Արմավիրի մարզի Նորակերտի համայնքապետ Շահեն Կարապետյանը չի պատրաստվում հրաժարականի դիմում ներկայացնել: Բնակչության ճնշման տակ նա դուրս եկավ իր աշխատասենյակից և հայտարարեց, որ կառավարությունը պետք է որոշի իր հրաժարականի հարցը:

Ցուցարարները արգելում էին համայնքապետին հեռանալ տարածքից: Երբ Շահեն Կարապետյանը նստեց ավտոմեքենան, որպեսզի հեռանա, նորակերտցիները փակեցին ճանապարհը` ստիպելով ոտքով անցնել ցուցարարների շարքերով: Այդ ժամանակ հավաքվածները բղավում էին` «Հեռացիր»,«Ամոթ», «Պատասխան տուր»:

Ցուցարարներին է միացել գյուղի դպրոցի աշակերտների մի մասը:

Հիշեցնենք, որ Նորակերտ գյուղի բնակիչներն այսօր շարունակում են իրենց բողոքի ակցիան: Նրանք դարձյալ փակել են գյուղի ճանապարհը և այս անգամ կոչ են անում համայնքի ղեկավար Շահեն Կարապետյանին և ավագանու անդամներին ներկայացնել իրենց հրաժարականը: Դրանից հետո կանցկացվեն արտահերթ ընտրություններ, ինչի արդյունքում, ցուցարարների կարծիքով, ընտրված ավագանին և ղեկավարը հնարավորություն կստանան ուսումնասիրել և համայնքի բնակիչներին ներկայացնել պարզաբանումներ տարիներ շարունակ համայնքային սեփականություն հանդիսացող գույքի օտարմանն առնչվող հարցադրումների վերաբերյալ։