Վանաձորում անցկացվող «Քայլ արա, մերժիր Սերժին» բողոքի ակցիան այսօր առանց բախումների չանցավ: Հայքի հրապարակից մեկնարկած բողոքի ակցիայի մասնակիցները քննարկել ու որոշել էին՝ ակցիան սկսել երթով: Ոստիկանները թույլատրել էին` պայմանով, որ քաղաքի փողոցները չեն փակվի, ցուցարարները փողոց դուրս չեն գա: Չնայած ոստիկանների հրահանգներին՝ ցուցարարները պարբերաբար քայլում էին նաև մայթեզրով, փողոցով:

Հերթական նման փորձի ժամանակ մոտ 2 տասնյակ ոստիկաններ հարձակվեցին երկու երիտասարդի վրա ու սկսեցին բռնի ուժով նրանց քարշ տալ դեպի ոստիկանական մեքենան: Մասնակիցները փորձեցին խոչընդոտել նրանց։ Միջամտությունը, սակայն, ապարդյուն էր: Եվս մեկ վարորդի ձեռքից ոստիկանները վերցրին մեքենայի բանալին ու այն վերադարձրին միայն րոպեներ անց: Վարորդի մեքենայում տեղավորված ոստիկանները ուղղորդեցին նրան, թե որ ուղղությամբ վարի:

Հարցին՝ ինչո՞ւ բերման ենթարկեցին երիտասարդներին, Գուգարքի բաժնի պետ Էրիկ Շարմազանովը պատասխանեց՝ հասարակական կարգը խախտել են, տարել են:

Խնդրեցինք մանրամասնել, բաժնի պետը պատասխանեց՝ մի խանգարեք ծառայությանը, անցեք մայթ:

Հիշեցնենք, որ այսօր Սերժ Սարգսյանի վարչապետության դեմ ընթացող զանգվածային բողոքի ցույցերի 10-րդ օրն է: Առավոտյան կարճատև հանդիպում տեղի ունեցավ Սարգսյանի և ցույցերը ղեկավարող ԱԺ պատգամավոր Նիկոլ Փաշինյանի միջև, սակայն բանակցությունները ձախողվեցին: Սերժ Սարգսյանը Փաշինյանին հորդորեց չխոսել ժողովրդի անունից եւ վերադառնալ օրինականության դաշտ՝ հիշեցնելով 2008թ.մարտի 1-ը: Փաշինյանը կրկնեց, որ եկել է՝ քննարկելու Սերժ Սարգսյանի հրաժարականի և իշխանության խաղաղ, անցնցում փոխանցման պայմանները: Հանդիպումից մոտ մեկ ժամ անց Նիկոլ Փաշինյանը ձերբակալվեց: