Դատապարտվածների մեջ մեծ թիվ են կազմում գործազուրկներն ու զինծառայողները (ինֆոգրաֆիկա)
Գագիկ Աղբալյան
Հայաստանի դատական դեպարտամենտի տվյալների համաձայն՝ մեր հանրապետությունում 2017 թվականին դատապարտվել է 2410 մարդ, որից 181-ը` կանայք:
Նրանցից 96-ն անչափահաս է, այդ թվում՝ 4 աղջիկ:
258 անձանց վերաբերյալ գործերը կարճվել են, 61 անձ արդարացվել է, 50 անմեղսունակների նկատմամբ կիրառվել են բժշկական բնույթի հարկադրական միջոցներ: Ազատազրկված դատապարտվածների թվաքանակը կազմել է 1410 մարդ: 859 դատապարտվածների նկատմամբ նշանակված պատիժը պայմանականորեն չի կիրառվել, 3-ի նկատմամբ կիրառվել է համաներման ակտ:
Դատապարտվածների մեծամասնությունը գործազուրկ է: 18-29 տարեկանները կազմում են նրանց ամենամեծ տարիքային խումբը: Դատապարտվածների մոտ 25 տոկոսից ավելին (657) պատիժ է կրում սեփականության դեմ ուղղված հանցագործությունների համար:
Քիչ չեն նաեւ զինվորական ծառայության կարգի դեմ ուղղված հանցագործությունները՝ 375:
Ինֆոգրաֆիկայի միջոցով ներկայացնում ենք դատապարտվածների թիվն ըստ մարզերի եւ զբաղմունքի:
2017թ. գործել է 12 քրեակատարողական հիմնարկ, որից մեկում առկա է անչափահասների համար նախատեսված տեղամաս: Ըստ մարզերի՝ ամենամեծ թվով անչափահասներ են դատապարտվել Շիրակի մարզում (15): Իսկ Երեւանում նախորդ տարի դատապարտվել է 41 անչափահաս:
Հանրապետությունում նախորդ տարի դատապարտված 96 անչափահասներից 65-ը մեղավոր են ճանաչվել սեփականության դեմ կատարված հանցագործության մեջ։ Ուշագրավ մի թիվ եւս` 96-ից 35-ը չեն աշխատել եւ չեն սովորել։
Մեկնաբանել