Հինգշաբթի, 20 սեպտեմբերի

Բերդում մոտ 500 տավուշցի բողոքի ակցիա է իրականացրել



Արդեն չորս օր է՝ Տավուշի մարզի Բերդ քաղաքում հավաքվում են հարյուրավոր ցուցարարներ Չինարիից, Այգեձորից, Չինչինից, Նավուրից, Արծվաբերդից, Մովսեսից, Նորաշենից, Վերին Կարմրաղբյուրից։ Նրանք միանում են Երևանում և հանրապետության մյուս շրջաններում ծավալվող շարժմանը և բողոքի ակցիաներ իրականացնում՝ տավուշցիներին կոչ անելով միանալ իրենց պայքարին։

Ինչպես «Հետք»-ին հայտնեց Այգեձորի բնակիչ Ծովինար Սաֆարյանը, Տավուշի մի շարք համայնքներում ավագ դպրոցների աշակերտները արդեն քանի օր է դասադուլ են հայտարարել և հրաժարվում են դպրոց գնալուց։ Նրա փոխանցմամբ՝ բողոքի ակցիաների շարժող ուժը այդ երիտասարդներ են։

«Շարժումը Այգեձորի երիտասարդների նախաձեռնությամբ է սկսվել, գյուղերում ավագ դպրոցի երեխանները, որոշներում էլ ամբողջ դպրոցը դասադուլ են արել, դեռ երեկ մեզ հետ ընդամենը 4 գյուղ էր, այսօր արդեն 10 գյուղի երիտասարդներ միացել են, արդեն մեծահասակներն են միանում»,- նշեց Ծովինարը։

Նրա փոխանցմամբ՝ գյուղերից առավոտյան երթով շարժվել և միացել են Բերդի ցուցարարներին։ Այսօր մոտ երկու հարյուր ցուցարարներ են հավաքվել Բերդում, որոնք պատրաստվում են շարունակել ցույցերը, եթե այսօրվա ընթացքում որևէ հանգուցալուծում չտրվի։ Գյուղերի ներկայացուցիչներից խորհուրդ է կազմվում շարժումը մինչև վերջ տանելու համար։

Ցուցարարի հաղորդմամբ՝ ցույցի առաջին օրերին հավաքի որոշ մասնակիցների բերման էին ենթարկում, բայց այժմ իրավիճակը հանգիստ է, որևէ ցուցարարի ոստիկանական բաժին չեն տանում։

Հիշեցնենք, որ Հայաստանում բողոքի զանգվածային ցույցերը մեկնարկել են ապրիլի 13-ին։ Ցույցերի 11-րդ օրը վարչապետ Սերժ Սարգսյանը հայտարարեց իր հրաժարականի մասին, որից հետո Նիկոլ Փաշինյանի ղեկավարած շարժումը պահանջեց իշխանությունից Հանրապետական կուսակցության հեռացումը։ Այսօր առավոտյան Փաշինյանը քաղաքացիներին կոչ արեց փողոցները փակելու փոխարեն բացառել առանց համարանիշի կամ փակված համարանիշով մեքենաների վարումը, ինչը մեծ տարածում էր գտել վերջին օրերին և հարուցել շատերի դժգոհությունը։



Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ