Հայաստանը 8-ից 6-րդ տեղն է բարձրացել բանկային վնասաբեր ծրագրերի գրոհների ենթարկված երկրների շարքում․ «Կասպերսկի լաբորատորիա»
«Կասպերսկի լաբորատորիա»-ի Հայաստանի ներկայացուցչությունը լրատվամիջոցներին տրամադրել է տեղեկատվություն Հայաստանում բանկայինվնասաբեր ծրագրերի գրոհների վիճակագրության մասին։
Ըստ ներկայացված վիճակագրության՝ Հայաստանը 8-ից 6-րդ տեղն է բարձրացել բանկային վնասաբեր ծրագրերի գրոհների ենթարկված երկրների շարքում։
Հայաստանի օգտատերերի 1.4%-ը 2018 թվականի հունվար-մարտին ենթարկվել է բանկային վնասաբեր ծրագրերով վարակման փորձերի։ Այդ ցուցանիշով Հայաստանը զբաղեցրել է 6-րդ տեղն աշխարհի երկրների շարքում։ 2017 թվականի նույն ժամանակահատվածում այդ ցուցանիշները կազմել են, համապատասխանաբար, 0.89% և 8-րդ տեղ։ Այս մասին են վկայում «Կասպերսկի Լաբորատորիա» ընկերության տվյալները, որոնք ստացվել են Kaspersky Security Network-ի (KSN) օգնությամբ։
Երկիր | Գրոհի ենթարկված օգտատերերի %-ը, 2018թ. հունվար-մարտ | |
1. | Կամերուն |
2.1
|
2. | Գերմանիա | 1.7 |
3. | Հարավային Կորեա | 1.5 |
4. | Լիբիա | 1.5 |
5. | Տոգո | 1.5 |
6. | Հայաստան | 1.4 |
7. | Վրաստան | 1.4 |
8. | Մոլդովա | 1.2 |
9. | Ղրղզստան | 1.2 |
10. | Ինդոնեզիա | 1.1 |
Ամբողջ աշխարհում օգտատերերին գրոհած բանկային վնասաբեր ծրագրերի շրջանում առաջատարն է ZeuS (կամ Zbot) տրոյական ծրագրերի ընտանիքը, որին բաժին է հասել վարակման փորձերի 28%-ը։ Դրան հետևում է Nymaim շորթող-բանկային տրոյական ծրագրերի ընտանիքը՝ 20.3%, ինչպես նաև Caphaw (15.2%) և SpyEye (11.9%) վնասաբեր ծրագրերը։ Մնացած վնասաբեր ծրագրերի (հիմնականում՝ տրոյական) բաժինը 5%-ից փոքր է։
«Հայաստանում օգտատերերի սարքերի վրա բանկային վնասաբեր ծրագրերի գրոհների քանակի աճը վկայում է այն մասին, որ երկիրն ավելի հետաքրքիր է դարձել ամբողջ աշխարհի կիբեռհանցագործների համար։ Այդ հանգամանքը պետք է զգաստացնի ինչպես ֆինանսական կազմակերպություններին, այնպես էլ առցանց բանկային ծառայությունների անհատ օգտատերերին, որոնք պետք է էլ ավելի մեծ ջանքեր գործադրեն իրենց ֆինանսական միջոցների պաշտպանության համար։ Եթե անհատ օգտատերերին դրա համար բավական է սարքում արդյունավետ հակավիրուս ունենալը և համացանցից և էլեկտրոնային փոստից օգտվելուց զգոն լինելը, ապա ֆինանսական կազմակերպություններին անհրաժեշտ է մինչև մանրուքները մտածված կիբեռանվտանգության համակարգ, որը կիբեռհանցագործներին որևէ սողանցք չի թողնի։ Հայաստանի ֆինանսական կազմակերպություններում վերջին ժամանակներս կիբեռանվտանգության խոշոր միջադեպերի բացակայությունը վկայում է, որ նրանք ձգտում են ապահովել իրենց միջոցների և հաճախորդների փողերի անվտանգությունը», - նշում է կիբեռանվտանգության փորձագետ, Հայաստանում և Վրաստանում «Կասպերսկի Լաբորատորիա»-ի տարածքային ներկայացուցիչ Արմեն Կարապետյանը։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել