HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Սամվել Բաբայանն ու Իգլայի գործով մյուսներն ազատ կարձակվեն

Վճռաբեկ դատարանը բեկանեց նրանց գործով վճիռը

Վճռաբեկ դատարանը բեկանեց ԼՂՀ ՊԲ նախկին հրամանատար Սամվել Բաբայանի և նրա մարտական ընկեր Սանասար Գաբրիելյանի և Արմեն Պողոսյանի վերաբերյալ վճիռն ու գործն ուղարկեց առաջին ատյան՝ նոր քննության: Դատարանը որոշեց Բաբայանի և Սանասար Գաբրիելյանի նկատմամբ ընտրված խափանման միջոց կալանավորումը փոխարինել պատգամավորների անձնական երաշխավորությամբ, իսկ Արմեն Պողոսյանին ազատել գրավի դիմաց:



Նշենք, որ համաձայն մեղադրական եզրակացության՝ Սամվել Բաբայանը դրդել է մի խումբ անձանց` նախնական համաձայնությամբ, ապօրինի կերպով ռազմամթերք հանդիսացող «Իգլա» ձեռք բերելուն, փոխադրելուն և պահելուն, ինչպես նաև փոխարկման արդյունքում հանցավոր ճանապարհով ստացված գույք ձեռք բերելուն: 

Սանասար Գաբրիելյանը ու Արմեն Պողոսյանը մեղադրվում են մի խումբ անձանց հետ` նախնական համաձայնությամբ, ռազմամթերք հանդիսացող «Իգլա» տեսակի դյուրակիր զենիթահրթիռային համալիր ապօրինի կերպով ձեռք բերելու, փոխադրելու և պահելու մեջ: 

Առաջին ատյանի դատարանը Սամվել Բաբայանին, Սանասար Գաբրիելյանին ու Արմեն Պողոսյանին իրենց վերագրվող արարքներում մեղավոր էր ճանաչել: Վերաքննիչ քրեական դատարանն անփոփոխ էր թողել առաջին ատյանի դատավճիռը, որից հետո Վերաքննիչ դատարանի դատական ակտը բողոքարկվել է Վճռաբեկ դատարան: 

Բաբայանի և Սանասար Գաբրիելյանի ազատության համար անձնական երաշխավորություն էին ներկայացրել Ազգային ժողովի «Ծառուկյան» դաշինքի 13 և «Ելք» դաշինքի 2 պատգամավոր։ Պատգամավորներից երկուսը՝ Նաիրա Զոհրաբյանն ու Վահե Էնֆիաջյանն, այսօր դատարան էին եկել:



Նշենք նաև, որ բողոքի վերաբերյալ դիրքորոշում հայտնելիս մեղադրող դատախազ Արամ Արամյանն ասաց, որ գործով առաջին և երկրորդ ատյանների կողմից կայացված դատական ակտերն, իր համոզմամբ, բեկանման ենթակա չեն ու պնդեց մինչ այս իր  ներկայացրած հիմնավորումները: 

Սամվել Բաբայանի ու Գաբրիելյանի կողմնակիցներն այս պահին դատարանի դիմաց են. վերջիններս նիստի ամբողջ ընթացքում բողոքի ակցիա էին իրականացնում ու պահանջում նրանց ազատ արձակել:



Նշենք, որ ամբաստանյալներն այս պահին դատարանում չեն. Սանասար Գաբրիելյանի ու Սամվել Բաբայանի անձնական երաշխավորության գումարը, ինչպես նաև Արմեն Պողոսյանի գրավի գումարը դատարանի դեպոզիտ հաշվին վճարելուց հետո միայն նրանք ազատ կարձակվեն Երևան-Կենտրոն քրեակատարողական հիմնարկից, որտեղ պահվում են: 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter