Հինգշաբթի, 16 օգոստոսի

Բողոքի ակցիա՝ ընդդեմ Երևանի 2800-ամյակի առթիվ բարեկարգվող այգում կատարված ծառահատումների



16:03

Այս պահին քաղաքապետարանի շենքի դինաց հավաքվել են հարյուրավոր քաղաքացիներ, ովքեր պահանջում են քաղաքապետ Տարոն Մարգարյանի հրաժարականը: Ցուցարարները արդեն տեւական ժամանակ է փորձում են մուտք գործել քաղաքապետարանի շենք, սակայն նրանց արգելում են: Ցուցարարները նշում եմ, որ տարածքում կան սադրիչներ, ովքեր արգելում են ցուցարարներին մտնել շենք եւ փորձում բախում հրահրել:

15:28

«Ելք» խմբակցության ավագանու անդամ Անի Խաչատրյանը քիչ առաջ քաղաքապետարանի շենքի առաջին հարկ հասնելով` մոտեցավ այնտեղ կանգնած` քաղաքապետարանի Քաղաքաշինության եւ հողի վերահսկողության վարչության պետ Հայկ Ասատրյանին եւ ասաց` «Քո բաժնի աշխատակիցները ցուցարարներին բրթելու համար չեն» եւ հեռացավ:

Խաչատրյանը «Հետք»-ի հետ զրույցում նշեց, որ քաղաքապետարանի մուտքի դիմաց կանգնած տղամարդիկ ցուցարարներին արգելում են ներս մտնել: Նրա փոխանցմամբ՝ արգելողները այս բաժնի աշխատակիցներն են: Նրա խոսքով` քիչ առաջ այնտեղ կանգնած է տեսել այդ աշխատակիցներին, սակայն դժվարացավ նրանց անուններն ասել:

Նշենք, որ քաղաքապետարանի մուտքի դիմաց լարված իրավիճակ է, անծանոթ տղամարդիկ կանգնել են մուտքի մոտ եւ ցուցարարներին արգելում են ներս մտնել` փակելով ճանապարհը:

15:03

Այս պահին Երեւանի քաղաքապետարանի ներսում լարված իրավիճակ է: Քաղաքապետարանի դիմաց հավաքված ցուցարարներն ամեն կերպ փորձում են մտնել շենք, որքան էլ անվտանգության աշխատակիցները խիստ հսկողություն են սահմանել մուտքի մոտ:

14:50

Հարյուրավոր քաղաքացիներ են հավաքվել Երեւանի քաղաքապետարանի դիմաց: Նրանց արգելում են մուտք գործել շենք եւ միանալ քաղաքապետարանի ներսում բողոքի ակցիա իրականացնող ցուցարարներին: Ցուցարարները փակել են Արգիշտի եւ Գրիգոր Լուսավորիչ փողոցները, երթեւեկությունը դադարել է:

14:19

Երևանի քաղաքապետարանի աշխատակազմի քարտուղար Սերգեյ Մակարյանը դիմել է ոստիկանությանը: Գրավոր դիմումում ասված է.

«Հարգելի պրն Օսիպյան,

օրենսդրության խախտմամբ տեղի է ունեցել ներխուժում՝ ՀՀ ոստիկանության կողմից պահպանվող պետական պահպանության օբյեկտ հանդիսացող Երևանի քաղաքապետարանի շենք` խոչընդոտելով քաղաքապետարանի աշխատանքի բնականոն ընթացքը։

Դիմում ենք Ձեզ՝ ձեռնարկելու միջոցներ ոչ օրինական գործողությունները դադարեցնելու և քաղաքապետարանի բնականոն գործունեությունը վերականգնելու համար»։

14:16

Երեւանի քաղաքապետարանի անվտանգության աշխատակիցները քաղաքապետարան եկած ցուցարարների նոր խմբին արգելում են մտնել շենք եւ միանալ Տարոն Մարգարյանի աշխատասենյակի առջեւ բողոքի ակցիա իրականացնողներին:

13:52

Երեւանի փոխքաղաքապետ Կամո Արեյանը ցուցարարներին առաջարկեց քաղաքապետարանի այլ մասնաշենքում հանդիպել Տարոն Մարգարյանին, փոխքաղաքապետերին եւ համապատասխան վարչության պետերին՝ հուզող խնդիրները լուծելու համար: Սակայն ցուցարարները հրաժարվեցին՝ ասելով, որ քաղաքապետին սպասում են այստեղ՝ իր աշխատասենյակի առջեւ:

13:28

Այստեղ են փոխքաղաքապետ Դավիթ Օհանյանը եւ քաղաքապետարանի տեղեկատվության եւ հասարակայնության հետ կապերի վարչության պետ Արթուր Գեւորգյանը:
Ցուցարարները բարեկարգվող այգուց հատված կանաչ ծառ են բերել Տարոն Մարգարյանի աշխատասենյակ: 
Դավիթ Օհանյանը ցուցարարներին առաջարկեց բարձրանալ ճեպազրույցների սենյակ եւ բարեկարգվող այգու վերաբերյալ քննարկում անցկացնել մասնագետների հետ: Ցուցարարներն ասացին, որ կհամաձայնեն, եթե քննարկմանը գա Երեւանի քաղաքապետ Տարոն Մարգարյանը: 
Օհանյանը ցուցարարներին ասաց, որ քաղաքապետը կգա այն ժամանակ, երբ մասնագետների պատասխանները բավարար չլինեն: Ցուցարարները, միեւնույն է, մերժում են՝ ասելով, որ քաղաքապետարանի շենքում կմնան այնքան ժանանակ, մինչեւ հանդիպեն Տարոն Մարգարյանին: 

13:24

Քաղաքապետարան մտած ցուցարարները Տարոն Մարգարյանի աշխատասենյակ են հասել եւ շարունակ բղավում են՝ Տարոն, հեռացիր: Ցուցարարները ձեռքերը վերեւ են պարզել՝ ցույց տալով, որ իրենց ակցիան խաղաղ է: 

13:14

Ցուցարարներից ոմանք մտել են Երեւանի քաղաքապետարանի շենք եւ բղավում են` «Տարոն, հանցագործ», «Տարոն, իջիր»: Նրանք ցանկանում են այգու ծառահատումների վերաբերյալ պարզաբանում ստանալ անձամբ քաղաքապետից:

Չնայած փոխքաղաքապետ Դավիթ Օհանյանի եւ քաղաքապետարանի անվտանգության աշխատակիցների ջանքերին`  ցուցարարները մտան քաղաքապետարան եւ այս պահին քաղաքապետարանի հարկերով բարձրանում են` վանկարկելով՝ «Տարոն, հեռացիր»:

13:08

Քաղաքապետարանի պաշտոնյաների դիտարկմանն ի պատասխան, թե հատված ծառերը չոր են, ցուցարարներն այգու վերջից հատված ծառեր բերեցին՝ հարցնելով` սա չո՞ր է: 
Հատված կանաչ ծառերը ցուցարարները բերեցին եւ դրեցին Երեւանի քաղաքապետարանի շենքի դիմաց` Երւանի քաղաքապետ Տարոն Մարգարյանին ասելով. «Տարոն, է՞ս ա չորացած ծառը»:

 

12:51

Բողոքի ակցիայի մասնակիցներին Երեւանի քաղաղաքապետարանի բնապահպանական վարչության պետ Ավետ Մարտիրոսյանն ասաց, որ 40-45 բարձրարժեք ծառ է տնկվելու այգում, շատրվաններ են կառուցվելու եւ դրանց հարեւանությամբ տնկվելու են նոր ծառեր: Նրա փոխանցմամբ` հատված ծառերը փտած են եղել, 50 տարվա հնության եւ արդեն վտանգավոր էին: Ցուցարարները վարչության պետից հստակ ապացույցներ պահանջեցին, որ այդ ծառերը փտած են եղել: Նա նշեց, որ սեպտեմբերին նոր այգի կլինի եւ քաղաքացիները կտեսնեն, թե ինչպիսի տեսք այն ունի:

Այստեղ է նաեւ Երեւանի փոխքաղաքապետ Դավիթ Օհանյանը: Ցուցարարները պաշտոնյաներին մեղադրեցին առանց հանրային լսում կազմակերպելու նման ծավալի ծառահատում իրականացնելու համար:

Ցուցարարներից ոմանք Դավիթ Օհանյանին ասացին, որ նա հրաժարական պետք է տա քաղաքի նման տեսքի, այսչափ ծառահատում իրականացնելու համար: «Մենք մեր ծառերն ենք ուզւոմ, մեր հարյուր տարվա ուռենիներն ենք ուզում»,- Օհանյանին ասաց ցուցարարներից մեկը: 

12:28

Ցուցարարները պատռեցին այգին փակած բարեկարգման պաստառները, քանդեցին որոշ թիթեղներ եւ մտան այգի՝ տեսնելու, թե այն ինչ վիճակում է: 
Այս պահին ցուցարարները շարունակում են պոկել այգին փողոցից շրջափակած պաստառները: Տղամարդիկ քանդում են թիթեղները:
 

12:14

Երեկ համացանցում հրապարակվեց Երեւանի Իտալիայի և Բեյրութի փողոցների միջնամասում, Երևանի 2800-ամյակի առթիվ բարեկարգվող այգու լուսանկարը, որից պարզ դարձավ, որ բարեկարգման աշխատանքների անվան տակ ծառահատումներ են կատարվել: Այդ փաստը շատերի զարմանքն ու զայրույթն առաջացրեց եւ այսօր արդեն բողոքի ակցիայի առիթ դարձավ:

Տասնյակ ցուցարարներ եւ բնապահպաններ են այժմ հավաքվել Երեւանի քաղաքապետարանի դիմաց: Ցուցարարների մի մասը քիչ անց պատրաստվում է գնալ այգի եւ ներսից տեսնել, թե ինչ վիճակում է այն, քանի ծառ է հատվել եւ ինչ աշխատանքներ են կատարվել:

Քաղաքացիները երեկ սոցիալական ցանցերում տարածում էին լուսանկար, թե ինչպիսին էր այգին մինչ Երևանի քաղաքապետ Տարոն Մարգարյանի պաշտոնավարումը, և ինչ տեսք ունի այն այժմ:

Երեկ Երևանի քաղաապետարանը պարզաբանեց, որ մայրաքաղաքի Իտալիայի և Բեյրութի փողոցների միջնամասում գտնվող այգում իրականացվող հիմնանորոգման աշխատանքների շրջանակում, մասնագիտական համապատասխան եզրակացությամբ, հատվել են չոր և ծերացած ծառեր:

Քաղաքապետարանը հավաստիացնում է, որ բարեկարգման աշխատանքների շրջանակում նախատեսված է այգին համալրել քառապատիկ ավելի քանակությամբ նոր ու բարձրարժեք ծառերով, որոնք համահունչ են լինելու բարեկարգվող այգուն:

Ա. Մյասնիկյանի արձանի հետնամասում գտնվող Իտալիայի, Բեյրութի, Խորենացու և Գ. Լուսավորչի փողոցների սահմաններով պարփակված այգին բարեկարգվում է «Վարդանյան ընտանիք» բարեգործական հիմնադրամի կողմից և նվիրվելու է Երևանի հիմնադրման 2800-ամյակին:

Հավելենք, որ այս այգում կատարված գիշերային ծառահատումների մասին ահազանգել էինք դեռևս փետրվարի 3-ին:


Գլխավոր էջ



Մեկնաբանություններ (3)
1. Nairi19:33 - 16 մայիսի, 2018
The official also claimed that the tree (Oak tree that is) lives only 50 years, that information is not correct, the oak trees can reach over 1000 years, it is obvious that he is not aware of the nature, or life of trees. An mature oak tree can grow up to 45 meters tall and can spread almost as wide. At 700 years old the oak has reached old age. It produces fewer acorns and only grows very slowly. At 1000 years old, the oak is nearing the end of its life. People should do their research before they make any comments.
2. eddy05:56 - 17 մայիսի, 2018
I don't think such kind of RADICAL actions by environmentalists would help Nikol and his new team ..I think a lot of people can still remember how dirty "the lovers" park was before being redesigned by the Boghosian foundation !!!!! First off all Thank you to Vartanina family for there great gift to Yerevan. The Yerevan city authorities hat to inform what was going on. I think there are a lot of miscommunication and misunderstanding for which first off all the city authorities are blame for it! I do visit Armenia/Yerevan at least twice a year. This "park" had /has a couple nice big tress, but still this park is /was in a very bad condition. Happy to see that the park being redesigned- As it was the case with Cascade or "lover parks" Thank you to the Vartanian family,. Yerevan city authorities should learn to engage and inform people about all projects before final approval etc.
3. eddy06:03 - 17 մայիսի, 2018
PS... I don't like this city authorizes, but I was relay, relay upset ,as I realize that a young environmental activist had no clue and information about "armenian carpets" , and she was mentioning it (the project of pay ways ) in a video as something form "Uzbekistan "
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ