Երեկ գրել էինք, որ երեկոյան մահացու դանակահարել են Էջմիածին քաղաքի բնակիչ Նվեր Հովհաննիսյանին։ Նա Էջմիածնի քաղաքապետի օգնականն է, Արցախյան պատերազմի մասնակից, ԵԿՄ Էջմիածնի տարածքային բաժանմունքի փոխնախագահը:

Երեկ ուշ ժամի պատճառով ոստիկանությունից հնարավոր չեղավ ճշտել դեպքի մանրամասները։ Նշել էինք, որ նախնական տեղեկություններով՝ Նվեր Հովհաննիսյանի և ցուցարարներից մեկի միջև վեճ է եղել, վերջինս էլ դանակով հարվածել է:

Ոստիկանության ԶԼՄ-ների հետ կապի բաժնի պետ Էդգար Ջանոյանն այսօր ասաց, որ ապրիլի 23-ին ժամը 18:55-ին Վաղարշապատի հիվանդանոցից հաղորդում է ստացվել ոստիկանություն: Հայտնել են, որ կրծքավանդակի աջ կեսի կտրած-ծակած վերք ախտորոշմամբ իրենց մոտ բուժօգնության է ընդունվել 1972թ. ծնված Նվեր Հովհաննիսյանը: Նույն օրը ժամը 22:45-ին նշված բժշկական կենտրոնից հաղորդում է ստացվել, որ Ն. Հովհաննիսյանը մահացել է: Դեպքի հանգամանքները պարզվում են և կատարվում է նախաքննություն:

Քննչական կոմիտեի նախագահի խորհրդական Սոնա Տռուզյանն էլ փոխանցեց, որ դեպքի առթիվ հարուցվել է քրեական գործ՝ քրեական օրենսգրքի 104-րդ հոդվածի հատկանիշներով (սպանություն): «Քննություն է տարվում պարզելու դեպքի հանգամանքները և առերևույթ հանցագործություն կատարած անձի ինքնությունը»,- տեղեկացնում է Ս. Տռուզյանը:

Մեր հրապարակումից հետո ֆեյսբուքյան օգտատերերը նշում էին, թե ցուցարարի հետ վեճ չի եղել: Վեճ հրահրել են նախկին պատգամավոր Հակոբ Հակոբյանի (Ճոյտ) կողմնակիցները: Վերջիններիս գործողությունները կրել են սադրիչ բնույթ և նրանք ամենևին կապ չեն ունեցել Սերժ Սարգսյանի վարչապետության դեմ բողոքող ցուցարարների հետ:

Հակոբ Հակոբյանից փորձեցինք տեղեկանալ, թե վերջինս կամ իր կողմնակիցներն ինչ առնչություն ունեն դեպքի հետ, քանի որ նրա անունն է շրջանառվում: «Հետք»-ի հետ զրույցում Հակոբյանն ասաց, որ երեկ երեկոյան, ինչպես ամբողջ հանրապետությունում, այնպես էլ Էջմիածին քաղաքում Սերժ Սարգսյանի վարչապետի պաշտոնից հրաժարական ներկայացնելուց հետո ժողովուրդը հավաքվել է հրապարակում:

«Այն հրապարակում, որտեղ նախկինում արգելված է եղել քաղաքացիների կանգնելը, շփվելը, մեքենաների կանգնելը: Ես կոնկրետ եկել եմ այդ հրապարակ ժողովրդի հավաքվելուց, 3-4 հարյուր մարդ էր հավաքված, մոտ 2 ժամ հետո՝ 6.30-ի կողմերը: Երբ ժողովուրդը մեկը մյուսին համբուրում էին, շնորհավորում էին, ես էլ որպես Էջմիածին քաղաքի բնակիչ կանգնել եմ, իմ 70 տարեկան ընկերոջ հետ էի»,- ասում է Հակոբ Հակոբյանը:

Հակոբյանի խոսքերով՝ այդ ընթացքում նա շփվել է համաքաղաքացիների հետ: Իսկ մի տղամարդ ելույթ է ունեցել և ձեռքերով ցույց է տվել մարդկանցից 20-25 մետր հեռավորության վրա կանգնած Էջմիածնի քաղաքապետ Կարեն Գրիգորյանին և նրա թիմակիցներին: Հակոբ Հակոբյանի պատմելով՝ տղամարդն ասում էր, որ ապրիլի 23-ի առավոտյան իր տղայի աչքի առաջ իրեն ծեծել, ստորացրել են: Նախկին պատգամավորը պատմեց, որ մեկ այլ քաղաքացի էլ դժգոհել է, որ նույն մարդիկ ծեծել են նաև իր տղային և այդ մասին տեղեկացրել է ոստիկանությանը:

Հակոբ Հակոբյանն ասաց, որ դժգոհող քաղաքացիներին չի ճանաչել, չգիտի էլ՝ քաղաքի բնակիչ են, թե գյուղերի: Նրանց հետ որևէ առնչություն չի ունեցել:

«Տեսավ, որ քաղաքապետն ու իր կողմնակիցներն իրեն նայում են, ձեռքն ուղղեց այն կողմ ու ասաց, որ այ էս սպարտիվկայով տղան էր ինձ ծեծում իմ տղայի մոտ և վիրավորված լինելով՝ հայհոյեց: Այդ ժամանակ Կարեն Գրիգորյանը թիմակիցների հետ մտավ ժողովրդի մեջ, թե ինչ եք անում: Իմ հետ փորձեց զրույցի բռնվել: Տվյալ պահին ոչ մեկ ոչ մեկի չի խփել, որևէ բան տեղի չի ունեցել»,- նշում է Հ. Հակոբյանը՝ հավելելով, որ ժողովուրդը վանկարկումներով ցույց է տվել իր անհամաձայնությունը և քաղաքապետն ու իր թիմակիցները, առանց որևէ միջադեպի, հետ են գնացել ու կանգնել իրենց տեղում:

Հակոբ Հակոբյանի կարծիքով՝ դանակահարության միջադեպը եղել է հավանաբար ավելի ուշ, քանի որ եթե այդ ժամանակ լիներ, Գրիգորյանը կամ նրա հետ եկած անձինք կասեին, որ դանակահարվել է իրենց կողմնակիցը: Սակայն, նմանատիպ խոսակցություն չի եղել և նրանք ավելի շատ «ցույց են տվել իրենց ուժը, դուխը, իբր մենք թելադրել ենք և շարունակելու ենք թելադրել»:

Հակոբ Հակոբյանն ասում է, որ երբ քաղաքապետի կողմնակիցները մոտեցել են ցուցարար քաղաքացուն, այդ ժամանակ նրանց խմբում չի եղել Նվեր Հովհաննիսյանը, նրան չի տեսել:

«Գրեք, որ իրանք ուզում էին ցույց տալ, որ նախկինում ոնց իշխել են Էջմիածնում, հիմա էլ փորձում են նույն ձևով, փոփոխություն կլինի, ինչ կլինի, իրենց ձևը որևէ քաղաքացի չի կարող խախտել: Ցուցարարների մեջ գալու ամբողջ նպատակը դա էր»,- ասում է Հակոբյանը:

Նախկին պատգամավորն ասում է, որ այնտեղ եղել են տեսախցիկներ և հետաքրքրվողները հանգիստ կարող են տեսնել, թե ինքն ում հետ է եկել հրապարակ և ինչ առնչություն է ունեցել դեպքին:

Էջմիածնի քաղաքապետարանի լրատվության բաժնի պետ Մարիամ Պողոսյանն էլ ասաց, որ երեկ որոշ անձինք օգտվելով ստեղծված վիճակից սադրիչ գործողություններ և հայտարարություններ են արել՝ փորձելով խաղաղ բնակիչներին դրդել անօրինությունների:

«Նշեմ, որ դեպքը տեղի է ունեցել Սերժ Սարգսյանի հրաժարականից ժամեր անց և խոսք չի կարող գնալ երթը Էջմիածնի քաղաքապետարանի կամ ԵԿՄ անդամների կողմից խոչընդոտելու մասին: Տվյալ ժամին ոչ երթ է եղել, ոչ էլ ցույցեր: Սադրիչներին առաջնորդել է նախկին ԱԺ պատգամավոր Հակոբ Հակոբյանը, ով շատ աչքի ընկած քրեական անցյալ ունի: Դուք էլ երևի ճանաչում եք»,- ասում է Մարիամ Պողոսյանը՝ հավելելով, որ սադրիչներից մեկն է հարվածել Նվեր Հովհաննիսյանին կտրող-ծակող գործիքով:

Մարիամ Պողոսյանը, անդրադառնալով Հակոբ Հակոբյանի դիրքորոշմանը, թե ցուցարարներից մեկը մատնացույց է արել մի անձի և ասել, որ իրեն որդու ներկայությամբ հարվածել, ստորացրել է, նշեց, թե ցուցարարները սոցիալական ցանցում խումբ ունեն և նշել են, որ իրենց որևէ մեկը չի ճնշել, չի խանգարել և ակցիաների ընթացում միջադեպեր չեն գրանցվել:

Քաղաքապետարանի լրատվության բաժնի պետը նշում է, որ ակնհայտ է՝ այդ անձինք ցուցարար չեն եղել և հիմա էլ սոցիալական խմբերում Հակոբյանի կողմնակիցները սադրիչ գրառումներ են կատարում: Նշեց, որ այդ ժամանակ հրապարակում եղել են մի քանի հոգի, ովքեր մեքենաներով կանգնած էին և ահագին հեռու ուրախանում էին:

Լուսանկարում ձախից առաջինը Նվեր Հովհաննիսյանն է / Նվեր Հովհաննիսյանի ֆեյսբուքյան էջից