HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Երևանի թիվ 180 դպրոցի ուսուցիչներն ու աշակերտները փակել են փողոցը

Ավան վարչական շրջանի թիվ 180 դպրոցի ուսուցիչներն ու աշակերտները արդեն տևական ժամանակ է՝ Բաբաջանյան փողոցում են: Նրանց հետ են իրենց աշակերտներն ու վերջիններիս ծնողները: Բողոքի ակցիայի դուրս եկած անձինք փողոց են տեղափոխել մայթեզրերի նստարաններն ու սահմանափակել փողոցի երթևեկությունը: Ինչպես մեզ հայտնեց բողոքի ակցիայի մասնակից ուսուցիչ Ռուզաննա Մելիքյանը, բողոքի ակցիային մասնակցում են դպրոցի բոլոր ուսուցիչները, իսկ տնօրենը նպատակահարմար չի գտել մասնակցել դրան:

Մելիքյանը հայոց լեզվի և գրականության ուսուցչուհի է: Մեզ հետ զրույցում սրտնեղեց, որ այլևս հնարավոր չէ երեխաներին «Ազատություն» սովորեցնել:

«Ես երեկ Նալբանդյանի «Ազատությունն էի անցնում երեխաների հետ, բայց այս անօրեն երկրում ինչպե՞ս «Ազատություն» սովորեցնեմ երեխաներին»,- ասաց Մելիքյանը:

Բողոքի ձայնը բարձրացրած ուսուցչի պնդմամբ` իրենք վաղը ևս շարունակելու են իրենց բողոքի ակցիան. գնալու են դպրոց, բայց շենք չեն մտնելու:

«Ժողովրդի դժգոհությունն այլևս չափ ու  սահման չունի. մենք պահանջում ենք արդար ու ճիշտ իշխանափոխություն», - հայտարարեց Մելիքյանը:

Հիշեցնենք, որ երեկ` Ազգային ժողովի հատուկ նիստում պատգամավորների ձայների մեծամասնությամբ վարչապետ չընտրվելուց հետո, «Իմ քայլը» շարժման առաջնորդ Նիկոլ Փաշինյանը կոչ արեց վերսկսկել քաղաքացիական անհնազանդության տոտալ գործողությունները, այսօր վաղ առավոտից` 8:15-ից, շրջափակել հանրապետության հաղորդակցության բոլոր ուղիները` փողոցները, երկաթուղին, մետրոն, օդանավակայանը, միջպետական ճանապարհները, հայտարարել տոտալ դասադուլ և գործադուլ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter