HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Լեռնագոգում սարսափով են պատմում սելավի մասին

Արմավիրի մարզի Լեռնագոգ գյուղի փողոցներն այսօր վաղ առավոտյան սովորականից մարդաշատ էին: Գյուղացիները հերթով իրար տուն էին մտնում և հարցնում, թե ով ինչ վնաս է կրել: Մարդիկ սարսափով էին պատմում երեկ` ժամը 22-ից մոտ 2 ժամ իրենց տներն ու անասնագոմերը ողողած սելավի մասին: Կանայք նույնիսկ հուզվում էին: Արտակ Գալստյանի ականջներում դեռ լսվում է ջրերի հետ եկող ու դարպասներին, պատերին հարվածող քարերի ձայնը: Այդ ձայներից երեխաները գիշերը չեն կարողացել քնել:

Տեղեկացրել էինք, որ երեկ՝ ժամը 22:00-ի սահմաններում Լեռնագոգի սելավատարից անձրևաջրերը լցվել են գյուղ: Վնասվել են ցածրադիր հատվածում գտնվող երեք փողոցների տները, ցանքատարածություններն ու անասնագոմերը: Ջուրը լցվել է նաև նկուղները, քանդվել են մի քանի տների պարիսպները, անասնագոմերի պատերը: Սատկել են նաև մի քանի հարյուրի հասնող հավի ճտեր:

Լեռնագոգի համայնքապետ Սարգիս Մարգարյանը «Հետք»-ին ասաց, որ 120 տնտեսություն վնաս է կրել անձրևաջրերից, սակայն վնասի չափը դեռ հաշվարկված չէ: Պետք է ստեղծվի երկու հանձնաժողով՝ շենք-շինություններին և գյուղատնտեսությանը պատճառված վնասները հաշվարկելու նպատակով:

«Սելավատարները նորմալ գործել են, բայց ջուրն այնքան ուժեղ էր, որ սելավատարը կորել էր ջրի տակ, հզորությունը բավարար չէր: Նախկինում էլի է եղել սելավ, բայց փոքր վնասներ են կրել մարդիկ, սա աննախադեպ էր», - ասում է Սարգիս Մարգարյանը:

Լեռնագոգի համայնքապետի խոսքով` գյուղտեխնիկայով երեկ պատնեշներ են կառուցել, որպեսզի փոխեն ջրի ուղղությունը դեպի ձորակ: Մասամբ հաջողվել է, սակայն հոսքն այնքան ուժգին է եղել, որ նույնիսկ պատնեշներն է քշել-տարել:

Սելավաջրերը քանդել են նաև համայնքապետի անասնագոմի պատերը: Գոմն այլևս օգտագործման համար պիտանի չէ, պետք է նորը կառուցեն: Գյուղացիները տարածքն ուսումնասիրելու ժամանակ անասնագոմի պատուհանները գտնում էին հարևանությամբ գտնվող ձորակից:

Մոտ 30 մետր քանդվել է նաև Արտակ Գալստյանի բակի պարիսպը: Կոտրել է տան դարպասները և ջուրը լցվել է բակ: Հոսքն այնքան ուժեղ է եղել, որ պարիսպը չի դիմացել ճնշմանը և փլուզվել է, իսկ հավաքված ջուրն ամբողջությամբ լցվել է ավելի ցածրադիր հատվածում գտնվող հարևանների տները:

Արտակ Գալստյան

«30 տարի է ապրում ենք, նման բան չէինք տեսել: Լավ ա` պատահմամբ երեխա չկար դուրսը, ջուրը կքշեր: «Զիլ» ավտոները կանգնացրել, պատնեշ էինք սարքել, որ ջուրը գյուղ չմտնի, ավտոներն էլ էր քշում»,- ասում է Արտակը:

Ցիալա Մուրադյանը տխրել է, որ որդու տան նկուղն է վնասվել, ջուրը ողողել է ամբողջ բակն ու ավտոտնակը: Նա հերթով ցույց է տալիս սելավաջրերի հետքերը:

Գալինա Մեսրոպյան

Նրանց հարևանը՝ Գալինա Մեսրոպյանը, պատմեց, որ 15 գոճի ու մայր խոզեր ունի: Իրենք «նպատակով են պահել», և հիմա վաճառելու ժամանակն է: Երեկ տանը ինքն ու հարսն են եղել՝ երեխաների հետ, տղամարդիկ տանը չեն եղել: Ասում են` րոպեների ընթացքում ջուրը տանելու էր իրենց եկամուտը:

«Հերթով, երեխու նման գոճիներին եմ գոմից գրկել, դուրս հանել, խեղդվում էին արդեն: Գիշերով տարել լցրել եմ հարևանի գարաժը` մինչև գոմի ջրերը ցամաքեն: Հարսս հերթով գրկում, հանում էր, ես վազացնում էի հարևանի տուն: Ամբողջ գիշեր չքնեցինք, լացով լուսացրեցինք: Մայր խոզերին դուրսն ենք պահել, հսկել ենք ամբողջ գիշեր: Հետո տեսանք, որ մի քանի հավ է խեղդվել, բայց աչքիս չի գալիս էլ»,- ասում է տիկին Գալինան՝ հավելելով, որ անասնագոմի խոնավությունից հարսը թեթև էլեկտրահարվել է, և երջանիկ պատահականություն է, որ անդառնալի մարդկային կորուստ չեն ունեցել:

Լեռնագոգի համայնքապետ Սարգիս Մարգարյանը հույս ունի, որ կառավարությունը կաջակցի համայնքին: Ասում է՝ ի վիճակի չեն իրենց ուժերով վերականգնել վնասը։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter