Շաբաթ, 23 հունիսի

ԿԳ նախարարը հանդիպել է կրթության վարչության պետերին



Կրթության և գիտության նախարար Արայիկ Հարությունյանն աշխատանքային հանդիպում է ունեցել մարզպետարանների և Երևանի քաղաքապետարանի կրթության վարչության պետերի հետ:

Նախարարությունը հայտնում է, որ Հարությունյանը նախ ներկաներին է ներկայացրել ԿԳ նորանշանակ նախարարի տեղակալ Լուսինե Առաքելյանին, որը համակարգելու է հանրակրթության ոլորտը:

Նախարարի խոսքով՝ մարզպետարանների կրթության վարչության աշխատանքից ավանդաբար մեծ դժգոհություն է եղել, որն առաջին հերթին կապված է դպրոցների կառավարման խորհուրդների ձևավորման, տնօրենների ընտրության և, առհասարակ, դպրոցների նկատմամբ վերահսկողության հետ:

«Մեր առաջին ուղերձը եղել է ուսումնական հաստատությունների ապաքաղաքականացման հարցը. այս մասին բոլորն են հայտարարել՝ սկսած երկրի վարչապետից մինչև նախարար: Հետևաբար, սա պետք է լինի ամենախիստ վերահսկվող թեմաներից մեկը, և մենք իրավունք չունենք այս առումով նոր խնդիրներ ստեղծել: Բացի այդ, պետք է այնպես անել, որ դպրոցների կառավարման խորհուրդներում ձեր կողմից նշանակվելիք անձինք չառաջնորդվեն նեղ խմբային և կուսակցական, այլ բացառապես կրթության ոլորտի շահերով: Սա պետք է լինի առաջնահերթություն: Իհարկե, առաջիկայում պատրաստվում ենք խորհուրդների ձևավորման կարգի փոփոխության հարցը քննարկել, որը, բնականաբար, արագ չի լինի: Հետևաբար, առաջիկա ամիսներին ձեր գործողություններն այս առումով շատ կարևոր են լինելու»,- դիմելով կրթության վարչության պետերին՝ նշել է Արայիկ Հարությունյանը:

«Հանդիպման ընթացքում ներկաները մի շարք հարցեր են բարձրացրել, որոնք, մասնավորապես, վերաբերել են սահմանամերձ համայնքների դպրոցներում ուսուցիչների պահանջարկի, ֆինանսավորման մեխանիզմների, ուսումնական պլանի, փոքր թվաքանակ ունեցող դպրոցների, ինչպես նաև ուսուցիչների վերապատրաստման, բազմահամակազմ դասարանների ուսուցման կազմակերպման և այլ խնդիրների»,- գրված է ԿԳՆ հաղորդագրության տեքստում:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ