Կիրակի, 23 սեպտեմբերի

Բագրատաշենի անցակետի մոտ ցուցարարների բողոքի երթը վերածվեց տոնական շքերթի



Այսօր  Նոյեմբերյանի օղակաձև շրջադարձի  մոտ  հավաքվել էին Սերժ Սարգսյանի  վարչապետության դեմ բողոքող  մոտ 400 ցուցարաներ:  Սակայն  Նոյեմբերյանից,  Բարեկամավանից, Այրումից  և հարևան մյուս բնակավայրերից  ցուցարաների հոսքը չէր դադարում: Ժամը 15-ին նրանք փակեցին  հայ-վրացական  միջսահմանային Բագրատաշենի անցակետ տանող ճանապարհի մուտքը:

Մեկ ժամ  ճանապարհը  փակելուց հետո` ժամը 16-ին, ցուցարարները երթով շարժվեցին  դեպի Բագրատաշենի  միջսահմանային անցակետ: Որոշել էին  շրջապատել  անցակետի շենքը և իրենց  զայրույթը հայտնել սահմանային գյուղերի  առևտրականների  նկատմամբ մաքսավորների  կոշտ վերաբերմունքի համար. «Անցակետով անցնելիս մեր ձեռքի մի ձմերուկը մաքսավորը դանակով կես է անում, մի կեսը թողնում  է անցկացնեք, մյուս կեսը մեր ձեռքից խլում ու շպրտում է»,- պատմում էր Բագրատաշենի առևտրական կանանցից մեկը:

Ցուցարարները  առևտրականների նկատմամբ մաքսավորների վատ վերաբերմունքի համար  մեղադրում էին Սերժ Սարգսյանին: «Ամեն ինչ վերևից է սկսվում»,- իրենց ելույթներում ասում էին նրանք:

Դեպի անցակետ  գնացող ցուցարաների շարքերը ձնագնդի պես մեծանում էր: Այն հասավ շուրջ 2000-ի:  Ցուցարաների շարքերում նկատեցինք  բագրատաշենցի  15-ամյա Համլետ Պապիկյանին: Նա վերջին 3 օրերի ցույցերի ակտիվ մասնակիցներից էր: Բագրատաշենի անցակետի  մոտ տեղի ունեցած ապրիլի 21-ի  ցույցին  մի ոստիկան պատռել է  Համլետի  շորը: Ասաց` ոստիկանը շորը իրեն քաշքշելիս է  պատռել:  Պատանին  անհանգիստ էր.

«Ախր,  հայրս հաշմանդամ մարդ է, հեշտությամբ չէ ինձ համար հագուստ առնում»,-բացատրեց  նա:  Համլետն ասաց, որ ցույցերին իր կռիվն ունի Սերժ Սարգսյանի դեմ:

«Ես  մեծ սիրով գնալու եմ ծառայելու,  բայց  ցանկանում եմ օրենքը գործի, հաստատվի արդարություն ու ինձ հետ  նույն զորամասում ծառայեն նաև Սերժ Սարգսյանի  շրջապատի  հարուստների երեխաները»,- բացատրեց  նա:

Արգիշտի  Խանդալյանը նույնպես հայտնեց  իր հակակրանքը հարուստների` բանակում չծառայող տղաների նկատմամբ. «Գիտեք, հարուստների երեխաները լպիրշ են մեծանում, չեն գնում բանակ ծառայելու:  Ու  Սերժն այդ արտոնությունը տվել է հանրապետական կուսակցության  վերնախավի  տղաներին»,- բացատրեց Արգիշտին:

Երթից 20 րոպե անց՝ ժամը 16:40 –ին  Սերժ Սարգսյանի հրաժարակի լուրը ստացվեց ցուցարաների շարքերում: Սկզբում ոչ ոք  չէր հավատում դրան: Հավաքվածների  մեծ  մասը  բջջային հեռախոսներով  սկսեցին լուրը  ճշտել Երևանում բնակվող իրենց  հարազատների և ծանոթների հետ:  Երբ լուրը ճշտվեց, բողոքի երթը վերածվեց տոնական շքերթի:  Ցուցարարները տոնում էին իրենց հաղթանակը, պարում ու բաժակաճառեր էին ասում:   «Բագրատաշենի անցակետի մաքսավորների դեմ  մեր  կռվում  հաղթելու ենք՝ ժողովրդի ընտրյալ վարչապետի  աջակցությամբ»,- ասաց բագրատաշենցի Սերգեյը:  

«Հիմա հավատում ենք,  որ  բանակ  կմեկնենք  հարուստների տղաների հետ»,- ասացին  Համլետն ու Արգիշտին:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ