Շաբաթ, 22 սեպտեմբերի

Ալավերդու պղնձաձուլական գործարանի արտանետումները վերջին օրերին ավելացել են. բնակչությունը դժգոհում է


Վերջին օրերին  «Արմենիան Քափըր Փրոգրամ» ՓԲԸ-ի Ալավերդու պղնձաձուլական գործարանի պարբերաբար կրկնվող արտանետումները  ալավերդցիների համար դարձել են անտանելի: Այսօր ժամը 11:30-ից մինչև 12:30-ը գործարանի Կոշաբերդ սարի վրա գտնվող ծխնելույզի մեծաքանակ արտանետումների պատճառով Ալավերդիում ստեղծվել է արտակարգ իրավիճակ:

 Արտանետումների մեջ կորած էին Աքորի գյուղը և Լալվար սարը, Մադանը, պղնձաձուլական գործարանի սանիտարական գոտու շենքերը չէին երևում ծխի մեջ: Ծուխը պատել էր քաղաքի Ջրավազան, Հայպետշին, Խուդյակով, Զորավար Անդրանիկի թաղամասերը:  Ծուխը դանդաղ շարժվում էր դեպի Շահումյան և Սանահին կայարանային թաղամասեր, Հագվի և Օձուն գյուղեր: Խուճապի մեջ են հայտնվել Ս. Սարահարթ թաղամասի բնակիչները: Ծնողները բակերում խաղացող երեխաներին շտապ տուն էին կանչում։

«Ինչ անենք, որ փրկվենք այս վիճակից», - միմյանց հարցնում էի  փողոցներից տուն շտապող ալավերդցիները:

«Մենք հեչ, բա թոռնիկներս, բա մյուս երեխաները»,- ասում է Սամվել Դալլաքյանը։ Վերջինս  երկար տարիներ աշխատել է պղնձաձուլական գործարանում և տեղյակ էր գործարանի արտանետումների վտանգներին:

«Արմենիան Քափըր Փրոգրամ» ընկերության ղեկավարները տարիներ շարունակ գործարանի էկոլոգիական վիճակը մեղմելու համար բնակչությանը, հատկապես նախաընտարական շրջանում, խոստումներ են տալիս  գերմանացիների, ռուսների, վերջերս էլ չինացիների ներդրումների մասին: Խոստումները այդպես էլ մնում են խոսակցություններ:

Վերջին օրերի մեծաքանակ արտանետումների պատճառների մասին մեր հարցին պատասխանելով «Արմենիան Քափըր Փրոգրամ»  ընկերության տնօրեն Լուսինե Մեջլումյանն ասաց«Մենք տեղյակ ենք, որ պղնձաձուլական գործարանի անհամեմատ մեծ արտանետումները առաջացնում են բնակչության դժգոհությունները: Մի բան կարող եմ ասել, ելնելով իրավիճակից մենք կարճաժամկետ կնվազեցնենք գործարանի արտադրողականությունը, այսինքն կնվազեցնենք ձուլող վառարանի բեռնումը: Ինչ խոսք, դա իր բացասական հետևանքները կունենա մեր ֆինանսատնտեսական ցուցանիշների վրա: Բայց մենք  այս խնդրի երկարաժամկետ լուծում չունենք: Չի բացառվում, արտանետումները պայմանավորված են մշակվող հումքի բաղադրությամբ: Մենք այդ ամենը կուսումնասիրենք: Հավատացեք , մենք շատ ենք շահագրգռված արտանետումների վիճակը կայունացնելու գործում»։

 


Գլխավոր էջ

Տպել    |  In English

Մեկնաբանություններ (2)
1. անահիտ11:34 - 17 հունիսի, 2018
էս ամբողջ գործարանը պետք է տեղափոխել ու տանել ավելի հեռու Ալավերդուց էս մարդիք ամեն օր թունավորվում են սա ուղղակի անընդունելի է,
2. Հրայր16:51 - 18 հունիսի, 2018
Փակել է պետք ամեն տեսակ հանքարդյունաբերությունը, մինչև մարդկությունը չսովորի առանց միջավայրը վարի տալու հանքարդունաբերել: Ու՞մ են պետք իրենց երկու կոպեկ հարկերը ու իրենց ցածր որակավորման աշխատատեղերը, որոնք միայն միջավայրն են վարի տալիս: Ավելի լավ է կաթնամթերքի ու գյուղմթերքի վաճառքի մոնոպոլիաները վերացնեն ու իրենց երեխեքին ծրագրավորում ու տեխնոլոգիաներ սովորեցնեն:
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։