Avtodoria ընկերությունը պիլոտային ծրագիր կիրականացնի Երևան-Դիլիջան ճանապարհահատվածում
Տրանսպորտի, կապի և տեղեկատվական տեխնոլոգիաների նախարարի պաշտոնակատար Վահան Մարտիրոսյանն ընդունել է Avtodoria ընկերության զարգացման տնօրեն Մաքսիմ Նեչեուխինին և վաճառքի տնօրեն Միխայիլ Ժադովին։
Կարճ տեսահոլովակի միջոցով նրանք ներկայացրել են իրենց գործունեության շրջանակներն ու առանձնահատկությունները, որը խելացի տրանսպորտային համակարգի գործուն մոդել է։
Նախարարության պաշտոնական կայքի համաձայն՝ համակարգը միտված է ճանապարհային երթևեկության անվտանգության բարձրացմանը: Այն հնարավորություն ունի ոչ միայն կազմակերպելու, ուղղորդելու երթևեկությունը, վերահսկելու տրանսպորտային հոսքերը, այլև վերլուծելու տրանսպորտային իրավիճակները:
Նշվել է, որ համակարգը ներդրվել է մի շարք երկրներում և ակնհայտ է, որ դրա կիրառմամբ ճանապարհատրանսպորտային պատահարների կտրուկ նվազում է արձանագրվում։ Ընկերության ներկայացուցիչներն ընդգծել են ներկայացվող համակարգի առավել արդյունավետ կիրառությունը հատկապես թունելներում և առաջարկեցին այն փորձարկել Հայաստանի ավտոճանապարհներից մեկում։
Վահան Մարտիրոսյանը մի շարք դիտարկումներից հետո առաջարկել է պիլոտային ծրագիր իրականացնել Երևան-Դիլիջան ճանապարհահատվածում։
Պայմանավորվածություն է ձեռք բերվել նախարարության համապատասխան ոլորտի մասնագետների հետ տեղում ուսումնասիրություններ իրականացնել, որից հետո քննարկել հնարավոր համագործակցության մանրամասները։
Մեկնաբանել