Չորեքշաբթի, 19 սեպտեմբերի

Նիկոլ Փաշինյան. «Էականն այն է, որ կա երկրի ղեկն իր ձեռքը վերցրած ժողովուրդ»



Ժողովրդական շարժման ներկայացուցիչներից Արմեն Գրիգորյանն այսօր Հանրապետության հրապարակում կայացած հանրահավաքին հայտարարեց, որ երկրի կառավարման հիմքում պիտի լինի ազատությունը, շարժման ապակենտրոնությունը պիտի տեղափոխվի իշխանություն: Գրիգորյանը շեշտեց, որ հզոր Հայաստանի հիմքը ազատ եւ արդար ընտրություններն են, բացի դրանից՝ նա կարեւորեց անցումային արդարադատությունը, որը կարեւոր գործիք է, որպեսզի վերականգնվի վստահությունը կառավարության հանդեպ:

Աշխարհահռչակ լողորդ Շավարշ Կարապետյանը ելույթից առաջ հուզվեց, ապա ասաց, որ Երեւան է եկել՝ Ռուսաստանի երիտասարդների ուղերձը փոխանցելու: Նա նշեց, որ ժողովրդական շարժման կողքին են Ռուսաստանում ապրող մեր հայրենակիցները, ապա շեշտեց, թե թող պապանձվի նրա լեզուն, ով կասի, թե այստեղ ճշմարտություն չկա:

«Քաղաքացիական պայմանագիր» կուսակցության անդամ Զարուհի Բաթոյանն էլ նշեց, որ այս հեղափոխությունը չի եկել ջարդել-փշրելու. շարժման նպատակը արդեն իսկ ստեղծվածը բարելավելն է: «Մենք պետական համակարգը չենք ավերելու: Կառուցելու, զարգացնելու ենք մեր երկիրը»,- ասաց Բաթոյանը:

«Ելք» դաշինքի անդամ, ԱԺ պատգամավոր Արարատ Միրզոյանն էլ հայտարարեց, որ հիմա թեւակոխում ենք նոր փուլ, որն ավելի դժվար է լինելու: Նա վստահություն հայտնեց, որ վաղը ԱԺ-ն Նիկոլ Փաշինյանին ընտրելու է վարչապետ: Միաժամանակ Միրզոյանը 4 կետ առանձնացրեց, որը պետք է իրագործի շարժումը: Առաջին՝ ապահովել լայն քաղաքական համերաշխություն, երկրորդ՝ ապահովել երկրի բնականոն գործունեությունը, երրորդ՝ ստեղծել մեխանիզմներ՝ ընտրական համակարգի բարեփոխման համար, չորրորդ՝ կազմակերպել արտահերթ խորհրդարանական ընտրություններ: Միրզոյանը խնդրեց ժողովրդի աջակցությունը այս գործընթացում:

Նույն դաշինքի անդամ, ԱԺ պատգամավոր Սասուն Միքայելյանը նշեց, թե այսքան տարի իշխանություններն իրենց վարած քաղաքականությամբ բերել են նրան, որ հայոց տունը քանդվում էր, սակայն Ն. Փաշինյանի գլխավորությամբ հաջողվել է ստեղծել հզոր բանակ: Միքայելյանի ասելով՝ ժողովրդի մեջ ինքն այլեւս հավատ, վստահություն ու ապագա է տեսնում: «Վաղը մենք սկիզբը կապելու ենք վերջին»,- հայտարարեց նա:

Շարժման առաջնորդ, ԱԺ պատգամավոր, վարչապետի միակ թեկնածու Նիկոլ Փաշինյանն էլ ասաց, որ աշխարհի ուշադրությունն այնպես է կենտրոնացած Հայաստանի ու Երեւանի վրա, որ կարծես այստեղ պիտի ֆուտբոլի աշխարհի առաջնության եզրափակիչն անցկացվի: Ըստ նրա՝ հայ ժողովրդին հաջողվել է վերջին 15 օրում Հայաստանը դարձնել աշխարհի ամենաքննարկվող թեմաներից մեկը: Հայաստանը, Փաշինյանի հայտարարմամբ, դարձել է մի տեղ, որտեղի իրադարձությունները զարմացնում, հիացնում ու մտածելու տեղ են տալիս աշխարհին:

Նա նշեց, որ այսօր առավոտյան «Ելք» խմբակցության կողմից պաշտոնապես առաջադրվել է վարչապետի թեկնածու եւ միակն է որպես այդպիսին, քանի որ մյուս ուժերն առաջադրումներ չեն արել: Փաշինյանը վստահություն հայտնեց, թե շատ մեծ հավանակություն կա, որ վաղը ժողովրդի թեկնածուն ընտրվելու է վարչապետ: Միաժամանակ շեշտեց, որ էական չէ, թե ով կլինի վարչապետ, էականն այն է, որ կա երկրի ղեկն իր ձեռքը վերցրած ժողովուրդ, որը գիտի, թե ինչ պետք է անել, եթե իշխանությունը փորձի լկտիանալ, «տեղը չբերել». «Կա քաղաքացի, ով ասում է՝ մենք ենք տերը մեր երկրի»: Ըստ Փաշինյանի՝ սա թավշյա, ոչ բռնի, ժողովրդական հեղափոխության ամենամեծ ձեռքբերումն է:

Նիկոլ Փաշինյանը կոչ արեց վաղը ժամը 11-ից հավաքվել Հանրապետության հրապարակում ու մեծ էկրանների միջոցով հետեւել ԱԺ-ում ընթացող իրադարձություններին: Ըստ Փաշինյանի՝ ընտրությունից հետո իրենք միանալու են ժողովրդին եւ տոնեն վերջինիս հաղթանակը: Շարժման ղեկավարը հորդորեց այլ գործողությունների չդիմել, բողոքի ակցիաներ չանել:         


Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ