Կառավարությունն այսօրվա նիստին որոշեց անվավեր ճանաչել առողջապահության նախկին նախարար Լևոն Ալթունյանի առաջարկով ապրիլի 12-ին ընդունված որոշումը:

Այդ որոշումով «Վաղարշապատի հիվանդանոց» պետական փակ բաժնետիրական ընկերության հարյուր տոկոս բաժնետոմսերը պետք է հանձնվեին հավատարմագրային կառավարման: Նշենք, որ գույքը պայմանագրով հավատարմագրային կառավարման է հանձնվում հավատարմագրային կառավարչին, որը պարտավորվում է գույքի կառավարումն իրականացնել ի նպաստ կառավարման հիմնադրի:

Նախարարը կառավարության անդամներին հայտնեց, որ 2000-ականներին առողջապահության ոլորտում օպտիմալացման ծրագիր է իրականացվել և գրեթե բոլոր շրջանային հիվանդանոցներն ու պոլիկլինիկաները միավորվել են բժշկական միավորումների մեջ, դարձել բժշկական կենտրոններ: Սակայն, եղել են որոշ բացառություններ` պայմանավորված այդ հիմնարկների ղեկավարների միջամտությամբ: «Վաղարշապատի հիվանդանոց» ՊՓԲԸ-ն դրանցից մեկն է եղել: «Այսինքն՝ երբ եղել է դիմադրություն պետական քաղաքականության դեմ, այս հիմնարկը չի միացվել: Այսինքն՝ պոլիկլինիկան ու հիվանդանոցը չեն միացվել իրար ու չեն դարձել մի բժշկական կենտրոն, և դրանից հետո վերաբերմունքը այս բուժհիմնարկին եղել է ավելի ստորադասված մյուս բուժհիմնարկի հանդեպ, ու իր վիճակը աստիճանաբար դարձել է ավելի անմխիթար: Եկել է մի պահ, որ միտք է ծագել՝ բերեք տանք հավատարմագրային կառավարման»,- ասաց նախարարը:

Արսեն Թորոսյանի փոխանցմամբ՝ բուժհիմնարկը հավատարմագրային կառավարման վերցնելու հետաքրքրություն ցուցաբերել է մեկ այլ բուժհիմնարկ, սակայն այդ հետաքրքրությունը փաստաթղթավորված չէ: Նախարարն անհեթեթ համարեց մի պետական հիմնարկը մյուսին հավատարմագրային կառավարման հանձնելու որոշումը:

Նախորդ կառավարությունը «Վաղարշապատի հիվանդանոց»-ը հավատարմագրային կառավարման հանձնելու որոշում կայացնելիս հիմնվել էր առողջապահության նախարարության ուսումնասիրությունների վրա, որոնց համաձայն` «Վաղարշապատի հիվանդանոց»-ի ենթակառուցվածքները չեն համապատասխանում բժշկական սպասարկմանը ներկայացվող ժամանակակից պահանջներին, բժշկական սարքավորումները և կահույքը բարոյապես և ֆիզիկապես մաշված են (մի մասն արտադրված է դեռևս խորհրդային տարիներին): Արդյունքում՝ նշված հաստատությունը գործում է թերծանրաբեռնված, ինչն էլ իր հերթին անդրադառնում է հիվանդանոցի ֆինանսական կայունության վրա:

Նորանշանակ նախարար Արսեն Թորոսյանը կառավարությանը հավաստիացրեց, որ առողջապահության նախարարությունը բժշկական օգնության և սպասարկման ոլորտում նոր քաղաքականություն է մշակում և ոլորտի զարգացման նոր մոտեցումներ է առաջադրելու, որոնք կբարձրացնեն  հիվանդանոցային ծառայություններ մատուցող հաստատությունների գործունեության արդյունավետությունը:

Այդ իսկ պատճառով առողջապահության նախարարն առաջարկեց «Վաղարշապատի հիվանդանոց» ՊՓԲԸ-ի հարյուր տոկոս բաժնետոմսերը չհանձնել հավատարմագրային կառավարման, փոխարենը մշակել առավել արդյունավետ մեխանիզմներ՝ ուղղված մատուցվող բժշկական ծառայությունների որակի բարելավմանը, ենթակառուցվածքների արդիականացմանը, բժշկական սարքավորումներով վերազինմանը, կահույքով և պարագաներով հագեցմանը, որը և կառավարությունը ընդունեց:

Լուսանկարը՝ yerkir.am-ի