համակարգված բնույթ
7. Սամվել19:05 - 2 ապրիլի, 2018
Պարզ երևում է, որ կոռուպցոն մեխանիզմներով հարուստ հիմնարկ է գյուղատնտեսության նախարարությունը
8. Կարինե09:12 - 3 ապրիլի, 2018
Նման բացահայտումից հետո ամենաքիչը նախարարը պիտի հրաժարական տար
9. Ռուդոլֆ10:43 - 4 ապրիլի, 2018
Ինչ ուզում անում են այս նախարարությունում
10. Լուսինե14:47 - 4 ապրիլի, 2018
Անպատժելիության մթնոլորտ է տիրում, այդե պատճառը եսպիսի երևույթների
11. Կարո16:31 - 4 ապրիլի, 2018
Նոր չի որ ամեն տեղ բիրդակ ա: Աչքիս տոչկել են, որ վարչապետին մրոտեն էս քանի օրը:
12. Արմեն18:05 - 4 ապրիլի, 2018
Վարչապետն ինչ մեղք ունի, որ նախարարն իրա պաշտոնի լրջությունը չի պատկերացնում ու սենց խայտառակ գործարքների է գնում: Էս վոր թիվն ա որ ֆիկտիվ ֆիրմաներ բացեն իրարից առևտուր անեն ու չբռնվեն: Երևի սա մտացելա կոնյակի գործարանի հարիֆ ֆրանսյացիներն են ոնց ուզի մատի վրա ֆռացնի
13. Գեւորգ08:47 - 5 ապրիլի, 2018
Սովետի ժամանակ գյուղ նախարարությունը պլաններ էր մշակում եւ իջեցնում կոլխոզ-սովխոզներին, թե ով ինչքան խաղող, ցորեն ու միս արտադրի ու հանձնի, ինչքան բուրդ խուզի, քանի ձու ածի եւ այլն: Իրենք տրակտորն ու կոմբայնը բերում դռանդ դեմը կանգնեցնում էին, պարարտանյութը վագոններով շարում, դեղի, սերմացուի, ագրոնոմի, անասնաբույժի հարցերը լրիվ լուծվում էր: Ջուրը ձրի էր, հլա գալիս էին քնից հանում թե գիշերն ինչու չեք ջրում, պարապ հոսում է: Իսկ հիմա այս նախարարության բան ու գործն ի՜նչ է, չհաշված ժամանակավոր Ծիգ - միկերը (որոնցով իրենց արիշ-վերիշն են անում:) Սրանք հիմա ավելի շատ բաժիններ, ավտոներ ու պաշտոնավոռեր ունեն քան առաջ էր: Իսկ սրանց մշտական պարտականությունները ո՜րն են այս դեպքում, եթե գյուղն ու գյուղացին իրենք իրենց յուղով են տապակվում (?!) Իսկ ընդհանրապես դժվար է հասկանալ մեր շատ նախարարությունների ֆունկցիաներն այս երկրում:
14. Նազելի09:31 - 5 ապրիլի, 2018
Ինչ անում են լավ են անում, ձեռները բռնող չկա անում են:
15. Գեւորգ11:14 - 5 ապրիլի, 2018
Թող խանութներ բացեն, պարարտանյութ, դեղ, սերմացու մեքենա, դնեն ու ազատ ծախեն: Գյուղացուն եթե օգնել են ուզում, թող ջուր, գազ, հողի հարկ, վարկ մի քիչ թեթեւացնեն, միթե դրա համար հարկավոր է «ծիգ» ու «սիք» սարքել ու հարյուրավոր թալանչի մեջը մտցնել: Կարող ա ոչ մի բան չեն տեսնում ու հասկանում?
16. Գայանե09:25 - 6 ապրիլի, 2018
Պարզից էլ պարզ է, որ այս գործարքներից փող են աշխատել որոշ պաշտոնյաներ
17. Կարինե09:09 - 7 ապրիլի, 2018
Ինձ վրա էլ գործուղումներ էին դուրս գրում իսկ հետո աշխատակազմի ղեկավարը հետ էր վերցնում մի մասը
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ